¿Jamakuwaʼipat süpüla taashinjatüin wainma wayuu sünainjee outuin Jesús?

PIPEJAA SÜKA

Tü sümakat tü Bibliakat

Süpüla noʼttaainjanain na wayuukana suulia tü kaainjalaakat jee tü outaakat naapüin Jehová nikii chi nüchonkai naaʼu. Süküjain tü Bibliakat amülain nüsha Jesús süpüla taashinjanain na wayuukana (Éfeso 1:7; 1 Pedro 1:18, 19). Naashin Jesús, antüshi nia süpüla «naapüinjatüin nikii süpüla suʼttaainjatüin watta saalii wayuu» (Mateo 20:28).

¿Jamüsü choʼujaaka suʼtteʼennüinjatüin wayuu?

Chi palajachikai wayuu nukumajakai Maleiwa kanüliakai Adán, anasü maʼin nukuwaʼipa süka nnojoluin nüleʼeruʼuin süchiki kaainjalaa, katüinjatia noʼu waneepia. Nnojotpejeʼe müin shia süka nnojotsü noonooin nümaa Maleiwa (Génesis 3:17-19). Nülatirüin naainjala Adán namüin na nüikeyuukana (Roma 5:12). Saashin tü Bibliakat müshi süchepchiakai aaʼin Adán jee na nüikeyuukana tü kaainjalakat otta tü outaakat (Roma 7:14). Süka waleʼeruʼuin wapüshuaʼa wayakana süchiki tü kaainjalaakat nnojotsü süpüla waleʼejirüin süchikuaʼa tü amülouikat nutuma Adán (Salmo 49:7, 8).

Amülialaasü naaʼin Maleiwa naalin na nüikeyuukana Adán (Juan 3:16). Sutuma lotuin maʼin nukuwaʼipa Maleiwa nnojoishi süpüla anajiraain nia namaa na kaleʼeruʼukana süchiki kaainjalaa, choʼujaasü saainjünüin wanee kasa süpüla anajiraain nia namaa (Salmo 89:14; Roma 3:23-26). Süka aipüralin wayuu Jehová naapüin nikii chi nüchonkai süpüla naakajirüin na wayuukana suulia kaainjalaa jee motoleeinjatüin shia naaʼin (Roma 5:6-8). Nuunteerü tia süka naapajiraain nikii Jesucristo.

¿Jamüsü sukuwaʼipa süpüla suʼtteʼennüinjatüin wayuu?

Süküjain tü Bibliakat apünüinsü kasa süchiki tia:

Sujutu tü awalaajünakat (Números 3:46, 47).
Suwalaajünüle sülia wanee kasa taashisü shia süchikuaʼa (Éxodo 21:30).
Sujutu tü aapünakat wanaawainjatü sülia sümaa tü taashinjatka atumaa a.

¿Jamüsü wanaawaka sukuwaʼipa tia sümaa naapajiraain nikii Jesucristo?

Anuu tü awalaajünaka saaʼu waainjala. Süküjain tü Bibliakat nuwalaajüin Maleiwa süpüla taashinjanain na anoujashiikana (1 Corinto 6:20; 7:23). Nuwalaajüin Maleiwa sükajee nüsha Jesús taashinjatüin wayuu saʼakajee tü eʼirukuukat süpüshuaʼa sainküinjee mmakat (Alateetkat Mapeena 5:8, 9).
Tü awalaajünaka süpüla taashin waya. Taashishii waya suulia tü kaainjalaakat sükajee naapajiraain nikii Jesús waaʼu (1 Corinto 1:30; Colosas 1:14; Hebreokana 9:15).
Wanaawasü sujutu tü aapünakat süpüla taashin waya atumawaa. Tü nukuwaʼipakat Jesús wanaawasü sümaa tü nukuwaʼipakat Adán nnojoluiwaʼaya nia kaainjalain (1 Corinto 15:21, 22, 45, 46). Anuu tü sümakat tü Bibliakat: «Saaʼujee moonooin Adán sümaa nünüiki Maleiwa, oʼttusü wayuu ütamüinreʼeya sünain kaainjalaa. Otta müsia jooluʼu, saaʼujee noonooin Jesucristo sümaa nünüiki Maleiwa, eeitpa süpüla anajiraain wayuu maleekalia» (Roma 5:19). Sutuma naapajiraain nikii Jesucristo eeshii süpüla suʼttaain wayuu maʼleekalia müleka neʼitaale naaʼin nünain (1 Timoteo 2:5, 6).

a Wanaa sümaa süshajünüin suluʼu tü Bibliakat tü pütchikat «taashii» makat shia aküjüneeka achiki suwalaajia wanee kasa eekat kojutuin jee shiale shiiʼiraka wanee kasa. Jamüsaʼa tü pütchika hebreo kafár, suwalaajia wanee kasa maluʼulu shia (Génesis 6:14). Shia süküjünaka akajee saashajaanapa achiki awalaajaa saainjala wayuu (Salmo 65:3). Tü pütchikat kófer müsia neʼe aka saaʼin tü waashajaayütkalü achiki, süka sünainpünaain shia taashin atumaa wanee kasa (Éxodo 21:30). Müsia neʼe tü pütchikat griego lýtron, oʼtteʼeraa maluʼulu shia. Ashajünüsü sükajee süliapala saakajitnajatpa wanee kasa (Mateo 20:28, The New Testament in Modern Speech, de R. F. Weymouth)). Na griegokana nachuntawalin pütchikat tüü wanaa sümaa taashin atumawaa wanee surulaat ataʼünnakai paala jee niale wanee achepchiee.