Sünain tü pütchi wekirajaaitpakalü anain, wekirajaa anainrü tü nümakat Jesuu süchiki tü alatajatkat nüikaleʼerapa Maleiwa tü Nuluwataayakat. Ekeraajüitpa tia pütchikat otta nia Jesukürisüto chi nüneekakai Maleiwa süpüla aluwatawaa.

Saashin tü Wiwüliakat nuʼttaiwaʼaya Jesuu sünain aluwatawaa nüjütüin Satanaa otta tü yolujaa nümaajatkalüirua chejee iipünaajee. Yaainnapa naya yaa saaʼu tü Mmakat, müsüjeseʼe sumojujaain maʼin tü mmapaʼakat soʼujee 1914 (Alateetkat Mapeena 12:7, 9).

Mayaapejeʼe sumojujaain maʼin tü mmapaʼakat, watta saalii kasa anasü naaʼinrakat Jesuu süpüleerua wayuu. Ekeraajüsü maaʼulu tü sümakat tü Wiwüliakat süchiki shikirajünüinjatüin wayuu sainküin tü Mmakat. Shiasaʼa sünainjee tia, watta naalii wayuu atüjaakana süpüleerua tü Wiwüliakat jee oonookana sümaa tü sümakat (Isaías 2:2-4). Nnojotsü shiain naaʼinmaain maʼin tü naʼyataainkat suulialeʼeya nakuwaʼipa nümaa Maleiwa jee suulialeʼeya waneirua kasa. Anasü nakuwaʼipa sümaa naʼwayuuse otta nachonnii otta nnojotsü kachiiruain naaʼin kamaʼanaa wainma korolo.  Eʼrüshii naya kasa anasü sutuma tü sümakat tü Wiwüliakat otta ekirajünüshii naya süpüla nayainjanain na wayuu nuluwataakana aaʼu Maleiwa.

Chashi Jesuu aluwataain chaa iipünaa nutuma Maleiwa, akanasaʼa na wayuukana, ayatayülia naya aluwataain saaʼu tü Mmakat. Anuu nünüiki Maleiwa nümüin Jesuu: «Puluwataa naʼakapünaa na püʼünüükana» (Salmo 110:2). Alüʼütsü maʼin sükalia süpüla najaʼlajeʼerüin Jesuu napüshuaʼa na nüʼünüükana otta nunouteʼereerü süpüshuaʼa tü kasa müliakalü atuma naaʼin na wayuu oonookana sümaa nünüiki Maleiwa.

Anuu tü naaʼinrajatkat Maleiwa sükajee nuluwataaya:

• Najaʼttireerü tü iküleesia ekirajakalü alawaa. Saashin tü Wiwüliakat, tü iküleesia ekirajakalü alawaa müsü aka saaʼin wanee wayuu maaʼinsat otta alüʼütsü süpüla sajaʼlajeʼennüin. Ajaʼttajatü tü iküleesiairua ekirajakalü alawaa nüchiki Maleiwa otta amojujaaka sukuwaʼipa wayuu. Ainkeerü neʼe saaʼin wayuu sajaʼttinnapa (Alateetkat Mapeena 17:15, 16).

• Najaʼttireerü suluwataaya wayuu. Sükajee tü Nuluwataayakat Maleiwa najaʼttireerü süpüshuaʼa suluwataaya wayuu (Alateetkat Mapeena 19:15, 17, 18).

• Najaʼttireena na mojulaashiikana. ¿Kaseetka alatüin namüin na ichekana süchiirua aaʼinraa kasa mojusü otta na nnojoliikana oonooin sümaa nünüiki Maleiwa? «Na mojulaashiikana, ajaʼlajeʼennüinjana saaʼujee tü mmakat» saashin tü Wiwüliakat (Proverbios 2:22).

• Najaʼttireechi Satanaa otta tü Yolujaakalüirua. Nnojoleerü eʼikeʼennüin wayuu nutuma Satanaa jee sutuma tü yolujaakalüirua (Alateetkat Mapeena 20:3, 10).

¿Jameetka nakuwaʼipa na wayuu achekakana niain Maleiwa aluwataain naaʼu?

Wainmaleejeeria kasa anasü naaʼinreetkat Jesuu süpüleerua wayuu chejee iipünaajee suulialeʼeya tü naaʼinrakat na sülaülashiikana mma. Akaʼaya nia, akaalinjüneechi natuma 144.000 aluwataalii nüneekaka Maleiwa saʼakajee tü wayuukalüirua (Alateetkat Mapeena 5:9, 10; 14:1, 3). Aʼyataainjachi nia süchiirua saainjünüin tü keeʼireekat naaʼin Maleiwa yaa mmapaʼa. ¿Kasa maa naaʼinreetka Maleiwa süpüleerua wayuu?

• Najaʼttireerü tü ayuuliikat jee tü outaakat. «Müiria nnojoluin outaa» otta «nnojoleechi eein wanee wayuu eekai ‹ayuuishi taya› nümeechin» (Isaías 33:24; Alateetkat Mapeena 21:4).

• Eejeerü anaa akuwaʼipa otta jimata aaʼin. «Eʼreena maʼin jimata aaʼin na püchonniikana» otta «shiimain maʼin nojoyoloweenain suupünaa suuʼulia uuwa otta higuera, nnojoleena eimmolojünüin» (Isaías 54:13; Miqueas 4:4).

• Anashaateerü maʼin shiʼyataain wayuu. «Talateerü naaʼin sünain aʼyatawaa na wayuu taneekajalakana. Nnojoleerü kasain nashapajaain achiirua» (Isaías 65:22, 23).

• Aneerü maʼin tü Mmakat. «Wüittuuijeerü otta kasiijeerü maʼin wunuʼulia süpaʼapünaa tü anouishiikat otta tü isashiipaʼakat maʼaka kasiin tü kanüliakat azafrán» (Isaías 35:1).

• Nikirajeerü wayuu süpüla eeinjanain naya waneepia. «Kateerü noʼu waneepia chi wayuu eekai niʼraajüin pia, chi waneeshikai sünain Maleiwain otta chi wayuu eekai niʼraajüin Jesukürisüto, chi püjünalakai» (Juan 17:3, TNM).

Keeʼireeshaatasü naaʼin Maleiwa piʼrüinjatüin tü kasa anasü naaʼinrajatkat (Isaías 48:18). Sünain tü wane ekirajaayakat, wekirajaajeerü anain tü waaʼinrajatkat süpüla weʼrüin tü anaa eeinjatkat nutuma Maleiwa.