MOJUSÜ NAAʼIN WANEE WAYUU MEPIRE TÜ AYUULII NÜNAINKAT OTTA ISALE NÜCHIKI AAʼINRAA WANEE KASA SUTUMA NEEWAAIN. Mojushaatasü naaʼin Ulf sutuma masaʼain nia, jama wayuuin maʼlechesai nia nümaiwa otta wainmain kasa naaʼinrapuʼuka. Anuu nünüiki süchiki tü alatakat nümüin: «Mojushaatasü maʼin taaʼin soʼu tia. Matsüinsat taaʼin otta nnojoishi taya aaʼinreein wanee kasa».

Sutuma tü alatakat nümüin Ulf, wayaawata aaʼu eein süpüla ayuuijaain waya wapüshuaʼa. Eepejeʼe süpüla waaʼinmajiraain suulia ayuulii. ¿Nnojoleenache waya talatüin aaʼin ayuuire maʼin waya? Wekirajaajeerü anain eein süpüla talatüin waaʼin. Süpülapünaa tia, wekirajaa sünain waneirua kasa waaʼinrajatka saashin tü Wiwüliakat süpüla nnojoluin ayuulin maʼin waya.

LAÜLAAINJATÜ WAAʼIN SÜNAIN TÜ WAAʼINRAKAT. (1 Timoteo 3:2, 11, TNM). Sülanaʼaleere waneepia weküin otta wasüin, ayuuijeena waya otta wainmeerü nneerü wakataajaka. «Nnojo namaain pia na asüliikana maʼin wiino otta na koʼutunakana sünain ekaa asalaa. Nnojoleerü eein kasa nümaʼana chi wayuu asüikai wiino jee chi wayuu koʼutunakai» (Proverbios 23:20, 21).

NNOJO WAʼYARÜLAJÜIN WAKUWAʼIPA. «Anakaja wooʼulaale suulia tü yarüttakat atüma waaʼin, tü mojukat atüma wakuaippa» (2 Corinto 7:1). Eeshii eekai naʼyarülajüin nakuwaʼipa sükajee nakünajüin otta nakaijüin tawaako, eekai keejiain namüin asawaa jee akaijaa yüi. Saashin Centros para el Control y la Prevención de Enfermedades de Estados Unidos, aapüsü ayuulii tü akaijaakat tawaako, eeshii eekai isaleein nachiki aaʼinraa wanee kasa sutuma otta ayuuishii naleʼeruʼupünaa.

KOJUTUINJATÜ WAMÜIN KATÜIN WOʼU NUTUMA MALEIWA. «Nünain Maleiwakai, katoʼuchii waya, waraittüshii waya otta wayuushii waya» (Aluwataaushikana 17:28). Kojutule wamüin katüin woʼu, aaʼinmajiraajeena waya suulia eewawaa sünain waʼyataain, woʼunirapa kemion jee washaitapa. Nnojotsü anain müleka neewaale wanee wayuu sünainjee neʼe aaʼinraa wanee kasa talataka atuma naaʼin motsomüin.

NNOJO WAAPÜIN WAAʼIN SÜNAIN TÜ KASA MOJUSÜ JÜLÜJAKAT WAAʼIN. Eeshii süpüla anain jee ayuulin waya sutuma tü kasa jülüjakat waaʼin. Müsüjeseʼe wachajaainjatüin sukuwaʼipa süpüla nnojoluin shapaain maʼin waaʼin, nnojoluin üttüin waaʼin, nnojoluin  wachunjain otta nnojoluin jülüjain waaʼin kasa mojusü. «Puuʼulaa suulia ülüʼüttüin paaʼin jee suulia jashiee», müsü tü Wiwüliakat (Salmo 37:8). «Nnojo jüshapataain aaʼin saaʼu tü alateetkat wattaʼa. Süka jamüin, eejeerüin tü kasa shapaakalü atuma jaaʼin wattaʼa», müsü shiaya (Mateo 6:34, TNM).

JÜLÜJA WAAʼIN KASA ANASÜ. Saashin tü Wiwüliakat, «jimatüle naaʼin wanee wayuu, nnojoleechi ayuulin» (Proverbios 14:30). «Talatüle naaʼin wanee wayuu, aneechi nia» (Proverbios 17:22). Pansaasü tia sümaa tü namakat na cientiificokana. «Na wayuu talatakana aaʼin waneepia, nnojoishii ayuulin maʼin», müshi wanee tottoot chaa Escocia.

WEKIʼRALAA SÜNAIN TÜ JEKETKAT WAKUWAʼIPA (RESILIENCIA). Eeshii eejiraajeenale waya sümaa wanee ayuulii eekai mepin maʼaka sülatüin nümüin Ulf. Wayapejeʼe aneeküinjanain tü waaʼinrajatkat süpüla eejiraain waya sümaa. Nnojotsü anain waapüle waaʼin sünain mojuu aaʼin. «Mojule paaʼin wanaa sümaa müliain pia, matsüinjeerü paaʼin», müsü tü Wiwüliakat (Proverbios 24:10).

Eeshii wayuu eekai anain naaʼin mapa süchikijee mojuin naaʼin paala. Nachajaain sukuwaʼipa süpüla eejiraain naya sümaa tü alatakat namüin otta atüjashii naya süpüleerua nakuwaʼipa, resiliencia sünülia tü naaʼinrakat. Shiaʼaya alataka tia nümüin Ulf. Naashin niakai, süka nuʼuraajüin maʼin otta nüsakireʼerüin naaʼin sünain tü sümakat tü Wiwüliakat, nnojotsü jülüjain naaʼin mojuin maʼin tü alatakat nümüin, shia jülüjaka naaʼin tü kasa anasükat. Wainma na makana akuwaʼipa maʼaka naaʼin Ulf otta atüjashii naya sünainjee tü alatakat namüin. Maaʼulu yaa, wayuu amüliajüi Ulf, atüjashi nia amülialawaa aaʼin naalin na eʼrakana namüliala. Nüküjainjeseʼe namüin tü pütchi anasü suluʼukat tü Wiwüliakat.

Wanee wayuu mojukai maʼin aaʼin nia Steve. Wanaa sümaa 15 nuuyase, ojutuushi nia saaʼujee wanee wunuʼu otta shia neʼe nukutulaka tü nikiikat. Soʼu 18 nuuyase, nüinküin nukutuluin nütüna. Mapa, ekirajaashi nia suluʼu wanee eʼikülee miyoʼu, amaʼüjiraashi nia nukuwaʼipa sümaa jieyuu, akaijüishi nia yüi otta asüishi nia. Nnojotsü naʼatapajüin anainjatüin nukuwaʼipa. Shiasaʼa sutuma nikirajaain sünain tü Wiwüliakat, anoutaasü nukuwaʼipa otta ooʼulaashi nia suulia aaʼinraa tü kasa mojusü keejiapuʼukat nümüin. Anuu nünüiki süchiki tia: «Nnojotpuʼusü tatüjaain saaʼu tü keeʼireekat taaʼin otta mojupuʼusü taaʼin». Nümaka süchikijee: «Jimatüsü taaʼin otta talatüshi maʼin taya maaʼulu».

Sutuma tü alatakat nümüin Steve otta Ulf, sotusü waaʼin tü sümakat Salmo 19:7, 8: «Anasü maʼin tü pütchi nüsoʼirakalü anain waaʼin Jeʼwaa, akatsüinraasü waaʼin sutuma. [...] Lotoshoonosü tü nümakat Jeʼwaa wamüin otta talatüsü waaʼin sutuma; wulesü maʼin tü nuluwataakalü anain Jeʼwaa, wayaawata aaʼu wanee kasa sutuma».