«Punoujale sünain Nünüikin Maleiwa tü Bibliakat jee süpülajatüin shia wayuu süpüshuaʼa, aashajaashijaʼamata Maleiwa wamaa. [...] Pansaale pukuwaʼipa sümaa tü ekirajünakat suluʼu tü iküleesia kaluʼukat pia, choʼujaasüjaʼamata süshajünüin [tü Bibliakat] suluʼu tü pütchi wachuntawaikat weinshi», müsü nünüiki Alan Duthie suluʼu tü karaloʼutakat Bible Translations and How to Choose Between Them (Wainma Biblia ashajünaka: ¿jeʼtsüche tü anakat süpüla wamaʼanain?).

Napüshuaʼa na wayuu kojutukana amüin tü Nünüikikat Maleiwa, natüjaa aaʼu shiimain tia nümakat chia wayuukai. Natüjaa aaʼu nüshajiralain Maleiwa tü Bibliakat otta jaloulin shia «süpüla ekirajaa, süpüla aküjaa mojuin wanee kasa, süpüla anoutaa wanee kasa, süpüla lotuin sukuwaʼipa wayuu sünainjee achiaanaa» (2 Timoteo 3:16). Nnojotsü karaloʼutaʼalain neʼe sümaiwajatü tü Bibliakat, «kaawainsü tü nünüikikat Maleiwa otta pülashaatasü maʼin shia». Süküjain tü naaʼinrajatkat wanee wayuu süpüla nunouteʼerüin tü kasa mojusü alatakat nümüin (Hebreokana 4:12). Müsüjeseʼe choʼujaain süshajünüin suluʼu tü pütchi wachuntawaikat weinshi. Tia süpülajatü shiyaawatüin aaʼu wayuu maʼleekalia tü sümakat, saaʼinrüinjatüin shia otta mapüleeinjatüin sümüin aashajeʼeraa otta ayaawataa saaʼu tü sümakat.

Müsüjeseʼe talatüin naaʼin na wayuu kojutukana amüin tü Bibliakat wanaa sümaa süküjünüin eeitpain wayuunaikiruʼu tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, Ashajuushika suluʼu Griego. Na aküjaliikana pütchi nüchiki Jehová naküjain eeitpain tia Bibliakat soʼujee kashikat juunioʼu 25, 2022. Pansaasü tü ashajünakat suluʼu jee mapüleesat ayaawataa saaʼu tü sümakat. Mapüleejeerü namüin na aashajaakana wayuunaiki nayaawatüin saaʼu nünüiki Maleiwa. «¿Jaraliiche na ashajakana tia Bibliakat?», eesüjaʼa müle pünüiki.

Tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, Ashajuushika suluʼu Griego, jeketü shia ashajünüin suluʼu wayuunaiki, eetüjütpejeʼe shia suluʼu inglés soʼujee juyaka 1950. Ojuʼitüsü shia suluʼu inglés sutuma Watch Tower Bible and Tract Society, tia shia wanee sociedad bíblica internacional ashajiraka tü Bibliakat suluʼu sünüikipala wayuu. Anuu sünüiki tü karaloʼutakat Aapiria Wayuu ojuʼitaka peʼureeroʼu 1, 1951: «Na wayuu ashajakana tü Bibliakat suluʼu nanüikipala, nachuntuin [...] nnojoluinjatüin süküjünüin jee süshajünüin nanülia jaʼitasü katayülüin noʼu jee outuinnapale naya. Tü keeʼireekat naaʼin shia kojutuinjachin atumawaa chi Maleiwa shiimainshikai».

Soʼu 1961 ojuʼitüsü süpüshuaʼa tü Biblia kanüliakat Namüinjatü na Wayuu Kepieenakana Suluʼu tü Mma Jeketükat. Sünainjee nnojoluin süküjünüin nanülia na wayuu ashajakana shia, nnojotsü jülüjainjatüin waaʼin mojutuin Maleiwa namüin. Anuu sünüiki tü pütchi ashajünakat suʼttianainjee tü Biblia ojuʼitakat soʼu 2013: «Watüjaa aaʼu kojutuin maʼin tü pütchi suluʼukat tü Bibliakat. Müsüjeseʼe wanaʼlüin shia süchikuaʼa süpüla pansaainjatüin maʼin tü sümakat. [...] Pansaainjatü sümaa tü ashajünatüjütkalia sümaiwa paala. Mapüleeinjatü ayaawataa saaʼu tü sümakat jee mapüleeinjatü aashajeʼeraa shia».

Tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, alatüsü suulia 210 anüikii süshajünaka aluʼu süpüshuaʼa jee süpüshi neʼe jee eʼinprimiijünüsü 243.589.765. ¿Kasa neʼraka ashajünüin na aashajeʼerakana shia?

Naashin Jesús müinjatü nanüiki na nikirajüinkana: «Washikai iipünaajachikai kasataalejeseʼe shiʼraajüin wayuu pünülia otta kojutuin pia sümüin» (Mateo 6:9). Alatüsü suulia 7.000 süshajünaka aluʼu nünülia Maleiwa Jehová suluʼu tü Bibliakat (Éxodo 3:15; Salmo 83:18). Na anoujashii eejanakana nachikumüin napüshuaʼa na aluwataaushikana, apülajünüsü noulia natuma na judíokana nachuntuin nünülia Maleiwa (Aluwataaushikana 20:29, 30; 1 Timoteo 4:1). Na ashajakana sukoopiain tü Ashajuushikat suluʼu griego, nasünneʼerüin nünülia Maleiwa jee nashajüin tü pütchikat «Maleiwa» otta «Señotkai».

Na ashajakana tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, nashajüin süchikuaʼa tü nünüliakat Jehová eejatüle süsünneʼennüin paala suluʼujee tü Ashajuushikat suluʼu Griego. a Ashajünüsü nünülia Maleiwa maʼaka 237 sukua suluʼu tia karaloʼutakat. Nnojotsü ashajünüin süpaʼa mma tia makat. Ekirajaana achiiruat palajana. Jamüsüjaʼa suluʼu Lucas 4:18, ashajünüsü tü achuntunakat suluʼu Isaías 61:1. Eejatü ashajünüin nünülia Maleiwa suluʼu tü karaloʼutakat Isaías, tü ashajünatüjütkalia paala suluʼu hebreo. Anuujeseʼe süshajia tü sümakat Lucas 4:18 sutuma tü Biblia kanüliakat Namüinjatü na Wayuu Kepieenakana Suluʼu tü Mma Jeketükat: «Eesü tü nüpülainkat Jehová taaʼu süka nüneeküin taya süpüla taküjainjachin pütchi anasü namüin na maʼletsekana».

Süshajünakaʼa süchikuaʼa nünülia Maleiwa suluʼu tia wetsiikulokalüirua, shia süpüla nayaawatüin saaʼu na wayuukana nnojolin niain neʼe Jehová Jesucristoin, chi waneeshikai Nüchoin. Anuu süshajia sutuma waneirua Biblia tü sümakat Mateo 22:44: «Müshi chi Señotkai nümüin chi Taseñotsekai» (Reina-Valera). ¿Jamüsü süpüla sütüjaanüinjatüin aaʼu jaralin chi aashajaakai yala? Türa wetsiikulokot ayuʼluushi suluʼujee Salmo 110:1 eere süshajünüin nünülia Maleiwa suluʼu hebreo. Anuujeseʼe süshajia Mateo 22:44 sutuma tü Biblia kanüliakat Namüinjatü na Wayuu Kepieenakana Suluʼu tü Mma Jeketükat: «Müshi Jehová nümüin chi Taseñotsekai». Nnojotsü choʼujaain nütüjainjachin maʼin wanee wayuu süpüla niyaawatüin saaʼu nnojolin niain neʼe Jehová Jesucristoin, chi Nüchonkai (Marcos 13:32; Juan 8:17, 18; 14:28). Niyaawatüinjatü aaʼu wanee wayuu tia süpüla nuʼttaainjachin. «Nieechi oʼttaaka chi wayuu achuntakai nünülia Jehová», müsüjeseʼe müin Aluwataaushikana 2:21.

Süpüla pansaainjatüin tü sümakat sümaa tü ashajünatüjütkalia sümaiwa paala suluʼu griego jee süpüla mapüleeinjatüin ayaawataa saaʼu otta aashajeʼeraa shia, ekirajaana achiiruat palajana tü pütchikat. Süpüla pansaainjatüin tü sümakat tü Biblia kanüliakat Namüinjatü na Wayuu Kepieenakana Suluʼu tü Mma Jeketükat sümaa tü verbo ashajünatüjütkalia paala suluʼu griego, ekirajaana achiiruat kasain süküjeein achiki tia verbokot. Jamüsüjaʼa suluʼu griego otta suluʼu wainma anüikii eeka maaʼulu, naatayaa müsü sukuwaʼipa süshajia tü verbokot süpüla sütüjaanüin aaʼu malatüinyürüle tü sümakat, sülatüirüle jee sülatajateerüle mapeena. Eepejeʼe waneirua sukuwaʼipa tü verbokot suluʼu griego aküjeeka süchiki müleka nnojoyürüle sülatüin tü sümakat, sülatüirüle jee ayatüinjatüle saaʼinnüin. Anuu sukuwaʼipa süshajia tü pütchi suluʼukat Mateo 6:33. Tü verbokot «achajawaa» makat suluʼu griego, shia süküjeeka achiki ayatüinjatüin aaʼinnüin wanee kasa. Anuukalaka süshajia tü nüküjeekalü achiki Jesús suluʼu griego: «Süka niain Maleiwa aluwataajeechin saaʼu tü mmakat, ayataʼaya jaaʼinmaain tü aʼyatawaakat nümüin otta tü kasa anakat noʼuluʼu. Naapeetka jümüin tü kasa choʼujaakat jümüin». Müsia sukuwaʼipa süshajia Mateo 7:7: «Ayataʼaya juchuntuin, jüsülajüneenaka amüin, ayataʼaya jüchajaain jünteetka sünain tü jüchajaakalü achiki. Ayataʼaya jütaletüin miichoʼu, sujutanneetka jüpüleerua» (Roma 1:32; 6:2; Galacia 5:15).

Akumajünüsü sukuwaʼipa süpüla süshajünüin süpüshuaʼa tü Bibliakat wayuunaikiruʼu. Nnojotsü shiainjatüin neʼe ashajünüin tü Ashajuushikat suluʼu Griego. ¿Pansaajeetche suluʼu wayuunaiki jee mapüleejeetche ayaawataa saaʼu tü sümakat maʼaka saaʼin tü ashajünakat suluʼu inglés?

Aa, pansaajeerü. Na Laülaashii Jülüjakana Aaʼin na Aküjaliikana pütchi, jülüjasü naaʼin tia aʼyatawaakat. Nakumajüin sukuwaʼipa süpüla eeinjanain waneinnua wawalayuu aʼyataajiraakana namaa na ashajüinjanakana tü Bibliakat suluʼu nanüikipala (Proverbios 11:14). Müshiijeseʼe eein na wawalayuu ashajakana tü Bibliakat suluʼu nanüikipala sainküinpünaa tü mmakat. Chaa eere sukumajüin sukuwaʼipa naʼyataain na aküjaliikana pütchi nüchiki Jehová, eʼitaanüsü tü kanüliakat Servicios de Traducción. Suluʼu tia makalü anülia, eeshii wawalayuu akaalinjakana na ashajakana tü Bibliakat, asoutushii naya shiʼipajee tü nasakirakalü anain naya wawalayuukana. Müsü sukuwaʼipa atumawaa süpüla wanaawainjatüin tü sümakat tü Biblia kanüliakat Namüinjatü na Wayuu Kepieenakana Suluʼu tü Mma Jeketükat sümaa tü ashajünakat suluʼu waneirua anüikii. Jee müsia eʼitaanüsü tü programakat Watchtower Translation System süpüla nakaalinjünüin na ashajakana tü Bibliakat suluʼu nanüikipala. Sükajee programakat tia, eʼnnüsü jamüin süshajia suluʼu inglés tü pütchikat hebreo otta griego. Sutuma müin sukuwaʼipa atumawaa, mapüleesat namüin na wawalayuukana nashajüin suluʼu nanüiki tü ashajünakat suluʼu inglés. Eesia waneirua kasa naaʼinrajatka na wawalayuu ashajakana tü Bibliakat suluʼu nanüikipala. Tü programa eʼitaanakat suluʼu computador, jalouisü maʼin shia namüin na wawalayuu ashajakana tü Biblia kanüliakat Namüinjatü na Wayuu Kepieenakana Suluʼu tü Mma Jeketükat süpüla pansaainjatüin süshajia jee mapüleeinjatüin ayaawataa saaʼu tü sümakat maʼaka saaʼin inglés.

Paashajeʼera tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, Ashajuushika suluʼu Griego. Paashajeʼera suluʼu Internet jee shiale suluʼu tü aplicaciónkot JW Library jee shiale puchuntuin waneesia eere noutkajaain na aküjaliikana pütchi nüchiki Jehová. Kamalainjeerü pümüin waneirua kasa ashajünaka suluʼu maʼaka saaʼin mapüleein ayaawataa saaʼu tü süleetürainkat, mapüleein aashajeʼeraa shia, eein wanee pütchi kanüliakat «ashajünaka suluʼu». Tia süpülajatü puusütamaatüin sünain tü wetsiikulo eʼraajünakat maʼin. Ashajünüsü wanee kanüliaka «jamaluʼulu pütchikat» süchiki waneirua pütchi anaka maʼin. Paashajeʼereerü wanee Biblia pansaaka atuma nünüiki Maleiwa suluʼu tü pütchi puchuntawaikat weinshi.