Armagedón shia nütkaainchika oʼu Maleiwa namaa napüshuaʼa na aluwataaliikana. Na aluwataaliikana nnojoishii oonoweein nümaa Maleiwa otta mojutusai nia natuma (Salmo 2:2). Soʼu Armagedón ajaʼttinneerü süpüshuaʼa sukuwaʼipa aluwatawaa sutuma wayuu (Daniel 2:44).

 Tü pütchikat Armagedón ashajünüsü shia mayaa Har–Magedón, uwatua neʼe süshajünüin suluʼu tü Bibliakat suluʼu Alateetkat Mapeena (Apocalipsis). Aküjünüsü suluʼu wanee pütchi ashajuushika paala nakotchinnüin napüshuaʼale na sülaülashiikana mma süpüla natkaainjanain nümaa chi Maleiwa Pülashikai maʼin. Atkawaakat tüü chainjatü shia suluʼu tü mma kanüliakat suluʼu hebreo Har-Magedón (Alateetkat Mapeena [Apocalipsis] 16:14, 16).

 ¿Jaraleena na atkaainjanakana soʼu Armagedón? Nayeena na aapieekana jee chi nekiipüʼüinjachikai nia Jesucristo. Nayamüleerü na nüʼünüükana Maleiwa (Alateetkat Mapeena 19:11-16, 19-21). Naʼakajee na ayamünüinjanakana eejeena na ayoutakana nuluwataain Maleiwa jee müshiʼiya na eʼrüliikana wayumüin nümüin (Ezequiel 39:7).

 ¿Jalainjatü tü atkawaakat soʼu Armagedón? Sainküinpünaajeerü shia tü mmakat, nnojoleerü eein shia suluʼu wanee shiʼipa mma (Jeremías 25:32-34; Ezequiel 39:17-20).

 Tü pütchikat Armagedón (suluʼu hebreo Har Meghiddóhn) «Uuchikat chakat Meguidó» maluʼulu. Tü mmakat Meguidó chasü shia suluʼu tü mma eepuʼukat paala Israel. Ashajünüsü süchiki eejatüin wainma atkawaa chaʼayaa. Süküjain tü Bibliakat soʼutku tia atkawaakat (Jueces 5:19, 20; 2 Reyes 9:27; 23:29). Armagedón nnojotsü chain shia süchikanain tü mma kanüliakat Meguidó süka nnojoluin eein wanee uuchi chaʼayaa. Otta müsia chaʼayaa suluʼu tü patajatshii chakat Jezreel eere Meguidó nnojotsü süpüla watiraainjatüin napüshuaʼa na wayuu atkaainjanakana nümaa Maleiwa. Müsüjeseʼe Armagedón shia tü kaʼi natkaainjatkalü oʼu napüshuaʼa na sülaülashiikana mma nümaa Maleiwa.

 ¿Kaseerü alataka soʼunnaa Armagedón? Nnojotsü watüjaain aaʼu kaseerüin naaʼinrüin Maleiwa süpüla niyamülüinjanain na nüʼünüükana. Watüjaapejeʼe saaʼu naaʼinreerüin Maleiwa tü naaʼinrapuʼukat paala sümaiwa: niʼitirüin yeelo, sukutkajaain mma, süsenaain wüinkat, juya sümaajatü siki otta azufre, shiyaa juya otta müsia ayuulii keemasü maʼin (Job 38:22, 23; Ezequiel 38:19, 22; Habacuc 3:10, 11; Zacarías 14:12). Sutuma nnojoluin nayaawatüin saaʼu na nüʼünüükana Maleiwa tü alatakat, oʼunirajeena naaʼin. Nayaawateetpejeʼe saaʼu mapa natkaain nümaa Maleiwa (Ezequiel 38:21, 23; Zacarías 14:13).

 ¿Ajaʼttaleejeetche tü mmakat sutuma Armagedón? Nnojoleerü sajaʼttirüin shia. Akumajünüsü tü mmakat süpüla kepiainjatüin wayuu saaʼu waneepia (Salmo 37:29; 96:10; Eclesiastés 1:4). Müsüjeseʼe watüjaain saaʼu nnojoleerü sajaʼlajeʼennüin tü mmakat sutuma Armagedón. Eejeena watta saalii wayuu katakana oʼu sajaʼttapa Armagedón, naya na oonookana sümaa nünüiki Maleiwa (Alateetkat Mapeena 7:9, 14; Salmo 37:34).

 ¿Ajaʼttinneetche tü mmakat saashin tü Bibliakat soʼunnaa Armagedón? Nnojo. Süküjale tü Bibliakat süchiki tü mmakat eesü süpüla shiain saashajaain achiki na wayuu moonooinkana nümaa Maleiwa (1 Juan 2:15-17). Müsüjeseʼe soʼunnaa Armagedón nayeena ajaʼttinnüin na wayuu mojulaashiikana, nnojoleerü shiain tü mmakat (Mateo 24:3, Biblia de Jerusalén).

 ¿Joujeetche tü atkawaakat Armagedón? Süpülapünaa süntüin Armagedón eejeerü wanee müliaa miyoʼushaata maʼin naashin Jesús. Müsü nünüiki: «Matüjaaju aaʼu tü kaʼi jee tü oora sülatüinjatkalü oʼu tia, nnojotsü natüjaain aaʼu tia na aapiee chajanakana iipünaa, jaʼitakajeʼe tayakai, nnojotsü tatüjaain aaʼu. Niaʼala neʼe atüjaaka saaʼu chi Tashikai» (Mateo 24:21, 36). Saashin tü Bibliakat oʼtteerü Armagedón soʼunnaa nuluwataain Jesús. Oʼttushi nia sünain aluwatawaa soʼu tü juyakat 1914 (Mateo 24:37-39).