Karaloʼuta nümüinjatka Tito 1:1-16
1 Karaloʼutakat tüü tashajala tayakai Pablo, nüchepchia taya Maleiwa jee aluwataaushi taya nutuma Jesucristo, tü tanoulakat sümaʼaleeya tü taʼyataainkat pansaasü sümaa tü nanoulakat na aneekuushikana nutuma Maleiwa jee pansaasü shia sümaa tü pütchi shiimainkat, tü pansaakat sümaa aʼwaajaa Maleiwa.
2 Tia sünainjeejatü wanoujain sünain katüinjatüin woʼu süpüla kaʼikat süpüshuaʼa, tü nüküjatüjütkalia achiki sümaiwa paala chi Maleiwakai, chi matüjainkai aküjaa alawaa.
3 Nüküjirüin Maleiwa tü nünüikikat soʼu tü kaʼi keraakalü oʼu sükalia, aluwataanüshi taya sünain aküjaa tia pütchikat nutuma Maleiwa, chi Oʼtteʼerakai waya.
4 Karaloʼutakat tüü nümüinjatü Tito, müshi nia maʼaka naaʼin wanee tachon tamüin sünain tü wanoujiraakalü anain:
Kasataalejeseʼe kamaneein pümüin chi Washikai Maleiwa jee jimatüin paaʼin nutuma jee nutuma Cristo Jesús, chi Oʼtteʼerakai waya.
5 Tapütüin pia Creta süpüla punoutajatüin tü kasa mojusü alatakat chayaa jee süpüla püneeküinjanain na laülaashiikana napüleerua na anoujashiikana suluʼu waneʼewai sukua tü pueulokalüirua, paaʼinrajatü tia wanaapünaa sümaa tü taluwataakalü anain pia.
6 Chi laülaashikai napüleerua na anoujashiikana nnojotsü naaʼinrajatüin wane kasa mojuinjatka anainjee pütchi nüchiki, waneesüinjatü nuʼwayuuse, anoujainjana nüchonnii, nnojotsü maaʼinñaainjatüin naaʼin na nüchonniikana jee nnojoishii naya eʼrüliinjanain wayumüin.
7 Chi laülaashikai napüleerua na anoujashiikana nnojotsü naaʼinrajatüin wanee kasa mojukalü anainjee pütchi nüchiki, jama sülaülajanain nia tü aʼyatawaakat nümüin Maleiwa, nnojoishi nia macheʼinjachin süchiirua wanee kasa, nnojoishi nia aashichijaamaatüinjachin, nnojoishi nia epeʼrülinjachin, nnojoishi kataʼaralinjachin nia otta nnojotsü kachiiruainjatüin naaʼin washirüü jee akanajaa nneerü.
8 Kapülainjatü naaʼin nakuwaʼipa na waneinnua, aaʼinrajachi wanee kasa eekai anain, laülaainjatü naaʼin, lotuinjatü nukuwaʼipa, niainjachi nuʼwaajaka Maleiwa jee atüjainjachi nia achecheraa naaʼin.
9 Jüüjüüinjachi nia sümüin tü pütchi shiimainkat, wanaapünaa sümaa tü nikirajakalü anain, nükatsüinreetka naaʼin na waneinnua sükajee tü pütchi anasü ekirajünakalü anain jee nüchiaainjana na wayuu aküjakana mojuin tia pütchikat.
10 Watta naalii na wayuu eʼrüliikana wayumüin, naya makana maʼin akuwaʼipa na ichekana süchiirua nüchoteʼerajatüin süta nukorolo wanee wayuu. Aashajaashii neʼe naya süpaʼa mma otta emeejülii neʼe naya wayuu.
11 Püma namüin naya wayuukana nooʼulaaiwa suulia naashajaakuʼu namüin, namalajeʼerüin neʼe nanoula na anoujashiikana sümaʼaleeya napüshi, jama nekirajüin sünain wanee kasa eekai nnojoluin pansaain jee kachiiruasü naaʼin washirüü jee akanajaa nneerü.
12 Eeshi wanee wayuu naʼakajeejachi aküjakai süchiki tü kasa alatajatkat, anuu nünüiki nachiki: «Wayuu alaayuu neʼe na chajanakana Creta, müshii aka saaʼin wüchii jashichi, koʼutunashii naya jee shokulashii neʼe».
13 Nnojotsü alawaain tia pütchikat, müshiijeseʼe püchiaainjanain naya süpüla anainjatüin tü nanoulakat.
14 Nnojo kacheʼejüin jia sümüin tü alawaa nekirajakalü anain na judíokana jee tü naluwataakalü anain na wayuu ooʼulaakana suulia oonowaa sümaa tü pütchi shiimainkat.
15 Anasü kasa süpüshuaʼa namüin na wayuu anakana akuwaʼipa noʼuluʼu Maleiwa. Eekajasaʼa na wayuu nnojoliikana anain akuwaʼipa noʼuluʼu Maleiwa otta na manoulakana, nnojotsü kasain anain namüin, jama yarüttüin tü suluʼukat nekii jee tü suluʼukat naaʼin.
16 Naküjain suʼupala wayuu neʼraajüin chi Maleiwakai, atüjaanapejeʼe saaʼu sükajee nakuwaʼipa nayoutuin süchiki tü nümakat, jama nülerajüin naya Maleiwa, nnojoishii naya oonooin sümaa nünüiki jee nnojotsü anain nakuwaʼipa noʼuluʼu Maleiwa süpüla naaʼinrüin wanee kasa eekai anain.
