«Nnojo jüshapajaain aaʼin saaʼu tü alateetkat mapeena, süka wainmeerüin tü kasa jülüjüinjatkat jaaʼin mapeena» (MATEO 6:34).

¿Jamaluʼulu tia? Jiwaʼatawaisü waaʼin weinshi sutuma tü alatakat wamüin. Nnojotpejeʼe anain jülüjakuʼu müle paaʼin tü kasa alatajatkat waneemüin kaʼi, süka jiwaʼateerüin maʼin paaʼin. Nnojo süshapataain paaʼin sutuma tü kasa nnojoyütkalü alatüin.

•   Ashapataasü waaʼin sünainjee jiwaʼatüin waaʼin. Anasü paaʼinrüle tüü: piyaawata saaʼu eein tü kasa ashapataakalü atuma paaʼin. Kooʼomüinjeerü maʼin pümüin tia sutuma jülüjakuʼu müin paaʼin kasa eekai sülatajatüin. Tü wane kasa soteekat paaʼin shia eein süpüla anain wanee kasa jaʼitasü mojuinjatiaain paaʼinruʼu.

«Chi eekai kekiin nutuma chi Maleiwakai, [...] nnojoishi aaʼinreein kasa iseetka nüchiki» (SANTIAGO 3:17, TNM).

¿Jamaluʼulu tia? Nnojo macheʼein pia süchiirua anashaatainjatüin sukuwaʼipa wanee kasa. Nnojo paaʼinreein wanee kasa iseetka püchiki jee iseetka nachiki na waneinnua.

•   Piyaawata saaʼu kasain isain püchiki, shia paaʼinra kasa eekai puunteerüin, soto paaʼin kasain pütüjain apüleerua otta kasain natüjain apüleerua na waneinnua. Paaʼinrüle tia, nnojoleerü ashapataain maʼin paaʼin, akaʼaya na waneinnua otta aneerü maʼin pukuwaʼipa sünainjee. Jee ayateechi pia talatüin. Nnojoleerü ashapataain maʼin paaʼin jee aneechi pia müleka püsirajüle, jaʼitasü mojuin sukuwaʼipa tü kasa alatakat.

«Nnojotsü ashapataain naaʼin chi wayuu ayaawatakai saaʼu nukuwaʼipa» (PROVERBIOS 17:27).

¿Jamaluʼulu tia? Eere wanee kasa ashapataaka atuma paaʼin, eesü süpüla nnojoluin piyaawatüin aaʼu tü kasa paaʼinrajatkat, anakalaka jimatüle paaʼin.

•   Piyaawata saaʼu kasain ashapataain atuma paaʼin jee püshaja shia. Jamüsüjaʼa süshapataale paaʼin, anasü püshajüle tü jülüjakat paaʼin, jamüin paaʼin otta jamüin pukuwaʼipa. Sükajee tia pütüjaajeerü aaʼu kasain paaʼinrajatüin süshapataale paaʼin jee aneerü pukuwaʼipa. Jülüja paaʼin kasain süshapataain atuma paaʼin süpüla nnojoluin paaʼinrüin tia. Isalejeʼe püchiki tia, püchajaa sukuwaʼipa süpüla nnojoluin süshapataain maʼin paaʼin sutuma. Eesüjaʼa puunteerüle tia müleka anale putuma sukuwaʼipa tü kasa paaʼinrakat jee paaʼinramaatüle shia.

•   Nnojo macheʼein pia süchiirua jülüjain paaʼin mojuin wanee kasa. Eesü nnojorüle süshapataain naaʼin na waneinnua sutuma tü kasa ashapataakalü atuma paaʼin. Eesüjaʼa shiale neʼe naatain tü jülüjakat paaʼin süchiki wanee kasa. Anasü paaʼinrüle tü apünüinsükat kasa yaakat wünaapünaa:

  1. Nnojo jülüjamaatüin paaʼin mojuin tü naaʼinrakat na waneinnua. Eeshijaʼa nülanaale wanee wayuu püpüleerua paainjapa wanee koola. Jashicheechi pia müleka jülüjale paaʼin niʼrülin wayumüin. Nnojorüle jülüjain paaʼin tia, aneerü paaʼin.

  2. Jülüja paaʼin kasa eekai anain. Jamüshijaʼa chale pia sünain eʼrajeʼeraa jee shiale sünain aʼatapajaa puʼunajachin suluʼu katünasü, anashi paashajeʼerüle jee shiale paaʼinrüin wanee kasa piʼyataainjatka anain jee shiale paashajeʼerüin correo.

  3. Jülüja paaʼin jameerüin pukuwaʼipa. Püsakira paaʼin: «¿Jameetche takuwaʼipa mapeena sutuma tü kasa alatakat maaʼulu?». Piyaawata saaʼu müleka paaʼinmaainjatüle maʼin tü alatakat pümüin jee shiale wanee kasa nnojotka jülüjainjatüin maʼin paaʼin.

«Anakaja müleka lotüle sukuaippa süpüshua tü jaaʼinrakat» (1 CORINTO 14:40).

¿Jamaluʼulu tia? Lotuinjatü putuma sukuwaʼipa tü kasa paaʼinrakat.

• Loteesü sukuwaʼipa tü kasa waaʼinrakat. Nnojorüle waaʼinramaatüin wanee kasa, nnojotsü lotuin watuma tü sukuwaʼipakat jee ashapataasü waaʼin. Jee sükajee tia, awainmalaajeerü neʼe tü kasa waaʼinrajatkat. Paaʼinra tü kasa yaakat wünaapünaa:

  1. Püshaja kasain paaʼinrajatüin jee pikeraaja shia.

  2. Piyaawata saaʼu kasain nnojoluin paaʼinramaatüin atuma wanee kasa jee punouta shia.

«Shia anaka neemeraale wanee wayuu suulia niʼyataain maʼin, nnojoleerü kasain niʼrüin sünainjee, meechi nuwataakai aaʼin süchiirua joutai» (ECLESIASTÉS 4:6).

¿Jamaluʼulu tia? Na wayuu meemeraainkana sünain aʼyatawaa, nnojoleerü kasain neʼrüin. Mapüseena neʼe naya jee nnojoleerü apütaain kaʼi napüla süpüla neʼrüinjatüin anaa sünainjee naʼyataain.

• Nnojotsü alanaʼaleeinjatüin pümüin sujutu tü nneetkat otta tü piʼyataainkat. Nnojoleechi pia talatüin sutuma kanneetsee, ayateerü neʼe ashapataain paaʼin. Amüleechi neʼe pia. Müsü Eclesiastés 5:12: «Chi wayuu washitkai nnojoishi atunküin sutuma süshapataain naaʼin saaʼu tü kasa nümaʼanakat». Shia piyaʼlaja neʼe tü kasa choʼujaakat pümüin.

• Anashi peemeraale. Nnojotsü ashapataain paaʼin müleka paaʼinrüle wanee kasa kamalainka pümüin. Nnojo pülatirüin kaʼi sünain wanee kasa jimataka anain pia maʼaka saaʼin anajaa telewisoot, nnojoleechi anain pia sutuma.

• Püpansaaja joujainjachin piʼrajaain püserulaatse jee computador. Nnojo pünaʼlüin pejeewa correo, mensaaje otta redes sociales. Nnojo pünaʼlüin tü correo sünainpünaakat piʼyataain peemeraapa, aluʼusaʼa choʼujaale maʼin paaʼinrüin shia.

«Tü aainjaakalü ejercicio, eesü tü kasa anakalü apüla shia» (1 TIMOTEO 4:8, TNM).

¿Jamaluʼulu tia? Nnojoishi jooin wanee wayuu süpüla ayuulii müleka naainjale ejercicio.

• Aaʼinrajachi pia kasa anaka atuma pia. Aneerü paaʼin müleka paainjale ejercicio otta nnojoleechi pia ayuulin süshapataale paaʼin. Anainjatü piküin otta eküinjachi pia wattaʼa maalü, kaleʼu jee aipaʼa. Eemeraainjachi pia.

• Nnojo paaʼinrüin wanee kasa nnojoleetka ashapataain atuma paaʼin, maʼaka saaʼin asaa yootshi, akamüjaa yüi, mariwaana otta waneirua kasa. Ashapataajeerü neʼe paaʼin sutuma tia, ayuuijeechi pia otta ajaʼtteerü pünneetse.

• Pünaliraa nümaʼanamüin wanee tottoot süpüleeruale paaʼin tü ashapatawaakalü aaʼin. Puʼunüle nümaʼanamüin wanee tottoot, nnojotsü süsirüin isain püchiki tü alatakat pümüin.

«Süpüla jaaʼinmaainjatüin maʼin tü kasa alanaʼaleekat suluʼu anain» (FILIPOS 1:10, TNM).

¿Jamaluʼulu tia? Jülüjachon maʼin paaʼin kasain palajanainjatüin putuma.

• Püshaja tü kasa paaʼinrajatkat. Sükajee tia, piyaawateerü aaʼu kasain paaʼinramaatüinjatüin, kasain puchuntajatüin anain kaalinwaa jee shiale puuʼulaain waneirua.

• Jülüja paaʼin soʼu wanee semaana kasain pülatirüin anain kaʼi. Pütüjaale saaʼu kasain paaʼinrawalinjatüin, nnojoleerü ashapataain maʼin paaʼin.

• Keraa putuma tü kaʼi peemeraainjachikalü oʼu. Müleka peemeraale motsoʼo, aneerü paaʼin otta nnojoleerü ashapataain maʼin paaʼin.

«Shapaale maʼin naaʼin wanee wayuu nnojotsü talatüin naaʼin, talateechipajaʼa nia sütütüleʼennüle naaʼin süka pütchi anasü» (PROVERBIOS 12:25).

¿Jamaluʼulu tia? Akatchinraajeerü paaʼin sutuma kamaneein wayuu pümüin, anain nanüiki pümüin otta namülialaain paalin.

• Paashajaa nümaa wanee paʼaleewain eekai ayaawateechin saaʼu jamüin makaʼa paaʼin. Nükaalinjeechi pia süpüla piyaawatüin saaʼu naatain sukuwaʼipa tü jülüjakat paaʼin otta eesü nüküjeerüle pümüin wanee kasa anakat süpüla paaʼinrüin suulia süshapataain maʼin paaʼin. Aneerü paaʼin püküjale tü alatakat pümüin.

• Puchunta kaalinwaa namüin na waneinnua sünain wanee kasa paaʼinrajatkat jee shiale paaʼinrüin süpüshi.

• Piʼyataale nümaa wanee wayuu mojulaakai pümüin püchajaa sukuwaʼipa süpüla punoutuin tia. Paashajaa nümaa, kamaneeinjachi pia paaʼinrapa tia jee anainjatü pünüiki. Püküja nümüin jamüin paaʼin sutuma tü kasa naaʼinrakat (Proverbios 17:27). Ayatülejeʼe nia macheʼein, kaaʼin pia nuulia.

«Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin» (MATEO 5:3).

¿Jamaluʼulu tia? Choʼujaashaatasü nümüin wanee wayuu tü anainjatkalü atuma nunoula. Nnojotsü shiain neʼe niküin otta nüsheʼin. Talateena waya shiale kachiiruain waaʼin anain wanoula.

• Aneerü paaʼin puʼuraajüle. Jülüjashi pia naaʼin Maleiwa, naapajeein maʼin tü kasa ashapataakalü atuma paaʼin (1 Pedro 5:7). Jimateerü waaʼin müleka woʼuraajüle jee jülüjale waaʼin kasa anasü (Filipos 4:6, 7).

• Paashajeʼera pütchi piʼraajeechika atuma Maleiwa. Tü wetsiikulo eʼitaanakat suluʼu rewiisütakat tüü, suluʼujeejatü shia tü Wiwüliakat, süpülajatü anain wanoula. Sükajee tia, kekiijeechi pia jee piyaawateerü aaʼu kasain paaʼinrajatüin (Proverbios 3:21). Anasü paashajeʼerüle tü Wiwüliakat. Eesü süpüla paashajeʼerüin palajana tü karaloʼutakat Proverbios.