Karaloʼuta namüinjatka na chajanakana Roma 16:1-27
-
Nüjütüin Pablo Febe, wanee wawala aʼyataakat nümüin Maleiwa (1, 2)
-
Nüsaküin Pablo na anoujashii chajanakana Roma (3-16)
-
Eejüinjatü naaʼin na anoujashiikana noulia na nnojoliikana paaʼinwain atuma wayuu (17-20)
-
Asakünüshii na anoujashiikana natuma na aʼyataajiraakana nümaa Pablo (21-24)
-
Atüjaanüitpa aaʼu tü kasa nütüjaakalü aaʼu Maleiwa (25-27)
16 Ichaairü tajütüin Febe jümüin, wanee wawala aʼyataaka maʼin napüleerua na wawalayuukana chaa Cencreas.
2 Anashii kamaneere jia sümüin maʼaka kamaneein jia namüin na juwalayuukana, jama sunoujiraain wanaa jümaa, jaapa sümüin tü kasa eekai choʼujaain sümüin. Watta naalii na anoujashii sükaalinjakana, jaʼitakajeʼe neʼe tayakai sükaalinjain taya.
3 Jüsaka tamüin Prisca otta müshia Áquila, aʼyataajiraashii naya wanaa tamaa nümüin Cristo Jesús.
4 Oʼutunataainnejeʼe aaʼin naya taaʼujee, taapakalaka analuʼut namüin saaʼujee tü kasa naaʼinrakat tapüleerua jee naapüinña analuʼut na anoujashii nnojoliikana judíoin.
5 Jüsaka tamüin na anoujashii chakana outkajaain shipialuʼu Prisca nümaa Áquila. Jüsakaleejeechia tamüin Epéneto, chi tawala aikai tapüla, napüshi nia na palajanakana oushikajaain süchiirua nukuwaʼipa Cristo chaa Asia.*
6 Jüsaka tamüin María, aʼyataasü maʼin shia jüpüleerua.
7 Jüsaka tamüin Andrónico otta müshia Junias, kasayuuinna tanain na makana. Püreesapuʼushii naya wanaa tamaa, eʼraajünüshii maʼin naya natuma na aluwataaushikana otta anoujatüjüliʼiya naya tapüleerua nünain Cristo.
8 Jüsaka tamüin Ampliato, chi taʼaleewain aikai tapüla, anoujashi nia wanaa tamaa nünain chi Señotkai.
9 Jüsaka tamüin Urbano, aʼyataajiraashi nia wanaa wamaa nümüin Cristo otta jüsaka tamüin Estaquis, chi taʼaleewain aikai tapüla.
10 Jüsaka tamüin Apeles, talatüshi maʼin Cristo nümaa. Jüsaka tamüin napüshuaʼa na chakana nipialuʼu Aristóbulo.
11 Jüsaka tamüin Herodión, kasaichi nia tanain. Jüsaka tamüin na chakana nipialuʼu Narciso, na anoujakana nünain chi Señotkai.
12 Jüsaka tamüin Trifena otta Trifosa, aʼyataashii maʼin naya nümüin chi Señotkai. Jüsaka tamüin Pérsida, aisü maʼin shia wapüla, jama shiʼyataain maʼin nümüin chi Señotkai.
13 Jüsaka tamüin Rufo, chi aneekuushikai nutuma chi Señotkai. Jüsaka tamüin tü niikat, tü makalü aka saaʼin tei tamüin.
14 Jüsaka tamüin Asíncrito, Flegonte, Hermes, Patrobas, Hermas otta müshiʼiya na wawalayuu chakana namaa.
15 Jüsaka tamüin Filólogo, Julia, Nereo otta müsia tü nuwalakat. Jüsaka tamüin Olimpas namaʼaleeya napüshuaʼa na anoujashii chakana namaa.
16 Kamaneejiraa jia jüsakapa napüshuaʼa na juwalayuukana, asakünüshii jia natuma napüshuaʼa na anoujashiikana nünain Cristo.
17 Tawalayuwaa, tachuntuin maʼin jümüin eejüinjatüin jaaʼin noulia na nnojoliikana paaʼinwain atuma wayuu, na ataʼülakana sukuwaʼipa tü ekirajünakalü anain jia, anashii wattaluʼule jia noulia.
18 Naya wayuukana nnojoishii aʼyataain nümüin Cristo chi Waseñotsekai, shia neʼe naaʼinraka tü kasa suchuntaakat naaʼin. Nemeejüin wayuu sükajee tü namakat jee anayaasü neʼe nanüiki.
19 Saapa achikit wayuu maʼleekalia joonooin sümaa tü nümakat chi Maleiwakai, talatakalaka taaʼin sünainjee tia. Anashii kekiire jia jiyaawateetkalaka saaʼu tü anakat süpüla jaaʼinrüin otta nnojoluinjatü kasajatüin jümüin wanee kasa eekai mojuin.
20 Soʼu palit kaʼi meechi nuchuwerajaanakai aaʼin Satanás nutuma chi Maleiwa aapakai jimataa aaʼin sümüin wayuu, meechi juuʼuipalakai naaʼin nutuma. Kasataalejeseʼe kamaneein jümüin chi Waseñotsekai Jesús.
21 Nüsaküin jia Timoteo, chi aʼyataajiraakai tamaa. Nüsaküin jia Lucio, Jasón otta müshia Sosípatro, kasayuuinna tanain na makana.
22 Tashajala karaloʼutakat tüü tayakai Tercio, tasaküin jia süka junoujiraain tamaa nünain chi Señotkai.
23 Nüsaküin jia Gayo, chi tantawaikai amaʼanamüin, chi noutkajaʼawaikai epialuʼu na wawalayuukana. Nüsaküin jia Erasto, chi kajapuluʼukai sünneetse tü pueulokot otta nüsaküinña jia Cuarto, chi nuwalakai.
24 *
25 Katchinjeerü jaaʼin nutuma chi Maleiwakai sükajee tü pütchi anasü taküjakat jümüin jee sükajee tü pütchi aküjünakat nüchiki Jesucristo. Watüjaaitpa aaʼu tia süka wayaawatüitpain saaʼu tü kasa nütüjaakalü aaʼu Maleiwa, tü nnojotpuʼukat atüjaanüin aaʼu.
26 Wayaawata aaʼu tia sünainjee tü pütchi nashajakat na nünüikimaajanakana Maleiwa. Nüküjirüin tia chi Maleiwa katakai oʼu süpüla kaʼikat süpüshuaʼa, nüküjirüin tia süpüla sunoujainjatüin wayuu nünain otta süpüla soonooinjatüin sümaa tü nümakat.
27 Nia neʼe Maleiwa kekiikai maʼin nümüiwaʼa, kasataalejeseʼe kojutuin nia süpüla kaʼikat süpüshuaʼa nükajee Jesucristo. Amén.*
Noota
^ Pünaʼla tia suluʼu tü kanüliakat «Jamaluʼulu pütchikat».
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
^ Pünaʼla tia suluʼu tü kanüliakat «Jamaluʼulu pütchikat».
