Palajatka karaloʼuta namüinjatka na chajanakana Corinto 10:1-33
-
Tü alatakat namüin na israelitakana süpülajatü nnojoluin washatüin nakuwaʼipa (1-13)
-
Achiaanüshii waya suulia waʼwaajüin shiyaakua maleiwayaasü (14-22)
-
Aikalawaa sünain ekawaa nümaa Jehová jee aikalawaa sünain ekawaa sümaa tü yolujaakalüirua (21)
-
-
Waneekapa wanee kasa, jülüjeesü waaʼin aneerüle shia sümüin wayuu (23-33)
-
«Süpüshuaʼa tü kasa jaainjakat jaainjainjatü shia süpüla kojutuinjachin atumawaa chi Maleiwakai» (31)
-
10 Tawalayuwaa, na watuushinuukana waraittapuʼushii seemiouse wanee siruma jee alatüshii pasanainpünaa sünain tü palaakat.
2 Müshii woutiisakai naaʼin süka paaʼinwain naya nümaa Moisés wanaa sümaa waraittüin naya seemiyouse tü sirumakat jee nalatüin pasanainpünaa sünain tü palaakat.
3 Nekapuʼuin tü eküülü naapakat Maleiwa namüin
4 jee nasapuʼuin tü asüüshi naapakat Maleiwa namüin. Nasapuʼuin shia sünainjee tü ipa naapajalakat Maleiwa namüin, eepuʼusü tia ipakat namaa. Nia kayaawasepuʼuka Cristo tia ipakat.
5 Eepejeʼe na nnojoliikana anain akuwaʼipa noʼuluʼu Maleiwa, müshiijeseʼe outuin naya chayaa isashiipaʼa.
6 Alatüsü tia namüin süpüla nnojoluinjatüin suchuntaain waaʼin wanee kasa mojusü maʼaka naaʼin nayakana.
7 Nnojoliinjana waya aʼwaajüin shiyaakua maleiwayaasü maʼaka naainjain noʼutku nayakana. Anuu sünüiki tü Karaloʼuta Nüchikimaajatkat Maleiwa: «Naikalaakalaka sünain ekawaa jee asawaa, süchikijee natamaakalaka sünain emiʼijaa».
8 Nnojoishii waya aʼluwajiraainjanain wakuwaʼipa* maʼaka naʼluwajiraain nakuwaʼipa noʼutku nayakana. Müshiijeseʼe outuin 23.000 wayuu naʼakajee soʼuleʼeya wanee kaʼi.
9 Nnojotsü wooʼulaküinjatüin naaʼin Jehová* maʼaka naainjain shia noʼutku nayakana. Müshiijeseʼe outuin naya sutuma süchotuin naya wüi.
10 Nnojoishii waya aʼyounalaainjanain maʼaka naainjain noʼutku nayakana. Müshiijeseʼe outuin naya nutuma chi aapiee nümaʼanajeejachikai Maleiwa.
11 Alatüsü tia namüin suulia mojuin wakuwaʼipa maʼaka naaʼin nayakana jee ashajünüsü shia süpüla watüjainjanain sünainjee tü alatakat namüin. Ashajünüsü tia pütchikat wamüin waya eekana sajaʼttiamüin tü kasa alatakat sainküin mma.*
12 Eejeesü naaʼin chi wayuu nnojoleechikai ojuttuin naashin.
13 Alatüirü namüin na waneinnua tü kasa ooʼulakünakalü aka jaaʼin. Sutuma waneepiain Maleiwa jümaa, nnojoleerü nuuʼulaain suuʼulakünüin jaaʼin süka wanee kasa nnojoleetka jüchecherüin atuma jaaʼin. Suuʼulakünapa jaaʼin nükaalinjeena jia Maleiwa süpüla jüchecherüinjatüin jaaʼin soʼunnaa tia.
14 Tawalayuu aishiikana tapüla, jalia jia suulia juʼwaajüin shiyaakua maleiwayaasü.
15 Taküjain jümüin tia süka wayuuin laülaa aaʼinchii jia. Nnaweerüjaʼa jünüiki süchiki tü tamüitpakat jümüin.
16 ¿Aashin shiyaawaseyaain nüsha Cristo tü asüüshi waapakalü aaʼu analuʼut nümüin Maleiwa? ¿Aashin shiyaawasein niʼiruku Cristo tü pan washaletawaikat?
17 Waneesiaʼala neʼe tü pankat, mayaapejeʼe wainmain waya waneeshiaʼala neʼe waya, jama waneesüin tü pan wekiraakat.
18 Jülüjataa jaaʼin tü naainjapuʼukat na israelitakana, ¿aashin naʼwaajüin Maleiwa na ekapuʼukana tü kasa aapünakat nümüin Maleiwa?
19 ¿Shiache taküjeeka achiki kojutuin maʼin tü kasa aapünakat sümüin shiyaakua maleiwayaasü? ¿Shiache taküjeeka achiki maleiwain tü shiyaakuakat tü maleiwayaasükat?
20 Nnojotsü shiain taküjeein achiki tia. Tü taküjeekalü achiki shia naʼajüin wanee kasa na wayuu nnojoliikana judíoin sümüin tü yolujaakalüirua, nnojoishi niain naʼajüin amüin Maleiwa. Nnojotkalaka tacheküin wanaawain jaaʼin sümaa tü yolujaakalüirua.
21 Nnojotsü anain jüsataale suluʼu tü iita nüsakalü aluʼu Jehová* sümaa jüsataalain joo suluʼu tü iita süsakalü aluʼu tü yolujaakalüirua. Nnojotsü anain jüikaajaale sünain ekawaa nümaa Jehová* sümaa jüikaajaataain sünain ekawaa sümaa tü yolujaakalüirua.
22 ¿Shiataapa wacheküin jashichinjachin Jehová* saalinjee tü waainjakat? ¿Aashin niain katchinreein maʼin woulia?
23 Eesü süpüla naaʼinrüin wanee wayuu tü naaʼinreekalü amüin, nnojotpejeʼe anain süpüshuaʼa tia makat. Eesü süpüla naaʼinrüin wanee wayuu tü naaʼinreekalü amüin, nnojotpejeʼe anain sukuwaʼipa wayuu sutuma.
24 Ayataʼaya jaainjain tü aneetkalü atuma nakuwaʼipa na waneinnua. Nnojotsü shiainjatüin neʼe jaainjain tü aneetkalü atuma jukuwaʼipa.
25 Anainjatü jaaʼin* sünain ekaa tü asalaa oikaanakalü eere tü oikaaleekalü asalaa. Nnojo jüsakirüin jalejeekuwalüin shia.
26 Mataasü sümakai tü Karaloʼuta Nüchikimaajatkat Maleiwa: «Nia Jehová* laülaakai saaʼu tü mmakat jee süpüshuaʼa tü kasa eekat saaʼu».
27 Neenajaale pia wanee wayuu manoujainsai sünain wanee ekawaa jee puʼunule sünain ekaa süpüshuaʼa tü naapakat pümüin, anainjatü paaʼin sünain ekaa tia eküütkat sümaa nnojolin püsakirüin jalejeekuwalüin shia.
28 Jamüshijaʼa eetaale wanee wayuu makai pümüin: «Asalaakat tüü aapünüsü sümüin shiyaakua maleiwayaasü». Nnojo piküin shia suulia mojujain nukuwaʼipa chi wayuu aküjakai tia pümüin jee suulia mojushiijüin shia sümüin wayuu.
29 Nnojotsü taküjeein achiki tia pümüin suulia mojushiijüin shia pümüin. Tü taküjeekalü achiki shia suulia mojushiijüin shia sümüin wayuu. Nnojotsü taainjeein wanee kasa süka taaʼin tamüiwaʼa suulia mojushiijüin shia sümüin wayuu mapa.
30 Taapüle analuʼut nümüin Maleiwa saaʼu tü teküinjatkat jee nnojorüle wanee kasa ataʼülajatka takuwaʼipa suulia teküinjatüin shia, ¿jamakaʼa teküinjatka shia mojeerüle sünüiki wayuu tachiki sünainjee?
31 Jaʼitashii jiküin, jüsüin wanee kasa jee jaainjain wanee kasayaakaijeʼe, süpüshuaʼa tü kasa jaainjakat jaainjainjatü shia süpüla kojutuinjachin atumawaa chi Maleiwakai.
32 Nnojo jaainjain wanee kasa amalajaajeetka atuma nanoula na judíokana, na griegokana jee na anoujakana nünain chi Maleiwakai.
33 Jamüshijaʼa taya, shia taainjaka wanee kasa anashiijeetka sümüin wayuu süpüshuaʼa. Nnojotsü taainjeein neʼe wanee kasa aneetka atuma takuwaʼipa tamüiwaʼa, shia taainjaka tü kasa aneetkalü atuma sukuwaʼipa wainma wayuu süpüla suʼtteʼennajatüin.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tü pütchikat «Conciencia» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
