Apocalipsis 9:1-21
9 Niʼyalajiraka tü konneetakat chi wane aapieekai. Teʼrakalaka sujutuuin wanee shüliwala sirumatuʼujee yaa mmapaʼamüin jee saapünakalaka sümüin tü shüliwalakat shiyaawein tü ishi oʼutakat maʼin.*
2 Sujutannakalaka sutuma tü shüliwalakat tü ishi oʼutakat maʼin, sükalitkalaka sümüsain wanee kasa yala shiinaluʼujee tü ishikat, mataasü aka saaʼin sümüsain wanee siki. Nipiʼyuushijaaka chi kaʼikai sümaa sükojojooin sirumakat sutuma tü sümüsain ojuʼitaakat suluʼujee tü ishikat.
3 Sujuʼitaakalaka kaashapa saʼakajee tü sümüsainkat, ojuʼitaasü shia saaʼumüin tü mmakat, saapünaka laülawaa sümüin nutuma Maleiwa süpüla laülaainjatüin shia maʼaka laülaain tü jeʼyutkat saaʼu tü mmakat.
4 Süchiaanakalaka suulia shikajüin mojuui, wunuʼu eekai wüittüin jee wunuʼulia eekai eein saaʼu tü mmakat, naya müliainjanaka sutuma na wayuu nnojoliikana eʼitaanüin eʼipoʼunain nejeetse chi Maleiwakai.
5 Achiaanüsü tü kaashapakat süpüla nnojoluinjatüin müliain wayuu sutuma, ooʼulaanapejeʼe shia süpüla müliainjanain naya sutuma soʼu jaʼrai kashi. Müliashii maʼin naya sutuma maʼaka müliain wanee wayuu süʼletapa nia jeʼyulu.
6 Soʼu kaʼikat tia, süchajaajeerü akuwaʼipa wayuu outajatüin shia, nnojoleetpejeʼe shia outuin, suchuntaajeerü saaʼin outajatüin shia, nnojoleetpejeʼe alatüin tia.
7 Müsü sukuwaʼipa tü kaashapakat maʼaka sukuwaʼipa tü ama yapajakalü atumawaa süpüla atkawaa. Saaʼu shikii tü kaashapakat, eejatü wanee müsü aka saaʼin kotse aainjuushi süka ooro jee tü suʼupünaakat müsü aka saaʼin suʼupünaa wayuu.
8 Kaʼwalasü tü kaashapakat, mataasü aka saaʼin suʼwala jieyuu jee tü saikat müsü aka saaʼin sai león.
9 Eejatü wanee kachueera saaʼintoʼupünaakat, müsü aka saaʼin tü kachueera naaʼintoʼupünaakat wanee surulaat. Kepisanasü maʼin tü sütünakat, mataasü aka saaʼin shipisana tü kareeta sajaralajakalü ama sünain atkawaa.
10 Kepisü süsi tü kaashapakat, müsü aka saaʼin süsi jeʼyut, laülaasü shia saaʼu wayuu, jama müliain shia sutuma süka tü süsikat. Saaʼinrüin tia soʼu jaʼrai kashi.
11 Chi aluwataakai saaʼu tü kaashapakat, nia chi aapiee laülaakai saaʼu tü ishi oʼutakat maʼin. Abadón* nünülia suluʼu hebreo jee Apolión* münüshi suluʼu griego.
12 Alatüitpa tü palajatkat müliaa. Eeja jaaʼin, eejeerü piamasü sooʼomüin sülatapa tia.
13 Niʼyalajirakalaka chi wane aapieekai tü konneetakat. Taapakalaka wanee pütchi wanaapünaa sümaa tü makalü aka saaʼin suʼuwa paaʼa, tü eekat sünain tü aʼajüleekat wanee kasa nümüin Maleiwa aainjuushikat süka ooro, tü chakat nümülatuʼu Maleiwa.
14 Anuukalaka tü pütchi aküjünakat nümüin chi aapiee kamaʼanajachikai tü konneetakat: «Püjüta nachiki na pienchishiikana aapiee kapükana süʼütpaʼa tü süchi miyoʼukat maʼin kanüliakat Éufrates».
15 Najütünakalaka achiki na pienchishiikana aapiee süpüla noʼutuinjatüin saaʼin watta saalii wayuu,* eʼitaanatüjülia tü juyakat, tü kashikat, tü kaʼikat jee tü oora naainjainjatkalü oʼu tia.
16 Doscientos miyoone napüshuaʼa na surulaat amaajunakana, taapüin jeʼrashiin naya süküjünaiwaʼaya tia.
17 Anuu nakuwaʼipa na amaajunakana jee sukuwaʼipa tü ama neʼejenasükat: ishosü maʼin tü kachueera naaʼintoʼupünaajatkat jee wüittüsü shia maʼaka saaʼin tü kanüliakat «jacinto» jee mariiasü shia maʼaka saaʼin tü kanüliakat azufre, mataasü aka saaʼin shikii león shikii tü amakat jee ojuʼitüsü sikoʼu suwaraluʼujee, kaittüsü sümüsain wanee kasa jee ojuʼitüsü «azufre» suwaraluʼupünaa.
18 Watta naalii na wayuu* ajaʼttakana sutuma tia apünüinsükat kasa, ajaʼttüshii naya sutuma sikoʼu, sutuma tü sümüsainkat jee sutuma tü «azufre» ojuʼitakat suwaraluʼujee tü amakat.
19 Laülaasü tü amakat naaʼu na wayuukana, jama müliain maʼin naya sutuma süka tü kasa sujuʼitirakat suwaraluʼujee jee müliashii naya sutuma süka tü süsikat, mataasü aka saaʼin shikii wüi tü süsikat jee müliasü maʼin wayuu sutuma.
20 Na wayuu nnojoliikana outuin sutuma tia, nnojoishii naya ayaawajaain suulia tü kasa naaʼinrakat, ayatüshiʼiya neʼe naya aʼwaajüin yolujaa jee shiyaakua tü maleiwayaasü aainjuushikat süka ooro, pülaata, cobre, ipa jee müsia wunuʼu. Tia shiyaakuakat maleiwayaasü nnojotsü süpüla shiʼrüin wanee kasa, saapüin shia jee waraittüin shia.
21 Nnojoishii ayaawajaain suulia naainjala naya wayuukana, ayatüshii naya oʼutuin saaʼin wayuu, ayatüshii naya eeʼirajirüin ouutsü, ayatüshii naya aʼluwajiraain nakuwaʼipa* jee ayatüshiʼiya naya aʼluwajüin.
Noota
^ «Abismo» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ «Ajaʼttiraa» maluʼulu tia.
^ «Ajaʼttirüi» maluʼulu tia.
^ Apünüinsü shiʼipa wayuu atumawaa, suʼutunaka aaʼin wanee shiʼipa.
^ Apünüinsü shiʼipapaʼa wayuu atumawaa, sajaʼttinnaka wanee shiʼipa.
^ Pünaʼla tia suluʼu tü kanüliakat «Jamaluʼulu pütchikat».
