Pütüjaaitpa aaʼu eein süpüla piʼraajüin Maleiwa. Süküjain tü Wiwüliakat Jehová nünülia otta aipüralin maʼin nia. Paashajeʼerüitpa süchiki tü kasa naaʼinrakat süpüleerua wayuu otta süchiki tü kasa naaʼinrajateetkat. Eepejeʼe sooʼomüin tü kasa paaʼinrajatkat süpüla piʼraajüin Maleiwa, «¿shiimainchejeʼe choʼujaain teʼraajüin nia?», eesüjaʼa müle paaʼin.

Naashin Jehová arütkaajeechi nia pünainmüin müleka pürütkaale nünainmüin (1 Crónicas 28:9). Püchajaale maʼin sukuwaʼipa süpüla piʼraajüin Maleiwa, aleeweechi maʼin pia nümaa (Salmo 25:14). ¿Kasa anasü piʼreetka aleewale pia nümaa?

Talateerü maʼin paaʼin. Nia Jehová chi Maleiwa talatakai aaʼin saashin tü Wiwüliakat (1 Timoteo 1:11, TNM). Talateerü maʼin paaʼin, nnojoleechi pia ayuulin otta aneerü paaʼin pürütkaale nünainmüin Maleiwa otta püshatüle maʼin nukuwaʼipa (Salmo 33:12). Nnojoleerü paaʼinrüin tü kasa mojeetkalü atuma pukuwaʼipa, piisatteerü pukuwaʼipa jee anajiraajeechi pia namaa na waneinnua. Wanaaweerü paaʼin nümaa chi ashajakai Salmos, anuu nünüiki: «Kamalainsü tamüin arütkawaa nünainmüin Maleiwa» (Salmo 73:28).

Naaʼinmajeechi pia Maleiwa. Anuu tü nümakat Jehová namüin na wayuu aleewakana nümaa: «Tachiajaajeechi pia sümaa jülüjain pia taaʼin» (Salmo 32:8). Sünainjee tia pütchikat, wayaawata aaʼu naaʼinmajüin Jehová waneʼewai nakua na wayuu aʼyataakana nümüin otta naapüin tü choʼujaakat namüin (Salmo 139:1, 2). Aleewale pia nümaa Jehová, piʼitaajeerü maʼin paaʼin sünain nükaalinjeechin pia.

Aneerü pukuwaʼipa watta kaʼi. Nükaalinjain pia Jehová süpüla talatüin paaʼin maaʼulu, analeejeetpejeʼe pukuwaʼipa nutuma watta kaʼi (Isaías 48:17, 18). Anuu tü sümakat tü Wiwüliakat: «Kateerü noʼu waneepia chi wayuu ekirajaakai waneepia püchiki piakai chi Maleiwa shiimainshikai otta nüchiki Jesukürisüto, chi püjünalakai» (Juan 17:3, TNM). Tü kasa anasü waʼatapajakat nutuma Jehová müsü aka saaʼin tü karapin ajapuluʼujakat wanee anua, sajapuluʼujain waaʼin suulia wakayalaain nuulia Maleiwa (Hebreokana 6:19, 20).

Tü paashajeʼerüitpakat, shia neʼe süpüshi tü kasa anasü eekat sünainjee piʼraajüin Maleiwa otta aleewain pia nümaa. Pütüjeere sooʼomüin süchiki tia, paashajaa nümaa wanee Aküjai pütchi jee pünaʼla suluʼu jw.org.