Tü nüshajalakat Mateo 7:1-29
-
PÜTCHI EKIRAJÜNAKA ANAIN SAAʼU WANEE UUCHI (1-27)
-
Juuʼulaa suulia ayoujaa wayuu (1-6)
-
Ayataʼaya juchuntuin, ayataʼaya jüchajaain, ayataʼaya jütaletüin (7-11)
-
Jaaʼinra kasa anasü sümüin wayuu maʼaka saaʼinneein jümüin (12)
-
Potton mouisükat (13, 14)
-
Jiyaawateerü aaʼu nakuwaʼipa sükajee tü naainjakat (15-23)
-
Akumajakai nipia saaʼu ipa, akumajakai nipia saaʼu mmashii (24-27)
-
-
Ponusü maʼin saaʼin wayuu tü nümakat Jesús (28, 29)
7 »Juuʼulaa suulia ayoujaa wayuu suulia jiyoujunuin.
2 Jiyoujale wayuu, ayoujuneena jiaya. Tü jaaʼinrakat sümüin wayuu shieeria neʼe tü aainjünakat jümüin.
3 ¿Jamüsü shiakaʼa piʼrüin tü yarüttüshii yalakat suluʼu noʼu chi puwalakai? ¿Jamakaʼa nnojotka piʼrüin tü wunuʼu suluʼukat poʼu?
4 ¿Jamataalainjachika süpüla pümüin nümüin chi puwalakai ‹icheʼe tayuʼlai türa yarüttüshii suluʼuka poʼu› sümaa yalain wanee wunuʼu juʼttuin suluʼu poʼu?
5 Wayuu piama oʼupünaachi pia. Shia anaka aluʼu piyuʼrule palajana tü wunuʼu juʼttakat suluʼu poʼu. Aneetkalaka pümüin ayuʼlaa tü yarüttüshii suluʼukat noʼu chi puwalakai.
6 »Nnojo jaapüin sümüin erü tü kasa nümaʼanajeejatkat Maleiwa. Nnojo jijitüin kaaʼürüla* sümüin tü püülükükalüirua süka süʼliikajeerüin saaʼu. Ouyantaa meeria shia jooʼomüin sümaa süsüʼüjiraain jia.
7 »Ayataʼaya juchuntuin, jüsülajüneenaka amüin, ayataʼaya jüchajaain jünteetka sünain tü jüchajaakalü achiki. Ayataʼaya jütaletüin miichoʼu, sujutanneetka jüpüleerua.
8 Nuchuntule wanee wayuu, aapüna amüinchi, nüchajaale süchiki wanee kasa, nünta anainrü, nütaletüle miichoʼu, ojutanna apüleeruachi.
9 Nujulijüle pan wanee jüchon jaaʼu, ¿aashin nnojoleerüin jüsülajüin wanee ipa nümüin?
10 Nujulijüle jime wanee jüchon jaaʼu, ¿aashin nnojoleerüin jüsülajüin wanee wüi nümüin?
11 Asülajawaishii jia kasa anasü namüin na jüchonniikana eerejeʼe wayuuin mojulaashii jia. Nieemataka nnojolin aapeematüin jümüin chi Jüshi iipünaajachikai kasa anasü juchuntule shia nümüin.
12 »Jaaʼinra kasa anasü sümüin wayuu maʼaka saaʼinneein jümüin. Tia shia tü aluwataanakalü anain suluʼu tü Pütchi Aapünakat nümüin Moisés* otta tü namakat na Nünüikimaajanakana Maleiwa.
13 »Jikeroto suluʼupünaa tü potton mouisükat, watta naalii na ekerotokana suluʼupünaa tü potton jerutsükat jee watta naalii na oʼunakana suluʼupünaa tü wopu jerutsükat, tü kaluʼukalü outaa.
14 Mouipejeʼe tü potton jee tü wopu kaluʼukat kataa oʼuu. Nnojoishii jeʼrashiin na oʼunakana suluʼupünaa.
15 »Jalia jia naaʼin na nünüikimaajanayaakana Maleiwa, mayaashii naya maʼaka saaʼin anneerü. Mapajeʼe naya maʼaka saaʼin erü simoluuna.
16 Jiyaawateerü aaʼu nakuwaʼipa sükajee tü kasa naainjakat. Tü uuwakat nnojotsü atpajünüin sünainjee wanee wunuʼu keipüsesü. Akaataajaʼa tü higokat nnojotsü atpajünüin sünainjee manna ¿aashi müin?
17 Tü wunuʼu eekai anain anasü tü süchonkat. Eekajaʼa tü wunuʼu eekai mojuin mojusü tü süchonkat.
18 Tü wunuʼu eekai anain nnojotsü süpüla mojuin süchon. Akaajasaʼa tü wunuʼu eekai mojuin nnojotsü süpüla anain süchon.
19 Tü wunuʼu nnojotkalü anain achon ashottünüsü, ojutuna müsia soʼu siki.
20 Jütüjaajeerü aaʼu jaraliin naya wayuukana sükajee tü kasa naaʼinrakat.
21 »Mayaashiijeʼe ‹Señotkalee› namüin tamüin noʼutku na wayuukana, nnojoleerü neʼrüin tü kasa anasü eejeetkat nuluwataapeena Maleiwa chejee iipünaajee. Nayeena eʼraka tia na wayuu oonookana sümaa nünüiki chi Tashi iipünaajachikai.
22 Eejeerü wanee kaʼi eere sümeerüin wayuu tamüin: ‹Señotkalee, ¿aashin pünüikimaajanain waya, wayuʼluin yolujaa süleʼeruʼujee wayuu sükajee pünülia jee waainjain kasa pülasü pünülialuʼu?›.
23 Tameechika namüin: ‹Nnojoishii teʼraajüin jia. Anashii juʼunule toulia jia aainjakana kasa mojusü›.
24 »Chi wayuu aapakai tü tamakat sümaa naaʼinrüin shia, meechi nia maʼaka naaʼin chi wayuu kekiikai maʼin akumajakai nipia saaʼu ipa.
25 Aʼita müsia tü juyakat sümaa miyoʼuin maʼin sainña. Emetutsü maʼin tü joutaikat sooʼomüin tü miichikat. Nnojotpejeʼe shia ojuttuin süka sukumajuushin sümünoʼu wutai.
26 Akaajasaʼa chi aapakai neʼe tü tamakat sümaa nnojoluin naaʼinrüin shia, müshi aka naaʼin chi wayuu mayaawatüinkai saaʼu nukuwaʼipa akumajakai neʼe nipia saaʼu mmashii.
27 Aʼita müsia tü juyakat sümaa miyoʼuin maʼin sainña. Emetutsü maʼin tü joutaikat sooʼomüin tü miichikat. Ojutta müsüjaʼa shia sutuma».
28 Ponusü maʼin saaʼin wayuu tü nümakat Jesús kettaapa nünüiki,
29 süka nayaawatüin saaʼu niʼitaaushin nutuma Maleiwa süpüla ekirajaa. Nnojoishi müin nia maʼaka naaʼin na karaloʼutamaajanakana.
Noota
^ «Perlas» maluʼulu tia alijunaikiruʼu.
^ Pünaʼla tia suluʼu tü kanüliakat «Jamaluʼulu pütchikat».
