Apocalipsis 5:1-14
5 Eejatü wanee rooyo najapuluʼu chi joyotushikai saaʼu tü einasee süpülajatkalü aluwatawaa, ashajünüsü süpüleeruajee jee süsapoʼujee tia rooyokot. Sulujutü shia tü najapü nikiakat, anasü maʼin shipekia tia rooyokot, akaratshisü shipekia.
2 Teʼrakalaka wanee aapiee pülashi emetutkai anüiki sünain maa: «¿Jarai keraaka süpüla ojutalaa tü rooyokot otta jarai keraaka süpüla naakatüin tü shipekiakat?».
3 Nnojotsü jaralüin ountuin ojutalüin tü rooyokot, nnojotsü jaralüin ountuin tia chaa sirumatuʼu, yaa mmapaʼa jee mmappünaa otta nnojotsü jaralüin ountuin eʼrüin tü kasa ashajünakat suluʼu tia rooyokot.
4 Taʼyalajaka maʼin sümaa mojuin taaʼin süka nnojolin jaralüin keraain süpüla ojutalaa tü rooyokot jee nnojotsü jaralüin keraain süpüla shiʼrüinjatüin tü ashajünakat suluʼu.
5 Anuupejeʼe nünüiki tamüin wanee naʼakajeejachi na laülaashiikana: «Keraasü piʼira. Akanajüshi chi León nülüinkai Judá, chi nüpüshikai David.* Nia ountaka ojutalaa tü rooyokot otta nia ountaka aakataa tü akaratshisükat shipekia».
6 Pasanain sünain tü einasee süpülajatkalü aluwatawaa, yala pasanain nanain na pienchishiikana aapiee jee naʼaka na laülaashiikana, teʼrüin wanee anneetchon shaʼwatüin, müshi aka nuʼutuushikai aaʼin. Akaratshisü nuʼuwa jee akaratshi noʼu. Tia noʼukot, nayaawase na akaratshishii meʼrujusalii nümaʼanajeejanakana Maleiwa, na aluwataanakana sainküinpünaa tü mmakat.
7 Nürütkaamaataka chi Anneetchonkai, naapaainjeseʼe tü rooyo sulujutkat tü najapü nikiakat chi yalajachikai joyotuin saaʼu tü einasee süpülajatkalü aluwatawaa.
8 Naapaapa chi Anneetchonkai tü rooyokot, nasapainkaka nümülatuʼu na pienchishiikana aapiee jee na piamakana shikii pienchimüin laülaashii. Eejatü wanee «arpa» najapuluʼu waneʼewai nakua otta eejatü iita aainjuushi süka ooro kaluʼukat tü wunuʼu aʼajuushi jemetakalü eejuu. Tia wunuʼu aʼajuushi jemetakalü eejuu, shiyaawase noʼuraajüin na aneekuushikana.
9 Neeʼirajakalaka wanee jayeechi jeketü, müsü mayaa: «Piaʼaya keraaka süpüla aapawaa türa rooyokot jee pia keraaka süpüla aakataa tü shipekiakat, jama piain oʼutuushin aaʼin. Sükajee amülain tü püshakat, müsü piyaʼlajakai saaʼin nümüin Maleiwa wayuu saʼakajeejatü eʼirukuukat süpüshuaʼa, naatayaa maka anüiki, sainküinjeejatü pueulo süpüshuaʼa jee sainküinjeejatü tü mmakat.
10 Püneeküin naya süpüla aluwatawaa jee süpüla sacerdoteinjanain naya, aʼyataainjana naya nümüin chi Wamaleiwasekai, aluwataweena naya saaʼu tü mmakat».
11 Eirakaashijeseʼe taya, taapakalaka nanüiki watta naalii aapiee süʼütpünaa tü einasee süpülajatkalü aluwatawaa, taapüinña nanüiki na pienchishiikana aapiee namaʼaleeya na laülaashiikana. Watta saalii miyoone naya.*
12 Emetutsü maʼin nanüiki sünain maa: «Chi Anneetchon oʼutunakai aaʼin nia keraaka süpüla pülainjachin, washirüinjachin, kekiinjachin, katsüinjachin, kojutuinjachin, nuʼwaajünüinjachin jee naapünüinjachin amüin kasa anasü».
13 Taapakalaka sünüiki süpüshuaʼa tü kasa eekai katüin soʼu, tü chakat sirumatuʼu, tü yaakat mmapaʼa, tü mmapüjatkat jee tü shirokukat palaa. Anuu tü pütchi sujuʼitirakat: «Anasü saapünüle kasa anasü nümüin chi joyotokoi saaʼu tü einasee süpülajatkalü aluwatawaa jee anasü saapünüle kasa anasü nümüin chi Anneetchonkai, anashii kojutule naya, anashii naʼwaajünüle jee anashii pülashiire maʼin naya süpüla kaʼikat süpüshuaʼa».
14 Nayasaʼa na pienchishiikana aapiee, «¡Amén!»* müshii. Nasapainkaka na laülaashiikana jee naʼwaajakalaka Maleiwa.
Noota
^ «Tü nuuralakat David» maluʼulu tia suluʼu griego.
^ «Miríadas de miríadas otta miles de miles» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
