Smita, * shia wanee wayuu eʼraajünapuʼusü suluʼu anamiain shia, eetaasü maʼaka apünüin shikii jaʼralimüin suuyase, chapuʼusü kepiain Daca (Bangladés). Talatapuʼusü maʼin saaʼin nümaa chi suʼwayuusekai, aʼyataapuʼulü maʼin shia otta shikirajapuʼuin na wayuukana sünain tü Wiwüliakat. Kaʼlechejaasü shia. Mamaʼajaasat shia sutuma tia ayuuliikat, mojushaatasü maʼin naaʼin na süpüshikana süchiirua.

James otta tü nuʼwayuusekat oʼunajaashii naya eemüin na naʼaleewainkana chaa wopumüin sünain Estados Unidos. Akatsaʼa maleʼejüinreein naya Nueva York, chaa eere kepiapuʼuin naya. Süka jamüin, pasiruaain naya suluʼu kemion, ouktaleeshiʼiya naya. Eʼnnaajünapuʼushii sutuma kamaneein naya. Eetaasü maʼaka apünüin shikii jaʼralimüin nouyase wanaa sümaa sülatüin tia namüin.

Nnojotsü mochoojuin soʼu wayuu tü kasa mojusü alatakat maaʼulu. Wainma surulaat jee na wayuu anamiakana ouktaka sutuma tü atkawaakat, sutuma eein kasa mojusü. Ouktüsü wayuu maʼleekalia, eeshii eekai ouktüin sutuma pasiruaain naya. Eeshii eekai mamaʼain sutuma ayuulii ouktasiroʼu. Eesü joo ouktüin wainma wayuu sutuma sukutkajaain tü mmakat, sutuma eein wawai. Paʼünüüwaasü wayuu sutuma naatain noumain jee neʼiruku. Tia, eesüjaʼa süpüla sülatüirüin pümüin.

Eesüjaʼa süpüla wasakirüin waaʼin sünain pütchikalüirua tüü:

• ¿Jamüsü sülataka kasa mojusü namüin na wayuu anamiakana?

• ¿Niache Maleiwa kasitka tü kasa mojusükat?

• ¿Alatüsüche tü kasa mojusükat sülateepa neʼe? ¿Nayataapa neʼe na wayuukana kasirüin tü kasa mojusükat?

• ¿Shiache sutuma tü karma * münakat?

• Shiimainrejeʼe eein chi Maleiwa shiimainshikai, ¿jamaka nnojoliika naaʼinmajüin na wayuu anamiakana?

• ¿Nnojoleetche mapeena tü kasa mojusükat otta tü müliaakat?

Süpülapünaa watüjaain saaʼu tia, wekirajaa sünain piamasü pütchi: ¿Jarat shikiisüka maʼin tü kasa mojusükat? ¿Kaseerü naainjaka Maleiwa?