Nnojotsü süküjain tü Bibliakat anain nümüin Maleiwa süpüshuaʼa tü iküleesiakalüirua. Aküjünüsü süchiki suluʼu tü Bibliakat, eein sukuwaʼipa aʼwaajia Maleiwa nnojotka anain nümüin. Joʼu wekirajaai süchiki piamasü sukuwaʼipa.

Palajatka sukuwaʼipa: Na aʼwaajakana maleiwayaasü

 Süküjain tü Bibliakat nnojoluin kasain anain apüla aʼwaajaa maleiwayaasü (Jeremías 10:3-5; 16:19, 20). Anuu nünüiki Jehová namüin na israeliitakana: «Nnojoishii kamaleiwaseyaainjanain jia toulia tayakai» (Éxodo 20:3, 23; 23:24, Dios habla hoy). a «Jashichishaatashi maʼin Jehová» naʼwaajüle maleiwayaasü na israeliitakana (Números 25:3; Levítico 20:2; Jueces 2:13, 14).

 Maaʼulu yaa ayatüsia nnojoluin anain aʼwaajaa «tü maleiwayaasükalüirua» (1 Corinto 8:5, 6; Galacia 4:8). Nuchuntuin Maleiwa namüin na aʼyataweekana nümüin, nojuʼitajanain suulia tü iküleesia ekirajakat alawaa. Müsü tü Bibliakat: «Juuʼulaa suulia jümaain naya na ekirajakana sünain alawaa» (2 Corinto 6:14-17). Müleka wanaawale nümüin Jehová süpüshuaʼa tü iküleesiakalüirua, ¿jamaka nüküjaka namüin nojuʼitajanain suulia na aʼyataweekana nümüin?

Piamaka sukuwaʼipa: Na aʼwaajakana Maleiwa süka wanee akuwaʼipa niyoutaka

 Niyoutuin Jehová na israeliitakana süka naʼwaajüin maleiwayaasü otta sünainpünaain naya na ekirajakana sünain alawaa (Éxodo 32:8; Deuteronomio 12:2-4). Jashichi Jesucristo namüin na shikiipüʼükana tü iküleesia eejatkat nükalioʼu saalii nnojoluin anain naʼwaajia Maleiwa natuma. Anoujayaashii maʼin naya piamapejeʼe noʼupünaa na fariseokana sükajee nnojoluin naaʼinrüin süka süpüshuaʼa naaʼin tü alanaʼaleekat sünain anain, maʼaka alin Maleiwa napüla jee naaʼinrüin tü anakat sümüin wayuu süpüshuaʼa (Mateo 23:23).

 Maaʼulu yaa tü iküleesia anakat noʼuluʼu Maleiwa shia tü ekirajakat tü shiimain suluʼujeejatkat tü Bibliakat (Juan 4:24; 17:17; 2 Timoteo 3:16, 17). Tü iküleesia nnojotkat pansaain atuma shikirajia tü Bibliakat, akayalaashii na wayuukana sutuma nuulia Maleiwa. Eeshii wayuu anoujakana sünain tü kanüliakat Trinidad, sujuʼitüin naaʼin wayuu outapa nia, jee müliainjanain na wayuukana waneepia saʼaka siki outapa naya. Alawaa nee tia. Nnojotsü anain noʼuluʼu Maleiwa tia süka nayoutuin tü nuluwataakalü anain Maleiwa süpüla noonooinjatüin sümaa tü shikirajaapuʼukalü anain wayuu (Marcos 7:7, 8).

 Niyoutuin Maleiwa piamain noʼupünaa na anoujayaashiikana (Tito 1:16). Süpüla warütkaain nünainmüin Maleiwa sükajee wanee iküleesia, nnojotsü shiainjatüin neʼe waaʼinrüin tü suluwataakalü anain, choʼujaasü anainjatüin maʼin wekirajia sutuma süpüla anainjatüin wakuwaʼipa. Maʼaka sümüin tü Bibliakat: «Wane wayuu eekai talatüin Maleiwa nümaa naajüin, müleka nnojorule nülaüleʼerüin naaʼin süka nünüiki, mayaashije nuʼwaataain suluʼu tü nünoulakat, nnojotsü kasain saamüin nümüin tia noʼuluʼu Maleiwa. ¿Kasa talataka atüma naaʼin chi Washikai Maleiwa? Talatüsü naaʼin müleka waaʼinmajüle na wayuukana eekai mapüshin, maa aka na tepichi mooʼutshiikana ooʼulaka na jieyuu oukta aʼwayuusechiikana. Je nücheküin chi Maleiwakai nnojorule waaʼinrüin tü yarüttakat atüma waaʼin, maa aka tü naaʼinrakat na wayuu manoujainsaliikana» (Santiago 1:26, 27). Anuu süshajia tia wetsiikulokot sutuma tü Bibliakat La Palabra de Dios para Todos: «tü anoujaa wulesükat» wanaa sümaa saashajaain süchiki sukuwaʼipainjatka waʼwaajia Maleiwa.