La Biblia ningo peteĩ mensáhe oúva Ñandejáragui, ha ojeskrivíva enterovépe g̃uarã. Upévare jastudia vaʼerã jaikuaa hag̃ua upe ombou vaʼekuépe ko mensáhe (Juan 17:3; 2 Timoteo 3:16). La Bíbliape jatopáta Ñandejára propósito yvyporakuérape g̃uarã ha ko yvýpe g̃uarã (Génesis 3:15; Apocalipsis 21:3, 4).

Ndaipóri ótro lívro peichaite peve ikatúva oipytyvõ la héntepe. La Biblia ñanemomýi japorohayhu, japoroporiahuvereko ha ñanembaʼeporã hag̃ua ñande rapichakuérandi, ha péicha jahechauka umi kualida porã orekóva Jehová. Omeʼẽ avei ñandéve esperánsa ha ñanepytyvõ ñaaguanta hag̃ua umi mbaʼe ijetuʼuvéva jepe. Avei ohechauka umi mbaʼe vai ojejapóva ko múndope ha ndoguerohorýiva Ñandejára (Salmo 119:105; Hebreos 4:12; 1 Juan 2:15-17).

La Biblia ojeskrivi ypy vaʼekue hebréope, araméope ha griégope, ha ojetradusíma kompletoite térã peteĩ párte mas de 3.000 idiómapema. Ndaipóri ótro lívro la Bíbliaicha ojetradusivéva ha oñemosarambivéva ko yvy ape ári. Ha upéicha vaʼerã voi ningo, pórke peteĩ profesía heʼi voi: “Umi notísia porã oñeʼẽva Ñandejára Rréinore [pe mensáhe prinsipál oĩva la Bíbliape] oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mateo 24:14).

Rohechakuaágui iñimportantetereiha pe mensáhe oĩva la Bíbliape, roñehaʼã rotradusi heʼihaichaite umi téxto orihinál, ha ndahaʼéi upévante, roñehaʼã avei ikatu hag̃uáicha hesakã porã ha ndahasýi ojelee hag̃ua. Pe Informasión A omyesakãve koʼã mbaʼe, umi mbohapy párte heʼihápe: “Mbaʼépa ojereko enkuénta ojetradusi hag̃ua la Biblia”, “Umi mbaʼe orekóva ko Biblia”, ha “Mbaʼéicha og̃uahẽ ñandéve la Biblia”. Koʼã pártepe oñemombeʼu umi mbaʼe ojeguerekóva enkuénta ojetradusi hag̃ua ha avei entéro mbaʼe porã orekóva ko Biblia.

Umi ohayhu ha oadoráva Jehovápe ningo oipota peteĩ Biblia ojetradusíva hendaitépe ha ndahasýiva oñentende hag̃ua (1 Timoteo 2:4). Upévare roguenohẽ ko Biblia guaraníme, roipotágui Ñandejára Ñeʼẽ oĩ heta hetave idiómape. Roipotaite ningo ideprovécho ndéve kóva ko Biblia, ha roñemboʼe nderehe ikatu hag̃uáicha releévo ha reñehaʼãvo reheka Ñandejárape, añetehápe retopa hese (Hechos 17:27).