Apocalipsis 1:1-20
-
«Nüküjala Jesucristo pütchikat tüü, nümaʼanajeejatü shia Maleiwa» (1-3)
-
Asakünüshii na anoujashii chakana suluʼu tü akaratshisükalü outkajaalee (4-8)
-
«Taya chi Shikiishikai wanee kasa otta taya Sajaʼttakai akajee» (8)
-
-
Niʼrüin Juan nutuma Maleiwa sükajee tü nüpülainkat tü kasa alatajatkat soʼu nükalia chi Señotkai (9-11)
-
Niʼrüin Juan Jesús suluʼu kojutuin nia atumawaa (12-20)
1 Nüküjala Jesucristo pütchikat tüü, nümaʼanajeejatü shia Maleiwa. Nüküjain tia süpüla natüjaainjatüin saaʼu na nüchepchiakana tü kasa alatajateetkat soʼu palit kaʼi. Nuluwataain Jesucristo wanee aapiee nümaʼanajeejachi, nuluwataain nia tamaʼanamüin tayakai Juan, chi nüchepchiakai süpüla niiʼiyatajatüin tamüin tü kasa alatajateetkat mapeena.
2 Taküjakalaka süchiki nünüiki Maleiwa jee süchiki tü nüküjakat Jesucristo, shiaʼaya taküjaka achiki süpüshuaʼa tü kasa teʼrakat.
3 Anakuwaʼipai maʼin chi wayuu emetutkai anüiki naashajeʼerapa tü pütchi aküjakat süchiki tü kasa alatajatkat naashin Maleiwa otta anakuwaʼipalii maʼin na wayuu aapajakana jee oonookana sümaa tü pütchi ashajünakat sünain, jama sülüʼülüin maʼin tü kaʼi aneekünatüjütkalia paala.
4 Karaloʼutakat tüü tashajala tayakai Juan, namüinjatü shia na anoujashii kepiakana suluʼu tü akaratshisükat pueulo chakat suluʼu tü mmakat Asia:*
Kasataalejeseʼe kamaneein jia jee jimatüin jaaʼin nutuma «chi Maleiwa eekai maaʼulu, chi eetüjüikaiya sümaiwa paala otta chi anteechikai». Kasataalejeseʼe müinña jukuwaʼipa natuma na akaratshishii meʼrujusalii shaʼwatakana sümülatuʼu tü einasee eere nuluwataain Maleiwa.
5 Kasataalejeseʼe kamaneein jia jee jimatüin jaaʼin nutuma Jesucristo, chi Oonookai nümüin Maleiwa jee chi Aküjakai pütchi nüchiki, nia Asoʼireʼennakai aaʼin Palajana naʼakajee na outushiikana otta nia Laülaashikai naaʼu na sülaülajanakana mma.
Aishii waya nüpüla, niyuʼluinjeseʼe waya suulia waainjala sükajee naapajiraain nikii waaʼu.
6 Nüneeküin waya süpüla waluwataainjanain wanaa nümaa otta süpüla waʼyataainjanain suluʼu sacerdotein waya nümüin chi Nümaleiwasekai sümaa Nüshin nia. Kasataalejeseʼe kojutuin nia atumawaa jee pülain nia süpüla kaʼikat süpüshuaʼa. Amén.*
7 Shiʼreechi nia wayuu süpüshuaʼa sünain antaa saʼaka siruma, neʼreechia nia na wayuu asotokana nia. Süsheʼejeerü wayuu maʼleekalia suʼluuwain saalinjee shiʼrüin müliaa. Shieeriaʼaya alataka tia, amén.
8 Anuu nünüiki Jehová,* chi Maleiwakai: «Taya chi Shikiishikai wanee kasa otta taya Sajaʼttakai* akajee wanee kasa, eeshi taya maaʼulu, eetüjüiya taya otta anteechi taya, taya chi Maleiwa Pülashikai maʼin».
9 Taya Juan, chi juwalakai, eʼrüshi taya tamüliala wanaa jümaa, aluwataajeechi taya wanaa jümaa otta tachecherüinña taaʼin wanaa jümaa süka paaʼinwain waya nümaa Jesús. Chajachi taya suluʼu tü mma pasanainkat sünain palaa kanüliakat Patmos, amaanüshi taya chamüin sükajee taküjain pütchi nüchiki Maleiwa jee sükajee taküjain pütchi nüchiki Jesús.
10 Teʼrakalaka nutuma Maleiwa sükajee tü nüpülainkat tü kasa alatajatkat soʼu nükalia chi Señotkai, taapakalaka tachiiruajee nikiisa wanee wayuu, müsü nikiisa maʼaka saaʼin shiʼira konneeta.
11 Anuu tü nümakat: «Püshaja sünain wanee rooyo tü kasa piʼrakat, puluwataajeetkalaka shia namüin na anoujashii chakana suluʼu tü akaratshisükat outkajaalee chakat Éfeso, Esmirna, Pérgamo, Tiatira, Sardis, Filadelfia otta müsia Laodicea».
12 Teirakaakalaka tachiiruajee süpüla tatüjaainjachin saaʼu jaʼralin kanüikin tia, teʼrakalaka akaratshisü ranpara aainjuushi süka ooro.
13 Teʼrakalaka pasanain sünain tia ranparakat wanee müshi aka saaʼin süchon wayuu, kasheʼinñouleshi nia otta eesü wanee kuluulu ooroleʼeya nuʼluuwainpünaa.
14 Kasuusü maʼin tü nuʼwalakat, müsü aka saaʼin wanee laana eekai kasuutalüin, kasuusü maʼin shia otta chuwatsü neʼe tü noʼukalüirua, müsü aka saaʼin sikoʼu.
15 Jorottusü maʼin tü nuuʼuikat maʼaka jorottuin tü cobrekat sojojunapa otta emetutsü maʼin nünüiki, müsü aka saaʼin suʼlotuin wüin.
16 Eejatkalaka akaratshisü shüliwala suluʼu tü najapü nikiakat. Sujuʼitakalaka naanüküluʼujee wanee chajaruuta piamaka asa, miyoʼu tia chajaruutakat otta kasasü maʼin shia. Warattüsü maʼin nuʼupünaa maʼaka warattüin chi kaʼikai jaʼipa maʼin nia.
17 Teirakaapa nümüin, oʼnnajaashi taya süʼütpaʼa nuuʼui süka müin outakai taaʼin.
Niʼitaaka taaʼu tü najapü nikiakat jee nümakalaka tamüin: «Nnojo mmoluin pia. Taya chi Palajachikai, taya chi Chiiruaajachikai
18 otta taya chi katakai oʼu. Outushi paala taya, katapejeʼe toʼu maaʼulu jee kateerü toʼu süpüla kaʼikat süpüshuaʼa. Tamaʼanasü tü yaawe taashinjatkalü akajee tatuma wayuu suulia outaa jee tayuʼluinjatka akajee shia suluʼujee tü Amuuyuukat.*
19 Shiakalaka anain aluʼu püshajüle süchiki tü kasa piʼrakat, süchiki tü kasa alatakat maaʼutpünaa jee tü kasa alateetkat süchikijee tü eekat maaʼulu.
20 Anuu tü kayaawasekat tü akaratshisükat shüliwala piʼrakat suluʼu tü tajapü tekiakat jee tü akaratshisükat ranpara aainjuushikat süka ooro: tü akaratshisükat shüliwala nayaawase na aapiee nümaʼanajeejanakana Maleiwa, na chakana suluʼu tü akaratshisükat outkajaalee noutkajaaka aluʼu na anoujashiikana otta tü akaratshisükat ranpara nayaawase na anoujashii outkajaakana suluʼu tia akaratshisükat outkajaalee.
Noota
^ Tü mma Asia münakat suluʼu tü Pütchi Ashajuushikat suluʼu griego, shia tü mma suluwataapuʼukalü aaʼu Roma, tü kanüliakalü Asia Menor, nnojotsü shiain tü Asia münakat maaʼulu. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ «Alfa otta Omega» maluʼulu tia suluʼu griego. Tü pütchikat «Alfa» shia tü palajatkat leetüra suluʼu griego otta «Omega» shia tü chiiruaajatkat leetüra.
^ «Hades» eesü sümünüle. Shia eere na outushiikana. Pünaʼla tia suluʼu tü kanüliakat «Jamaluʼulu pütchikat».
