Mateo 16:1-28
16 Upépe oñemboja umi fariséo ha saduseokuéra, ha otantea hag̃ua Jesúspe ojerure chupe tojapo peteĩ milágro Ñandejára rérape.+
2 Jesús okontesta chupekuéra: “Kaʼarupytũ vove peẽ peje jepi: ‘Tiémpo porãta hína koʼẽrõ, pórke pe yvága pytã asy hína’.
3 Pyharevete katu peje: ‘Pe yvága ningo pytã ha ijaraipa hína. Koestedía roʼy ha okýta’. Peẽ pemañávo pe yvágare, peikuaáma tiémpo vaítapa térãpa tiémpo porãta. Péro pehechávo umi mbaʼe oikóva koʼág̃a ndapeikuaái mbaʼépa heʼise.
4 Peẽ henerasión aña ha napeneñeʼẽrendúiva Ñandejárape,* peẽ pehechase milágronte. Péro ndojechaukamoʼãi peẽme ni peteĩ milágro,+ síno pe milágro oiko vaʼekue proféta Jonás rehe añoite pehecháta peẽ”.+ Upémarõ Jesús osẽ oho, ha oheja chupekuéra.
5 Upéi idisipulokuéra ohasa pe ótro ládo, péro hesarái ha ndoguerahái hikuái pan.+
6 Jesús heʼi chupekuéra: “Pejekuidáke umi fariséo ha saduseokuéra levadúragui”.+
7 Upévare idisipulokuéra oñepyrũ heʼi ojupe: “Péicha heʼi ñandéve pórke ndajaguerúi pan”.
8 Jesús opillávo la oikóva, heʼi: “¿Mbaʼére piko peje hína ojupe ndaperekoiha pan? Ajépa pejeroviaʼiete.
9 ¿Neʼĩra piko pepilla mbaʼépa la haʼeséva peẽme? ¿Napenemanduʼái piko aipuru hague 5 pan amongaru hag̃ua 5.000 kuimbaʼépe, ha mboy kanástopa pembyaty upéi?+
10 Térã, ¿napenemanduʼái piko aipuru hague 7 pan amongaru hag̃ua 4.000 kuimbaʼépe, ha mboy kanásto guasu renyhẽpa pembyaty upe rire?+
11 ¿Mbaʼéicha piko ndapepillái nañeʼẽi hague peẽme pan rehe? Che ningo haʼe peẽme pejekuida vaʼerãha umi fariséo ha saduseokuéra levadúragui”.+
12 Upépe ae idisipulokuéra ontende Jesús noñeʼẽi hague chupekuéra pe pan levadúrare, síno oñeʼẽha umi fariséo ha saduseokuéra omboʼévare.
13 Upéi, oike rire Cesarea de Filípope, Jesús oporandu idisipulokuérape: “¿Mbaʼépa heʼi umi hénte pe Yvypóra Raʼy rehe?”.+
14 Haʼekuéra heʼi: “Oĩ heʼíva nde haʼeha Juan el Bautista,+ ótro katu heʼi Elías,+ ha ótro heʼi Jeremías, térã ótro proféta”.
15 Jesús heʼi chupekuéra: “¿Péro peẽ mbaʼe peje, máva piko che hína?”.
16 Simón Pedro okontesta chupe: “Nde hína pe Cristo,+ Ñandejára oikovéva Raʼy”.+
17 Jesús katu heʼi chupe: “Oiméne revyʼaite Simón, Jonás raʼy, pórke ndahaʼéi peteĩ persóna la oikuaaukáva ndéve upéva, síno che Ru oĩva yvágape.+
18 Ha che avei haʼe ndéve: nde hína Pedro.+ Che amopuʼãta che kongregasión peteĩ ita guasu ári,+ ha pe Sepultúra* ndaipuʼakamoʼãi hese.
19 Che ameʼẽta ndéve umi lláve ojeike hag̃ua pe Rréino yvagapeguápe. Ha oimeraẽ mbaʼe rembotýva* ko yvýpe, upéva oñembotýma yvágape. Ha oimeraẽ mbaʼe reavríva* ko yvýpe, upéva ojeavríma yvágape”.
20 Upéi Jesús omanda idisipulokuérape ani hag̃ua omombeʼu avavépe haʼe haʼeha pe Cristo.+
21 Upe guive, Jesús oñepyrũ omombeʼu idisipulokuérape haʼe oho vaʼerãha Jerusalénpe, ha umi kuimbaʼe oporomoakãva,* umi saserdóte prinsipál, ha mboʼeharakuéra leipegua heta ombohasa asytaha chupe ha upéi ojejukataha chupe, péro 3 día haguépe oñemopuʼã jeytaha.+
22 Upémarõ Pedro omohaʼeño Jesúspe, oñepyrũ ojaʼo chupe ha heʼi: “Che Ruvicha, ejeporiahuverekomína nde avei. Ni mbaʼevéicharõ koʼã mbaʼe ndoikomoʼãi nderehe”.+
23 Jesús katu ojere chugui ha heʼi Pédrope: “¡Eñemoĩ che kupépe Satanás! Nde peteĩ estórvo hína che raperãme,* pórke nerepensái Ñandejára opensaháicha, síno repensa la hénte opensaháicha”.+
24 Upéi Jesús heʼi idisipulokuérape: “Oĩramo chemoirũséva, toñembyesarái ijehegui, toasepta umi sufrimiénto,* ha tachemoirũ meme.+
25 Oimeraẽ osalvaséva hekove* omanóta, péro oimeraẽ omanóva* haʼe haguére che disípulo, oikove jeýta.+
26 Añetehápe, ¿mbaʼépe piko ideprovécho peteĩ kuimbaʼépe orekopáramo ko múndope oĩva, péro upéi omano?+ Térã, ¿mbaʼe piko ikatu omeʼẽ peteĩ persóna osalva hag̃ua hekove?*+
27 Pe Yvypóra Raʼy oúta hiʼanhelkuérandi ha Itúa autorida reheve, ha opagáta káda únope hembiapokuére.+
28 Añetehápe haʼe peẽme, koʼág̃a oĩ pende apytépe umi omano mboyve ohechátava pe Yvypóra Raʼy oúrõ hína Irréinope”.+
Nóta
^ Griégope: “peporomoakãratĩva”.
^ Griégope: “reñapytĩva”.
^ Griégope: “rejoráva”.
^ Griégope: “ansianokuéra”.
^ Térã: “chemoñepysanga”.
^ Térã: “hiʼálma”.
^ Térã: “ohundíva hiʼálma”.
^ Térã: “hiʼálma”.
