Apocalipsis 6:1-17
-
Naakatüin chi Anneetchonkai aipiruasü shipekia tü rooyokot (1-17)
-
Niyamülüin nüʼünüü naaʼu wanee ama kasuutai (1, 2)
-
Mojujiraasü wayuu nutuma chi naajuchikai chi ama ishotoikai (3, 4)
-
Aisü jamü nutuma chi naajuchikai chi ama mütsiiyataikai (5, 6)
-
«Outaa» münüshi chi naajuchikai chi ama paaitaikai (7, 8)
-
Eʼnnüsü suupünaa tü aʼajüleekat nasha na wayuu oʼutuushikana aaʼin (9-11)
-
Emetutsü maʼin akutkujaain tü mmakat (12-17)
-
6 Teʼrüinjeseʼe chi Anneetchonkai sünain aakataa tü palajatkat shipekia tü rooyokot. «¡Puwateʼeran!» nümakalaka wane naʼakajee na pienchishiikana aapiee, emetutsü maʼin nünüiki, müsü aka saaʼin sütürüla juya.
2 Teʼrakalaka wanee ama kasuutai. Eejatka wanee jatü najapuluʼu chi amaajuchikai. Saapünakalaka nümüin wanee kotse, oʼunushijeseʼe nia sünain ayamülaa tü nüʼünüükalüirua, nükanajaleeka naya.
3 Naakatapa chi Anneetchonkai tü wane shipekiakat tü rooyokot, taapakalaka nünüiki chi wane aapieekai sünain maa: «¡Puwateʼeran!».
4 Nujuʼitaakalaka wanee ama ishotoi. Saapünakalaka shikii nümüin chi amaajuchikai mojujiraainjatüin wayuu nutuma saaʼu tü mmakat jee suʼuniraainjatüin saaʼin jee saapünakalaka nümüin wanee chajaruuta miyoʼu maʼin.
5 Naakatapa chi Anneetchonkai tü wane shipekiakat tü rooyokot, taapakalaka nünüiki chi wane aapieekai sünain maa: «¡Puwateʼeran!». Teʼrakalaka wanee ama mütsiiyatai, eejatkalaka wanee pesa najapuluʼu chi naajuchikai.
6 Taapakalaka wanee pütchi pasanainjee nanain na pienchishiikana aapiee sünain maa: «Wanee denario sülia tü waneekat kilo* trigo jee tü apünüinkat kilo cebada, wanee denario* sülia. Piisatta maʼin tü seita ayuʼluushikat sünainjee tü olivokot jee piisatta tü wiinokot».
7 Naakatapa chi Anneetchonkai tü wane shipekiakat tü rooyokot, taapakalaka nünüiki chi chiiruaajachikai aapiee sünain maa: «¡Puwateʼeran!».
8 Teʼrakalaka wanee ama paaitai.* «Outaa» münüshi chi naajuchikai jee sesü tü «Amuuyuukat»* nüchiiruajee. Süpaajaanaka tü mmakat suluʼu pienchin shiʼipa, saapünakalaka shikii namüin wanee saʼata tü mmakat. Tia süpülajatü noʼutuin saaʼin wayuu süka wanee chajaruuta miyoʼu, eeshii na outakana sutuma alin maʼin jamü namüin, eeshii na outakana sutuma wanee ayuulii outasiroʼu jee eeshii na outakana sutuma wüchii wünaʼapüjatü.
9 Naakatapa chi Anneetchonkai tü wane shipekiakat tü rooyokot, teʼrüin nasha na wayuu oʼutuushikana aaʼin sutuma noonooin sümaa nünüiki Maleiwa jee sutuma naküjain pütchi, teʼrüin tia nashakat suupünaa tü aʼajüleekat.
10 Anuukalaka nanüiki sümaa emetuluin maʼin shia: «Señotkalee, pia Laülaashikai saaʼu kasa süpüshuaʼa, pia wulekai akuwaʼipa jee pia chi shiimainshikai suluʼu Maleiwain, ¿joujeena süsalaka naainjala putuma na wayuu oʼutakana waaʼin?».
11 Saapünakalaka namüin wanee kuluulu miyoʼu maʼin sümaa kasuuin shia. Süküjünakalaka namüin neemeraainjanain sooʼomüin, kottaleepaʼaya naya namaa napüshuaʼa na achepchieekana wanaa namaa jee namaa na nawalayuukana. Na anaa jooluʼu oʼutunuinjanain aaʼin maʼaka noʼutunuin aaʼin nayakana.
12 Teʼrakalaka wanaa sümaa naakatüin chi Anneetchonkai tü wane shipekiakat tü rooyokot. Sukutkujaakalaka tü mmakat sümaa emetuluin maʼin shia, nipiʼyuushijaakalaka chi kaʼikai, mataashi nia maʼaka saaʼin wanee kuluulu eekai yuulin maʼin* jee müsia tü kashikat, eishojoosü maʼaka saaʼin tü ishakat.
13 Sujunuwaakalaka tü shüliwalakat mmapaʼamüin maʼaka sujutuuin tü higo iyayütkalia sünainjee sütüna wanee higuera sutuma wanee joutai eekai katchin maʼin.
14 Sukoʼoyojookoloko tü sirumatuʼukat maʼaka saaʼin sukoʼoyojoonüin wanee karaloʼuta, asünneʼennüsü tü uuchikat jee müsia tü mma pasanainkat sünain palaa, nnojoluitpa yalain eepuʼule shia.
15 Nayasaʼa na sülaülashiikana mma ounjulaashii suluʼu koʼushii jee süʼlatiraluʼu ipa uuchoʼu. Ounjulaashiʼiya na aluwataakana, na shikiipüʼükana surulaat, na washinnuukana, na wayuu kojutukana atumawaa, na achepchieekana jee napüshuaʼa na wayuu taashikana akuwaʼipa.
16 Anuukalaka nanüiki kojuyatua sümüin tü uuchikat jee sümüin tü ipakat: «Juunjula waya jee maa jiyaamaʼakai waaʼin nuulia chi joyotokoi saaʼu tü einasee süpülajatkalü aluwatawaa jee suulia nüʼürüla chi Anneetchonkai,
17 jama süntüitpain tü kaʼi naashichijaainjanakalü oʼu, ¿jaraleechi oʼttaaka süchikumüin tia?».
Noota
^ Jee shiale «tü waneekat litro». Pünaʼla tia suluʼu tü kanüliakat «Sooʼomüin pütchi B14».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
^ Jee niale «Atsaana».
^ «Hades» eesü sümünüle. Shia eere na outushiikana. Pünaʼla tia suluʼu tü kanüliakat «Jamaluʼulu pütchikat».
^ Eʼinünüsü tia kuluulu yuuisükat süka «soi kaaʼula».
