CHOONG KEON ha hembireko Julie oreko 35 áñorupi. Ojapo 5 áño haʼekuéra oservi hague oikóvo kómo prekursór rregulár Sýdneype (Australia). Choong Keon heʼi: “Mokõivéva rombaʼapo vaʼekue médio díante ha rorekopaite umi komodida. Upe lugár roikoha itrankílo, ha hiʼarive ndahaʼéi la roʼy ni hakuetereíva. Avei ore hénte ha ore amigokuéra oiko ag̃ui orehegui, ha upéva oregusta”. Péro ko matrimónio haʼetévaicha ndovyʼapáiva. ¿Mbaʼérepa? Oikuaágui ikatuha ojapo hetave mbaʼe Ñandejára servísiope, péro noñanimái hikuái ojapo umi kámbio.

Upéi peteĩ asambléape áño 2009-pe, ohendu hikuái peteĩ diskúrso opokóva ikorasõrekuéra. Upérõ peteĩ diskursánte oñeʼẽ umi ikatúvare ojapo hetave mbaʼe Ñandejára servísiope. Pe ermáno heʼi: “Umi omaneháva ikatu ombojere iveíkulo ijasu térã iderécha gotyo, péro upearã omoarranka ha okuʼe raẽmante vaʼerã. Upéicha avei, ikatu hag̃uáicha Jesús ñandegia ha ñanepytyvõ, tekotevẽ jakuʼe ha ñañehaʼã ñambaʼapove Jehová servísiope”. * Choong Keon ha Julie opensa chupekuéra g̃uarãiteha voi pe diskúrso. Avei upe asambléape oñentrevista peteĩ matrimónio oservívape de misionéro Taiwánpe. Haʼekuéra omombeʼu oĩha gueteri hetaiterei tembiaporã upe tetãme. Choong Keon ha Julie ohendúvo upéva, koʼýte opensa chupekuéra g̃uarãnteha voi umi mbaʼe ojeʼéva.

Julie omombeʼu: “Upe asambléa rire, rojerure Jehovápe taorembopyʼaguasu rova hag̃ua Taiwánpe. Upéicharamo jepe, rokyhyje lénto gueteri. Haʼete voi oréve ku rojepoítava mbaʼe peteĩ pisína pypukúpe roʼytakuaaʼỹre”. Péro Eclesiastés 11:4 tuicha oipytyvõ chupekuéra ojedesidi hag̃ua. Upépe heʼi: “Omaʼẽva yvytúre noñemitỹi, ha omaʼẽva araíre nomonoʼõi ikóga”. Choong Keon omombeʼu: “Roiko rangue ‘romaʼẽnte’, rodesidi ‘roñemitỹ’ ha ‘romonoʼõ’”. ¿Mbaʼépa oipytyvõ raʼe chupekuéra? Oñemboʼe jey jey hikuái Jehovápe, olee heta misionéro rembiasakue ha omondo mensáhe umi ermáno  oho vaʼekuépe oservi Taiwánpe. Upéi katu ovende hikuái iveikulokuéra ha imuevlekuéra. Tres mése haguépe Choong Keon ha Julie ováma Taiwánpe.

Koʼag̃aitérõ oĩ mas de 100 ermáno tetã ambuegua oservíva Taiwánpe, umi lugár oñekotevẽvehápe maranduhárare. Koʼã ermáno oreko éntre 21 a 73 áño, ha ou hikuái Australia, Canadá, Corea, España, Estados Unidos, Francia, Gran Bretaña ha Japóngui. Umíva apytépe oĩ mas de 50 ermána soltéra. ¿Mbaʼépa omomýi koʼã ermáno ha ermána ikyreʼỹetévape oho hag̃ua oservi ótro tetãme? Jahechamína mbaʼépa heʼi hikuái.

Peteĩ prekursóra Canadagua hérava Laura oservi hína Taiwánpe oéste gotyo. Ojapo diez áñorupi, haʼe ndovyʼapái kuri osẽ jave opredika. Koʼág̃a katu heʼi: “Mbaʼéicha voi piko chegustáta, ko saʼi asẽ vaʼekue apredika”. Péro upéi iñamigokuéra oinvita chupe oho hag̃ua hendivekuéra Méxicope opredika hag̃ua un mes. Haʼe omombeʼu: “Upérõ primera ves ahasa heta tiémpo predikasiónpe ha ni che naimoʼãi mbaʼeichaitépa avyʼa”.

Umi mbaʼe ohasa vaʼekue Méxicope omokyreʼỹ chupe ova hag̃ua peteĩ kongregasión oñeʼẽva ótro idiómape Canadápe. Ostudia idióma chino, oho oservi peteĩ grúpo oñeʼẽvape upe idiómape, ha oñepyrũma ojeprepara ova hag̃ua Taiwánpe. Upéi, septiembre 2008-pe ováma katu upépe. Laura omombeʼu: “Un áñorupi ohasa añeñandu hag̃ua che rogapeguáicha ko lugárpe. Péro koʼág̃a ni napensái aha jeývo Canadápe”. Ha ¿mbaʼépa opensa pe predikasión rehe? Haʼe heʼi: “Chegustaiterei. Javyʼa ningo jahechávo mbaʼéichapa peteĩ persóna okambia ohóvo oikuaa rire Jehovápe. Ha aservi rupi koʼápe, aipytyvõma heta persónape oñemoag̃ui hag̃ua Ñandejárare”.

Brian ha hembireko Michelle oreko 30 áño rasami. Ojapo ocho áñorupi haʼekuéra ova hague Estados Unídosgui oservi hag̃ua Taiwánpe. Ñepyrũrã  haʼete chupekuéra ndohupytýiva mbaʼeveguasu predikasiónpe. Péro peteĩ ermáno aréma oservíva misionéroramo heʼi chupekuéra: “Pehejáramo peteĩ tratádo jepe, pepensa vaʼerã upe tapicha ikatuha hína primera ves ohendu peteĩ mbaʼe Jehovágui, ha upéva ningo tuichaiterei mbaʼe”. Pe ermáno heʼi vaʼekue omokyreʼỹeterei Brian ha Michéllepe. Ótro ermáno katu heʼi chupekuéra: “Ani hag̃ua peñedesanima, ani pekalkula mbaʼépa peaprende káda día, síno káda asambléape pekompara vaʼerã mbaʼéichapa peaprendeve pehóvo pe idióma chino”. Brian ha Michelle oñehaʼã ojapo upéicha, ha koʼág̃a g̃uarã mokõivéva ikatupyryvéma, ha upéicha oipytyvõ porãve hikuái umi héntepe.

¿Mbaʼépa ikatu nemokyreʼỹ reaprende hag̃ua ambue idióma? Eñehaʼã evisita peteĩ tetã rehosehápe reservi. Eho umi rreuniónpe, esẽ epredika umi ermánondi ha ehasa tiémpo hendivekuéra. Brian heʼi: “Rehechakuaávo oĩha heta hénte ohenduséva pe marandu porã, ha mbaʼéichapa umi ermáno upepegua nderayhu, reñanimáta reaprende hag̃ua iñidióma ha reváta upépe reservi hag̃ua”.

Heta prekursór oho vaʼekue oservi Taiwánpe omboʼe inglés ikatu hag̃uáicha oñemantene. Kristin ha Michelle katu odesidi ovende pira. Kristin heʼi: “Che ningo arakaʼeve ndajapóiva koʼã mbaʼe, péro ko traváho rupive ikatu rosegi roservi Jehovápe ko tetãme”. Ohasávo pe tiémpo, Kristin ha Michelle okonsegíma heta kliénte. Ko traváho ndoipeʼaguasúi chuguikuéra itiémpo, upéicha rupi mokõivéva ikatu ojapo iprekursorádo ha ojededikave pe tembiapo iñimportantevévape: oipytyvõ umi héntepe oikuaa hag̃ua Jehovápe.

William ha Jennifer oiko vaʼekue Estados Unídospe, ha ojapo siete áño ova hague hikuái Taiwánpe. William omombeʼu: “Heta mbaʼe ningo ijetuʼu oréve, por ehémplo roaprende vaʼerã ótro idióma, rojapo ore prekursorádo, oĩ avei heta tembiapo kongregasiónpe ha rombaʼapo vaʼerã roñemantene hag̃ua”. ¿Mbaʼépa ojapo hikuái okumplipa hag̃ua koʼã mbaʼe ha osegi hag̃ua vyʼapópe iservísio? Oñehaʼã ohupyty hikuái umi mbaʼe ikatúvante. Haʼekuéra ohechakuaa tekotevẽha ipasiénsia ijehe oaprende aja pe idióma chino. Ha upéva oipytyvõ chupekuéra ani hag̃ua oñedesanima opensáramo jepe sapyʼánte ndoprogresaguasuiha hikuái.

William imanduʼa peteĩ superintendénte omeʼẽ hague chupe ko konsého: “Pevyʼa umi mbaʼe pehupytývare”. Ñamoĩramo peteĩ méta, javyʼa vaʼerã umi mbaʼe jahupytývare jahávo Jehová servísiope. William heʼi ko konsého oipytyvõ hague chupekuéra ojepokuaa hag̃ua upe lugárpe, osegi hag̃ua umi suherénsia omeʼẽva umi ermáno ikatupyrýva ha okambia hag̃ua tekotevẽhápe. Péicha oipytyvõ porãve ikongregasiónpe ha umi hénte iterritorioguápe. Haʼe heʼi avei: “Ko konsého oremokyreʼỹ ikatu hag̃uáicha roñemotiémpo roikuaave hag̃ua ko lugár porãite roserviha”.

Megan ningo peteĩ prekursóra soltéra Estados Unidosgua ha oñehaʼã avei oñeʼẽ porãve hag̃ua chínope. Ojapoháicha William ha Jennifer, haʼe avei oñehaʼã ovyʼa umi mbaʼe ohupytývare. Káda fin de semána osẽ jepi opredika peteĩ grúpondi pe puérto tuichavévape oĩva Taiwánpe, hérava Kaohsiung. Megan opredikáma heta várkope umi peskadór oúvape Bangladés, Filipinas, India, Indonesia, Tailandia ha Vanuátugui. Haʼe omombeʼu: “Umi peskadór ningo ndopytaʼaréi pe puértope. Upévare roñehaʼã rostudia la Biblia hendivekuéra upépe voi. Ikatu hag̃uáicha romboʼe hetavépe, sapyʼánte amboʼe cuatro térã cinco persónape una véspe”. ¿Mbaʼetekópa oho hese oaprendévo pe idióma? Haʼe heʼi: “Hiʼãnte chéve aaprende pyaʼeve, péro  añehaʼã chemanduʼa peteĩ ermáno heʼi vaʼekuére chéve: ‘Jajapóramo ikatúva guive, Jehová oñenkargáta osẽ porã hag̃ua ñandéve’”.

Ova mboyve ótro tetãme, peteĩ ermána Gran Bretañagua hérava Cathy, ohecha raẽ mbaʼe paíspa isegurovéta peteĩ soltérape g̃uarã. Oñemboʼe Jehovápe ha oskrivi heta sukursálpe oporandu hag̃ua ndaipeligrósoipa upe tetã oho hag̃ua oservi upépe. Upéi orresponde chupe hikuái, haʼe olee porã umi kárta ha odesidi ova Taiwánpe.

Áño 2004-pe, Cathy ova Taiwánpe orekórõ guare 31 áño. Upépe haʼe oiko sensillomi. Cathy imanduʼa: “Aporandu umi ermánope moõpa ikatu ajuhu varatove frúta ha verdúra. Péicha orrendive chéve che pláta”. ¿Mbaʼépa oipytyvõ chupe oñekontenta hag̃ua umi mbaʼe orekomívarente? Haʼe heʼi: “Añemboʼe Jehovápe ha ajerure chupe tachepytyvõ añekontenta hag̃ua umi mbaʼe ahupytývare haʼu hag̃ua ha amonde hag̃ua, jepe isensillomi ha ndahepýi. Ha Jehová ombohovái chéve che orasión. Chepytyvõ ahechakuaa hag̃ua mbaʼépa añetehápe aikotevẽ ha avei avyʼa hag̃ua ndarekóiramo jepe opa mbaʼe aipotáva. Adesidi rupi aiko péicha, ikatu añemeʼẽmbaite Jehová servísiope, ha upéva chembovyʼaiterei”.

Jahechaháicha, Cathy ndahaʼéi oñembyasy ni osufríva ndorekói haguére heta mbaʼe, upéva rangue haʼe heʼi: “Koʼápe oĩ hetaiterei ohendúva pe marandu porã, ha upéva chembovyʼaiterei”. Pe siuda oñepyrũ haguépe oservi de prekursóra og̃uahẽre Taiwánpe, oĩ vaʼekue mokõi kongregasión chína. Koʼág̃a g̃uarã katu oĩma siete. Cathy heʼi: “Koʼẽ koʼẽre ningo avyʼave ikatu haguére aipytyvõ umi héntepe oikuaa hag̃ua Jehovápe ha ahechávo mbaʼéichapa heta hetave umi kongregasión”.

¿Mbaʼépa oiko raʼe Choong Keon ha Júliegui? Ñepyrũrã Choong Keon opensa ndaideprovechoguasuiha kongregasiónpe noñeʼẽporãi rupi chino. Péro umi ermáno upepegua nopensaiete upéicha. Haʼe omombeʼu: “Ore kongregasión ojedividírõ guare, che aservi de siérvo ministeriál ha oñemeʼẽ chéve heta tembiapo. Upérõ ahechakuaa añetehápe aserviha peteĩ lugár oñekotevẽvehápe”. Upéi opukavy ha heʼi: “¡Avyʼaiterei aikuaávo chedeprovechoha kongregasiónpe ha oikotevẽha cherehe hikuái!”. Koʼág̃a Choong Keon oservíma kómo ansiáno. Julie katu heʼi: “Koʼág̃a rovyʼa añete ha rohechakuaa rodesidi porã hague. Ore roju kuri roipytyvõ hag̃ua, ha amo ipahápe haʼekuéra la oremokyreʼỹva. ¡Neʼĩrava peichaite peve rovyʼa! Hetaiterei mbaʼe porãma rohasa ha roagradeseterei Jehovápe ikatu haguére roservi chupe koʼápe”.

¿Remohuʼã potaitémapa nde koléhio ha repensáma hína mbaʼépa rejapóta upe rire? ¿Ndépa neremendái gueteri ha reservise ndedeprovechove hag̃uáicha Jehová organisasiónpe? ¿Reipotápa ne família oexperimenta umi mbaʼe omombaretétava ijerovia? Oiméramo rejehuviláma, ¿nahiʼãipa ndéve reipuru ne experiénsia reipytyvõ hag̃ua nde rapichakuérape? Heta hendárupi oñekotevẽterei umi ermáno oipytyvõ vaʼerã predikasiónpe. Redesidíramo rejapo hetave mbaʼe Ñandejára servísiope ha reváramo umi lugár oñekotevẽvehápe, katuete rehupytýta hetaiterei mbaʼe porã.