Maaʼulu yaa, wainma na aaʼinrakana kasa mojusü sümüin wayuu. Naya makana aainjala, nayeena najaʼttiraka Maleiwa. Najaʼttireena na aluwataaliikana saaʼu tü Mmakat sümaʼaleʼeya süpüshuaʼa tü kasa mojusü naainjakat. Chi kakumainkai tü Mmakat, keeʼireesü naaʼin watüjaainjatüin saaʼu sülüʼülüin sükalia tia. ¿Jamüsü sukuwaʼipa nutuma süpüla watüjaainjatüin saaʼu tia?

Anuu wanee sukuwaʼipa: jamüshijaʼa müleka puʼunajaainjachire suluʼumüin wanee mma naatajatü, acheküshi püsakirüinjachin palajana wanee wayuu eʼraajakai tü mma eeʼewaijachire pia, nüküjapa pümüin eepünaainjachire pia, oʼunaajaa pümüin. Shiasaʼa chapa pia wopuluʼu jee piʼrüle tü kasairua nümakat chi wayuu püsakitkai, «shiimainya nümakat wayuukai, shiaʼaya wopukot tüü, lotushi taya», meechi pia. Atalatalaajeerü paaʼin süka piʼrüin pülüʼülüin eeʼewaijachire pia. Akaataajaʼa neʼe Jeʼwaaya, naapüin wamüin tü Wiwüliakat süpüla waashajeʼerüin shia süpüla watüjaainjanain saaʼu tü kasa alatajatkat süpüla sajaʼttinnüin süpüshuaʼa tü kasa mojusükat sainküin mmakat süpüshuaʼa. Maaʼulu yaa, weʼrüin sünain shikeraajüin tü süküjakat tü Wiwüliakat. Sutuma tia, weʼitaashaatain waaʼin sünain sülüʼülüin tia kaʼikat.

Süpülapünaa maʼin sajaʼlajaainjatüin süpüshuaʼa kasa mojusü, alatüinjatü waneeirua kasa saashin tü Wiwüliakat. Wainmeerü kasa shiʼreetka wayuu, nnojotsü maajüin tia neʼreetka. Joʼu wekirajaai sünain tia alatajatkat.

1. WAINMEERÜ KASA MOJUSÜ, JOULEERÜ ATKAWAA SAINKÜIN MMA. Süküjüin tü Wiwüliakat, tü kasa alatajatkat süpülapünaa «tü sükaliajatkat sajaʼlajaain kasakat süpüshua». Sünainjee tia, atüjaaneerü aaʼu sülüʼülüin tia kaʼikat (Mateo 24:3, 14). Anuu tü alatajatkat: atkaajeerü maʼin wayuu, aijeerü jamü, akutkujaweerü tü mmakat sainküin mma, watteerü maʼin saalii tü kaʼruwarannuukat, maaliinjiraajeerü tü wayuukalüirua, wainmeerü wayuu ekirajaka alawaa nüchiki Maleiwa (Mateo 24:6-26). Nnojotpajaʼa eiwaʼalüin tia kasa mojusü waashajaakat achiki, kakaliairü. Eekajasaʼa tüüya alatajatkat süpülapünaa sajaʼlajeʼennüin kasa süpüshuaʼa, pachiiruaalainjatü neʼe. Anuu apünüinsü kasa alatajatka suʼunnaa tia.

2. MOJUTÜJIRAAJEERÜ WAYUU. Maaʼutpünaa yaa, nnojoleerü maʼin kojutüjiraain wayuu saashin tü Wiwüliakat. Anuu tü nakuwaʼipainjatkat: «Eejeerü wainma wayuu eekai kapülain naaʼin nakuaippa neʼe namüiwa, eekai kachiiruain naaʼin tü washirüükat, eekai naʼwaataain suluʼu nakuaippa, eekai neʼrüin wayumüin sümüin wayuu, eekai moonooloin sümaa nanüiki nashi je nei, eekai matüjain aapaa analuʼut, je eekai mojutüin Maleiwa natüma. Eejeerü wainma wayuu eekai maalin wayuu napüla, eekai mamülialain amüin wayuu, eekai mojuin nanüiki sujuuna wayuu, eekai maaʼin naaʼin sümaa jashiee, je eekai nayouktüin tü anasükat. Eejeerü wainma wayuu eekai naaʼinreein kasa mojusü, eekai nayouktüin aluwataanaa, eekai yaletayaain nakuaippa suʼupala wayuu, je eekai shaitteein waneepia saaʼu maalin Maleiwa napüla» (2 Timoteo 3:1-4). Kakaliairü müin sukuwaʼipa wayuu. Saashin tü Wiwüliakat, keemaleejeeria sülüʼütpa süpüla sajaʼttüin kasa süpüshuaʼa, kooʼomüin kooʼomüin meerü tü kasa mojusükat. Mülieerü maʼin wayuu süpüshuaʼa soʼu kaʼikat tia. ¿Aashin mayaain sukuwaʼipa wayuu maaʼulu yaa?

3. AMOJUJEʼENNÜSÜ TÜ MMAKAT. Saashin tü Wiwüliakat, najaʼttireerü Maleiwa tü wayuu amojujaka tü mmapaʼakat (Alateetkat Mapeena 11:18, TNM). Tü nakuwaʼipainjatkat na wayuu kaainjaraliikana meerü aka saaʼin nakuwaʼipa na wayuu eejanakana soʼu nükalia Noé. Müsü Wiwüliakat nachiki: «Otta wayuu süpüshua, mojulaasü waneepia nuʼupala Maleiwa. Atkaajiraashii naya sainküin mmakat süpüshua sünain paʼürülaajiraain naya. Niʼrüin chi Maleiwakai sünain kamaʼüralüin wayuu süpüshua». Saaliijee müin naainjala naya wayuukana najaʼttirüin naya Maleiwa mapa (Génesis 6:11-13). Keemashaatasü tü mmapaʼakat maaʼulu yaa, ¿aashimüin? Ouktiraasü maʼin wayuu maaʼulu yaa. Jee müsia, eesü süpüla sajaʼttirüin wayuu tü mmakat sümaʼaleʼeya  wayuu süpüshuaʼa, süka jamüin, eein tü kasa nakumajakat süpüla nasoteʼerüin tü mmakat. Tü wayuukalüirua sainküin mmakat süpüshuaʼa, namojujüin tü jouktaikat, wainma kasa yarüttüsü nojotoko shiroku tü palaakat, noʼunaʼala aaʼinrü tü mürütkalüirua jee müsia namojujüin waneeirua kasa.

Sümaiwa paala, nnojotsü süpüla suuntüin wayuu sajaʼttirüinjatüin wayuu sainküin mmakat süpüshuaʼa, maaʼulu yaa, suuntüin wayuu saaʼinrüin tia. Shiimain tia, anuʼusa mojuin maʼin tü mmapaʼakat maaʼulu yaa otta keemasü sümaa wainmain maʼin saʼapüla tü surulaatkalüirua. Nnojotsü müin jamajatiaakai saaʼin namüin müliain wayuu sutuma tü kasa mojusü naaʼinrakat jee sutuma tü kasa nakumajakat. Eepejeʼe chi anainjachikai atuma tü Mmakat, nia Maleiwa, müshijeseʼe najaʼttireenain na wayuu mojulaakana suulia jamajüin tü Mmakat natuma.

4. AKÜJÜNÜSÜ PÜTCHI SAINKÜIN MMAKAT SÜPÜSHUAʼA Tü wanee kasa alatajatkat suʼunnaa tia kaʼikat shia tü sümakat tü karalouktakat Mateo, anuu sünüiki: «Süpülapünaa süntüin tü kaʼi sajaʼlajaainjatkat oʼu kasakat süpüshua, aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua. Je kettaapa shia, anteerü sükalia sajaʼlajaainjatkat oʼu kasakat süpüshua» (Mateo 24:14). Tü pütchi aküjüneetkat sümüin tü wayuukalüirua waneejateerü suulia tü süküjapuʼukat wayuu suluʼu waneeirua iküleesia, süka jamüin, süküjüneerüin süchiki «tü pütchi anasükat, tü süchikikat nukuaippa Maleiwa sünain aluwatawaa». ¿Jaralii na wayuu aküjakana süchiki tia nukuwaʼipakat Maleiwa sünain aluwatawaa sainküin mmakat süpüshuaʼa?

Na aküjüliikana pütchi nüchiki Jeʼwaa, nakumajüin www.pr2711.com süpüla süküjünüinjatüin süchiki Nuluwataaya Maleiwa. Alatüsü suulia 700 sünüikipala wayuu sülatinnaka aluʼu tia pütchikat. Nayaʼala neʼe na aküjüliikana pütchi nüchiki Jeʼwaa aküjaka süchiki tü Nuluwataayakat Maleiwa jee kakaliainna naya sünain aaʼinraa tia. Nnojotsü shiain sutuma eeitpain Internet, süka jamüin, jeketüin akumajünüin. Soʼujee juyakat 1939, ashajünüsü sünain tü karalouktakat Aapiria Wayuu tü pütchi makat: «Aküjüsü süchiki Nuluwataaya Jeʼwaa». Na aküjüliikana pütchi, naküjüin tia pütchikat sümüin wayuu süpüshuaʼa saashin wanee karaloukta aashajaaka süchiki tü iküleesiakalüirua. Najaʼlajeʼereerü Maleiwa süpüshuaʼa tü kasa mojusükat sükajee tü Nuluwataayakat, tia shia wanee kasa waküjaka.

¿Aashin piʼrüirüin sünain shikeraajüin süpüshuaʼa tü paashajeʼerüitpakat suluʼu karalouktakat tüü? Soʼujee tü juyakat 1914, süküjüin rewiisütakat tüü süpüshuaʼa tü kasa alatajatkat maaʼulu yaa sülüʼütpa  maʼin tü kaʼi sajaʼlajaainjatkat oʼu süpüshuaʼa tü kasa mojusükat. Eepejeʼe na wayuu nnojoliikana anoujain sünain tia süka alawaain neʼe tü münakat naashin, nnojotsü keemain tü mmapaʼakat maaʼulu yaa naashin. Makaʼa weʼrüin sülatüin kasa mojusü mmapaʼa naashin naya wayuukana, shia sutuma shiiʼiyatünüin suluʼu Internet, telewisoot, serulaat jee waneeirua kasa. Eepajaʼa na wayuu anoujakana sünain pejein maʼin tü kaʼi sajaʼlajaainjatkat oʼu süpüshuaʼa kasa, süka jamüin, neʼrüin süpüshuaʼa tü kasa mojusü alatakat maaʼulu yaa.

Soʼu 2014, eeshii waneeinnua científico aküjakana namüin na wayuu aʼyataakana suluʼu Consejo de Seguridad de las Naciones Unidas wainmain tü kasa eekat süpüla sajaʼlajeʼerüin wayuu yaa saaʼujee tü mmakat. Anuu nanüiki süchiki tia: «Wekirajaa anainrü eein süpüla sajaʼttüin wayuu sutuma sukumajünüin watta saalin tü tecnología münakat». Wainma na wayuu anoujakana sünain sülüʼülüin tü kaʼi sajaʼttajatkat oʼu süpüshuaʼa tü kasa mojusükat, süka jamüin, neʼrüin sünain shiimain tü namakat naya científicokana. Nnojoliinjanapajaʼa waya mmoluin süka süntajatüin tia kaʼikat, süka jamüin, eeyülin süpüla waaʼinrüin tü nuluwataakat anain waya Maleiwa maaʼulu yaa, shiasejeʼe sünainjee tia eeshii süpüla katüin woʼu suʼunnaa kaʼikat tia.