1, 2. a) ¿Mbaʼépa oreko vaʼerã enkuénta peteĩ kristiáno odesidi mboyve oñemoĩ de nóvio? b) ¿Mbaʼépa hína peteĩ noviásgo? (Ehecha pe nóta “Mbaʼépa heʼise”).

 ¿NDÉPA emendase? Jaikuaa ningo la javyʼa hag̃ua natekotevẽiha ñamenda katuete. Upéicharõ jepe oĩ ermáno ha ermána omendaséva, umíva apytépe imitãva ha ijedáva. Péro emenda mboyve tekotevẽ ejeprepara porã. Eñeporandumína: “¿Aĩmapa amantene hag̃uáicha peteĩ família? ¿Imbaretépa che amista Jehovándi? ¿Chemitãrekópa gueteri?” (1 Cor. 7:36). a Oiméramo reĩma preparádo, ifasilvéta la ne matrimónio osẽ porã hag̃ua.

² Ndahaʼéi la ifasilpáva jatopa hag̃ua peteĩ persóna ñanemoirũ porãtava (Prov. 31:10). Ha oiméramo jatopa peichagua persóna, sapyʼánte ijetuʼu avei ñamoñepyrũ hag̃ua peteĩ noviásgo. b Ko artíkulope jahecháta mbaʼépa ikatu oipytyvõ umi omendasévape otopa hag̃ua iñirũrã ha omoñepyrũ hag̃ua peteĩ noviásgo. Avei jahecháta mbaʼéichapa umi ermanokuéra kongregasionpegua ikatu oipytyvõ umi omendasévape.

 ¿MBAʼÉICHAPA IKATU RETOPA PETEĨ NEMOIRŨ PORÃTAVA?

3. ¿Mbaʼe mbaʼépa oreko vaʼerã enkuénta peteĩ kristiáno omendaséva?

³ Oiméramo remendase, ¿mbaʼépa iporã reikuaa? Reñemoĩ mboyve de nóvio, primeroite voi reikuaa vaʼerã mbaʼeichagua ména térã tembirekópa reipota. ¿Mbaʼérepa? Pórke péicha nderehejamoʼãi ohasa rei peteĩ oportunida porã. Ha avei nereñanoviamoʼãi peteĩ persóna ndaikatumoʼãivandi nemoirũ porã. Jaikuaaháicha, ne ména térã ne rembirekorã haʼe vaʼerã si o si peteĩ kristiáno vautisádo (1 Cor. 7:39). Péro ndahaʼéi ojevautisa haguérente heʼiséva nemoirũ porãtaha. Upévare, eñeporandumína: “¿Mbaʼépa la ahupytyséva che rekovépe? ¿Mbaʼe kualidápa aipota oreko che rembiayhu? ¿Noiméipa cheexihentetereíma hína?”.

4. ¿Mbaʼe mbaʼépa oĩ ojeruréva oñemboʼe jave?

⁴ Oiméramo remendase, katuete oiméne reñemboʼéma raʼe Jehovápe upe témare (Filip. 4:6). Nemanduʼánte vaʼerã Jehová noprometeiha avavépe omeʼẽtaha chupe iména térã hembirekorã. Péro haʼe si ojepyʼapy umi mbaʼe reikotevẽva ha reñandúvare. Ha katuete nepytyvõta reheka aja mávarepa ikatu remenda. Upévare esegíkena emombeʼu Jehovápe umi mbaʼe reipotáva ha reñandúva (Sal. 62:8). Avei eñemboʼe chupe nepasiénsia ha nearandu hag̃ua (Sant. 1:5). Peteĩ ermáno soltéro Estados Unidosgua hérava John, c omombeʼu mbaʼépa heʼi haʼe oñemboʼe jave: “Che haʼe Jehovápe mbaʼe kualidápa aipota oreko che rembirekorã. Ajerure voi chupe toñepresenta chéve la oportunida aikuaa hag̃ua upe persónape. Péro avei ajerure Jehovápe tachepytyvõ koʼág̃ama voi oiko hag̃ua chehegui upéi peteĩ ména ikalidaitereíva”. Peteĩ ermána Sri Lankagua hérava Tania heʼi: “Amaña aja mávarepa ikatu amenda,  añemboʼe Jehovápe ikatu hag̃uáicha chefiél chupe, chepositíva ha avyʼa”. ¿Ha ohasáramo la tiémpo ha nderetopái la ne irũrãmi? Ani rejepyʼapy, Jehová opromete osegitaha okuida nderehe ha nderayhutaha (Sal. 55:22).

5. ¿Mbaʼépa ikatu oipytyvõ umi soltéro ha soltérape oikuaa hag̃ua peteĩ persóna ohayhúva Jehovápe? (1 Corintios 15:58). (Ehecha pe taʼanga).

⁵ La Biblia ñanemokyreʼỹ ‘ñanerembiapo heta hag̃ua ñande Ruvicha servísiope’ (elee 1 Corintios 15:58). Rejapóramo ko téxto heʼíva redisfrutaitereíta rehasávo tiémpo diferénte ermáno ha ermánandi. Péro ndahaʼéi upévante. Péicha avei eguerekóta oportunida reikuaa hag̃ua ótro soltéro ha soltérape oñehaʼãmbaitéva oservi Jehovápe ndéicha. Rejapóvo ikatúva guive rembovyʼa hag̃ua Jehovápe, nde voi avei revyʼa añetéta.

6. ¿Mbaʼe rehepa imanduʼa vaʼerã umi soltéro omendaséva?

⁶ Péro oĩ álgo tekotevẽva eñatende: Rehekáramo jepe ne irũrã, aníkena upévantema voi la iñimportantevéva ndéve g̃uarã (Filip. 1:10). Javyʼa hag̃ua nodependéi ñamendápa térã nahániri, síno odepende pe amista jarekóvare Jehovándi (Mat. 5:3). Ereko vaʼerã avei enkuénta ndesoltéro aja, erekovetaha oportunida rejapo hag̃ua hetave mbaʼe Jehová servísiope (1 Cor. 7:​32, 33). Upévare eaprovecha porãkena upe tiémpo. Jessica, peteĩ ermána Estados Unidosgua, omenda vaʼekue oreko potápe 40 áño ha haʼe heʼi: “Areko vaʼekue heta mbaʼe ajapo vaʼerã Jehová servísiope ha amendaséramo jepe, upéva chepytyvõ vaʼekue asegi hag̃ua avyʼa”.

ESTUDIA PORÃ RAẼ LA KÁSO

7. ¿Mbaʼérepa iporã restudia porã raẽrõ pe persónape? (Proverbios 13:16).

⁷ ¿Mbaʼépa rejapo vaʼerã oimérõ retopáma peteĩ ermáno térã ermána epensáva nemoirũ porãtaha? ¿Upepetéma voi piko reho vaʼerã ere chupe la reñandúva? La Biblia heʼi peteĩ ‘persóna iñarandúva ojasegura porã raẽha’ ojapo mboyve álgo (elee Proverbios 13:16). Upévare iporãta restudia raẽrõ la káso. Mombyrymi guivénte emaña porã pe persónare ha ani eréntema chupe la eñandúva. Peteĩ ermáno hérava Alberto oikóva Países Bájospe heʼi: “La ñañandúva ningo pyaʼeterei ikatu okambia. Upévare iporãvéta jastudia porã raẽrõ pe persónape ani hag̃ua ñañemoĩ de nóvio akãrakúgui reínte”. Avei nderejapuráirõ ikatu rehechakuaa porãve, oimérõ pe persóna ndahaʼemoʼãi pe tembireko térã ména nde reikotevẽva.

8. ¿Mbaʼéichapa peteĩ soltéro ikatu ostudia la káso mombyry guivénte? (Ehecha pe taʼanga).

⁸ ¿Péro mbaʼéichapa ikatu restudia la káso mombyry guivénte? Por ehémplo, umi rreunionhápe térã ojejapo jave umi fiestitaʼi ikatu rehechakuaa mbaʼeichaguápa hína pe persóna, mbaʼéichapa oñekomporta ha ohayhúpa hína Jehovápe. Eñeporandumína: “¿Mávapa iñamigokuéra? ¿Mbaʼe rehepa oñemongeta jepi? (Luc. 6:45). ¿Orekópa umi méta che arekóva avei?”. Ikatu avei eporandu hese umi ansiáno ikongregasionpeguápe térã ótro ermáno iñakãguapývape oikuaa porãva chupe (Prov. 20:18). Ikatu eporandu mbaʼépa ojeʼe hese ha mbaʼe kualidápa oreko (Rut 2:11). Péro estudiaʼi aja upe persónape siémpre ehechauka vaʼerã repororrespetaha. Aníkena eiko hapykuéri tódo el tiémpo, emotĩ chupe ni neentremetído.

9. Reñeʼẽ mboyve peteĩ persóna neinteresávandi, ¿mbaʼe rehepa reĩ vaʼerã segúro?

⁹ ¿Mboy tiémporepa restudiaʼi vaʼerã pe persónape ere mboyve chupe la reñandúva? Pyaʼeterei reñeʼẽrõ hendive ikatu oñepensa nderehe ndepyʼa apuradoha (Prov. 29:20).  Péro ikatu hína pe persóna opilláma eñeinteresaha hese, ha nde eheja ohasaiterei la tiémpo eñeʼẽ hag̃ua. Upéicharõ ikatu oñepensa nandedesididoiha (Ecl. 11:4). Nemanduʼákena reñeʼẽta haguére peteĩ persónandi, ndeʼiseiha remendataha katuete hese. Péro reĩ vaʼerã segúro nde reimemaha remenda hag̃uáicha ha upe persóna ikatuha nemoirũ porã.

10. Oimérõ oĩ oñeinteresáva nderehe péro nde nereñandúi mbaʼeve hese, ¿mbaʼépa rejapo vaʼerã?

¹⁰ ¿Ha oimérõ álgien oñeinteresa hína nderehe? ¿Mbaʼépa ikatu rejapo? Nde nereñandúirõ hese mbaʼeve, entendeka porãkena chupe upéva la rejapóva rupive. Ivaietereíta ningo eikóramo embojuruheʼẽ nde rapichápe oimérõ nde nereñepyrũséi hendive mbaʼeve (1 Cor. 10:24; Efes. 4:25).

11. Umi país oĩhápe umi kostúmbre oñeñeʼẽvare ko párrafope, ¿mbaʼépa ojereko vaʼerã enkuénta?

¹¹ Oĩ umi país umi kariaʼy ha kuñataĩ oikuaámava voi ituakuéra térã ótro ipariénte oelehitaha chupe mávarepa omendáta. Ótro paíspe katu umi pariénte ha amigokuéra oheka la kandidáto térã la kandidáta, opresenta chupekuéra ha upéi haʼekuérama ohecha vaʼerã ojogueraha porãtapa. Oimérõ ojejerure ñandéve jajapo hag̃ua peteĩva koʼã mbaʼe, jarekókena enkuénta mbaʼépa oikotevẽ ha ogusta mokõivévape. Oimérõ epensa etopamaha ne pariénte térã ne amígo irũrã, eñehaʼãmbaitéke eikuaa porã mbaʼeichagua persónapa hína, mbaʼe kualidápa oreko ha iñimportanteveha oĩ porãpa hína Jehovándi. Eheka aja ne pariénte térã ne amígo rembiayhurã, aníkena nderesarái iñimportanteveha mbaʼéichapa oĩ Jehovándi ha ani reiko reheka umi ijestúdio porãva térã iplátavante. Amo ipahápe pe soltéro ha pe soltéra la odesidítava omendátapa ojuehe térãpa nahániri (Gál. 6:5).

¿MBAʼÉICHAPA IKATU REMOÑEPYRŨ PETEĨ NOVIÁSGO?

12. ¿Mbaʼéichapa ikatu ere álgienpe eñemoĩseha de nóvio hendive?

¹² Reñemoĩsérõ de nóvio álgiendi, ¿mbaʼéichapa ikatu ere chupe la reñandúva? d Ikatu ningo ejerure chupe peñemongeta hag̃ua  peteĩ lugár púvlikope térã por teléfono. Ere porã chupe ejegustaha hese ha eikuaa porãseveha chupe (1 Cor. 14:9). Tekotevẽramo emeʼẽ pe persónape tiémpo opensa hag̃ua la peñeʼẽvare (Prov. 15:28). Péro heʼíramo ndéve ndojegustaiha nderehe, errespetákena la isentimiénto.

13. ¿Mbaʼépa ikatu rejapo oĩramo álgien heʼíva ndéve ojegustaha nderehe? (Colosenses 4:6).

¹³ ¿Mbaʼépa ikatu rejapo oĩramo heʼíva ndéve ojegustaha nderehe? Neamávlekena ha ehechauka repororrespetaha. Amo ipahápe ningo pe persóna oñembopyʼaguasu vaʼerã kuri oñeʼẽ hag̃ua nendive (elee Colosenses 4:6). Oiméramo reikotevẽ tiémpo ekontesta hag̃ua, ere porãnte chupe upéva. Péro aníkena emohaʼarõ puku rei chupe (Prov. 13:12). Ha oiméramo nderejegustái hese, ejasegurákena tontende porã upéva péro siémprekena neamávle hendive. Por ehémplo Walter, peteĩ ermáno oikóva Áustriape, heʼi mbaʼépa ojapo peteĩ ermána omombeʼúrõ guare chupe la oñandúva hese. Haʼe heʼi: “Haʼe porã chupe ndajegustaiha hese péro cheamávle hendive. Ensegídama voi añeʼẽ hendive pórke ndaipotái opyta opensa ikatuha mbaʼe roñemoĩ de nóvio algún día. Ha upéi añatendeterei mbaʼéichapa atrata chupe ani hag̃ua antendeka chupe ajegustaha hese”. ¿Péro oimérõ nde ejegusta avei pe persónare? Upéicharõ peñemongeta porã ha peñemoĩ de akuérdo mbaʼéichapa peipota oho hese la pene noviásgo. Ikatu hína pepensa diferénte algúna kósape asegún pene kostúmbre ha hetave mbaʼe.

¿MBAʼÉICHAPA UMI ERMÁNO IKATU OIPYTYVÕ UMI SOLTÉRO HA SOLTÉRAPE?

14. ¿Mbaʼéichapa ikatu ñaipytyvõ umi soltéro ha soltérape?

¹⁴ ¿Mbaʼéichapa entéro umi ermáno kongregasionpegua ikatu oipytyvõ umi omendasévape? Primeroite voi ñañatendeterei vaʼerã mbaʼépa jaʼe (Efes. 4:29). Ñañeporandumína: “¿Aikópa atallaiterei umi soltéro ha soltérare? Ahecha jave peteĩ soltéro ha soltérape oñeʼẽha oñondive, ¿ensegídapa apensa ojegustaha ojuehe?” (1 Tim. 5:13). Aníkena ni mbaʼevéicharõ ñantendeka umi ermánope menoveha hikuái la nomendái haguére. Walter, pe ermáno ñañeʼẽma vaʼekuére heʼi: “Oĩ ermáno heʼíva: ‘Mbaʼére piko neremendáiti, ¡cháke ndekaʼarúma rehóvo!’. Péicha jave umi soltéro oñandu ndojevaloraiha chupekuéra ha ojapurave vaʼerãha hikuái  omenda hag̃ua”. Jahechaháicha iporãitevéta ningo jaheka la oportunida ñamokyreʼỹ ha jafelisita hag̃ua umi ermáno ha ermána soltérope (1 Tes. 5:11).

15. a) Ñaipytyvõ mboyve peteĩ persónape ojuhu hag̃ua iñirũrã, ¿mbaʼépa jareko vaʼerã enkuénta? (Romanos 15:2). (Ehecha pe taʼanga). b) ¿Mbaʼe mbaʼépa reaprende pe vidéogui?

¹⁵ ¿Ha ñapensárõ peteĩ ermáno ha ermána hoʼaitereitaha ojuehe? La Biblia ñanemokyreʼỹ jareko hag̃ua enkuénta umi ótro oñandúva (elee Romanos 15:2). Heta ningo ndoipotái oñepresenta chupe peteĩ kandidáto térã kandidáta, ha ñande jarrespeta vaʼerã upéva (2 Tes. 3:11). Ótro katu oipota oñepytyvõ chupe, péro ndovaléi ñañentremete oimérõ ndojeruréi ajúda (Prov. 3:27). e Ha ótro katu ndoipotái oñepresenta chupe la kandidáto térã kandidáta direktoite. Lidia peteĩ ermána soltéra oikóva Alemániape heʼi: “Ikatu ningo reinvita pe ermáno ha pe ermánape péro éntre heta. Péicha orekóta la oportunida ojokuaa hag̃ua, péro eheja chupekuéra odesidi mbaʼépa ojapóta hikuái”.

16. ¿Mbaʼe rehepa imanduʼa vaʼerã entéro soltéro ha soltéra?

¹⁶ Enterovéva, tahaʼe omendáva térã soltéro, ikatu jaiko vyʼápe (Sal. 128:1). Oimérõ remendase péro neʼĩra ejuhu ne irũrã, esegíkena nerembiapo heta Jehová servísiope. Peteĩ ermána hérava Sin Ji oikóva Macáope, heʼi: “Remendárõ ningo reĩta ne rembireko térã ne ménandi pára siémpre pe paraísope, péro ndesoltérota un tiémporente. Saʼi rasa ningo amo ipahápe upe tiémpo, upévare edisfruta ha eaprovechákena upe aja”. Ha oiméramo reĩma de nóvio, pe artíkulo oúvape jahecháta mbaʼépa ikatu pejapo osẽ porã hag̃ua peẽme pene noviásgo ha pedesidi porã hag̃ua.