SHALÜʼÜTÜSÜ SUKUA LUCÍA. Motsoyüluiwaʼaya shia, oʼttüsü wanee ayuulii sünain, poliomielitis sünülia tia ayuuliikat. Kalataarat tia ayuuliikat sünainmüin wayuu otta shia saapaaka tü kanüliakat sistema nervioso. Soʼu 16 suuyase Lucía, müsü tü sülaamainkat sümüin: «Shalüʼütüsü pukua sünainjee süsalain pia paainjala nutuma Maleiwa, süka moonooloin pia jee mojutuin püi pümüin». Ayatayülia sotuin saaʼin Lucía sünüiki tia wayuukot süka alin maʼin shia sümüin.

SÜNTÜNAPA ANAIN WANEE TUMOR SÜNAIN SHIKII DÁMARIS, müshi chi süshikai sümüin: «Eesü tü paaʼinrakat makaʼa süsalain pia nutuma Maleiwa». Mojusü maʼin saaʼin Dámaris sünainjee tia.

Kakaliairü maʼin anoujünüin anain ayuulin wayuu sünainjee süsalain saainjala nutuma Maleiwa. Naashin na wayuukana nükalioʼu Jesuu, ayuuishii naya sünainjee naainjala jee shiale sünainjee naainjala napüshi (Usos y costumbres de las tierras bíblicas). Saashin wanee karaloʼuta, suʼunnaa tü Edad Media münakat, sunoujain wayuu jouluin maʼin ayuulii nutuma Maleiwa süka süsalain naya naainjala nutuma (Medieval Medicine and the Plague). Müle shia, ¿niaka Maleiwa kasirüin tü wayuuirua oʼuwoʼutkat sutuma tü ayuulii eejatkat chaa Europa soʼu tü juyakat 1300? ¿Eejaataapa neʼe ayuuliikat sutuma wanee bacteria maʼaka namüin na cientiificokana? ¿Eeyütche wayuu eekai sunoujain ayuulin wayuu nutuma Maleiwa süka süsalain naya naainjala nutuma? *

JÜLÜJA PAAʼIN TÜÜ: Shiimainrejeʼe ayuulin wayuu sümaiwa paala nutuma Maleiwa süpüla süsalain shia saainjala, ¿jamakaʼa niiyajaka Jesuu na ayuuikana? ¿Mojushiisüche nümüin Jesuu tü naaʼinrakat Maleiwa? (Mateo 4:23, 24). Nnojo, jama paaʼinwajiraain maʼin nia nümaa Maleiwa, müshijeseʼe nümüin: «Taaʼinrüin weinshi tü kasa talatakat atuma naaʼin». Otta müshi nia: «Taaʼinrüin tü nuluwataakalü anain taya» (Juan 8:29; 14:31, TNM).

Müsü tü Wiwüliakat nüchiki Maleiwa: «Matüjainsai nia aainjaa kasa mojusü, lotusü nukuwaʼipa» (Deuteronomio 32:4). Jamüshijaʼa Maleiwa, nnojoleerü nujutirüin wanee katünasü sümaa watta saalii wayuu süpüla süsalainjachin naainjala waneeshia neʼe wayuu naʼakajee. Anuujeseʼe nünüiki Abraham, wanee wayuu nümaiwajachi jüüjüükai waneepia nümüin Maleiwa: «Nnojoleerü puʼutirüin aaʼin wayuu eekai anamiain wanaa namaa na mojulaashiikana» (Génesis 18:23, 25). Jee müsü tü Wiwüliakat: «Nnojorüleejaʼa süpüla naaʼinrüinjatüin chi Maleiwa shiimainshikai wanee kasa mojusü» (Job 34:10-12).

Müliale waya nnojotsü shiain sünainjee süsalain waya waainjala nutuma Maleiwa. Nüküjain Jesuu tia wanaa sümaa nüntiraain nümaa wanee wayuu jemeishitüjüika sümaa moʼuin. Müshii na nikirajüinkana: «¿Jamüshi jemeikaʼa nia sümaa moʼuin? ¿Saaliijeejachi naainjala, nayataapa kaainjaloʼuin na kachoinkana?». Nümaka Jesuu: «Nnojoishi saaliijeejachin naainjala je saaliijeejachin naainjala na kachoinkana. Shia neʼe süpüla shiʼrüinjatüin wayuu wainma tü kasa anasü naaʼinreekat Maleiwa nüka» (Juan 9:1-3).

Ponokajasaʼa maʼin naaʼin na nikirajüinkana Jesuu tü nümakat süchiki nnojoluin moʼupaʼain chia wayuukai saaliijee naainjala jee naainjala na kachonniikana nia, jama naatain tü sunoujakalü anain wayuu soʼu tia. Koʼupa chia wayuukai nutuma Jesuu  atüjaana aaʼu alawaain tü sunoujakalü anain wayuu süchiki müliain naya nutuma Maleiwa saaliijee naainjala (Juan 9:6, 7). Amülialaasü naaʼin na wayuu kanainkana ayuulii eekai mepin nayaawatapa saaʼu nnojoluin niain Maleiwa kasirüin tü namülialakat.

Tü sümakat tü Wiwüliakat:

• «Matüjüinsai Maleiwa aainjaa kasa mojusü. Otta matüjüinsai nia müliaa atuma wayuu» (SANTIAGO 1:13, TNM). Alüʼütsü süpüla najaʼttirüin Maleiwa tü kasa mojusü kakaliaitkat müliain maʼin atuma wayuu maʼaka saaʼin tü ayuuliikat jee tü outaakat.

• «Niiyajüin [Jesuu] tü ayuuisükalüirua» (MATEO 8:16). Sükajee tü naaʼinrakat Jesuu süpüleerua wayuu soʼu yaajachin nia yaa mmapaʼa, wayaawataa aaʼu aneerüin wayuu süpüshuaʼa sutuma Nuluwataaya Maleiwa.

• «Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia» (ALATEETKAT MAPEENA [APOCALIPSIS] 21:3-5).

Nnojoirejeʼe niain Maleiwa kasirüin tü müliaa weʼrakat, ¿jaratka kasirüin shia? ¿Jamaka joutka maʼin müliaa? Kakaliairü maʼin süsakirüin anain tia wayuu. Pütüjaajeerü aaʼu tia, paashajeʼerüle tü wane pütchikat.