No. Ñandejára ndoguerohorýi entéro rrelihión. La Bíbliape oĩ heta ehémplo ohechauka porãva upéva. Oĩ mokõi kláse de rrelihión ndogustaietéva Ñandejárape.

1. Umi rrelihión oadoráva dios fálso

 La Biblia heʼi voi umi oadoráva umi dios fálsope ojapoha “vyrorei”, álgo “ndovaléiva mbaʼeverã” ha “ndaideprovéchoiva” (Jeremías 10:3-5; 16:19, 20). Ñandejára Jehová a heʼi vaʼekue voi ipuévlo Israélpe: “Chéve añoite cheadora vaʼerã ha ndereguerekói vaʼerã ótro dios” (Éxodo 20:3, 23; 23:24). Ha umi israelita oadorárõ guare ótro dióspe, “Jehová ipochyeterei hendivekuéra” (Números 25:3; Levítico 20:2; Jueces 2:13, 14).

 Ñandejára koʼag̃aite peve oñeñandu gueteri upéicha ohecha jave umi héntepe oadora umi dios fálso (1 Corintios 8:5, 6; Gálatas 4:8). Haʼe omanda voi umi oservisévape chupe ohejaite hag̃ua umi rrelihión fálsa, ha anivéma hag̃ua ojeheʼa hese. Upévare la Biblia heʼi voi: “Pesẽke ijapyteguikuéra, ha pejeíke chuguikuéra” (2 Corintios 6:14-17). Oiméramo siérto la Ñandejára oguerohory entéro rrelihión, ¿mbaʼérepa omeʼẽta peichagua mandáto umi oservisévape chupe?

2. Umi rrelihión oadoráva Ñandejárape, péro ndahaʼéi haʼe oipotaháicha

 Sapyʼánte umi israelita oadorámi vaʼekue Ñandejárape ojapoháicha umi rrelihión fálsa oadora jave idioskuérape. Péro Jehovápe ndogustaiete vaʼekue upéva, ha ndoaseptái pe adorasión omeʼẽva chupe hikuái (Éxodo 32:8; Deuteronomio 12:2-4). Jesús katu ojaʼo vaʼekue umi líder rrelihiósope ha heʼi oĩ vaiha oadora lája hikuái Ñandejárape. Haʼekuéra oñemborrelihiosoiterei guaʼu, péro nokumplíri “umi mbaʼe iñimportantevéva oĩva pe léipe, umíva hína: hustísia, poriahuvereko ha jerovia” (Mateo 23:23).

 Ha upeichaite avei koʼág̃arupi, Ñandejára oguerohory pe rrelihión ojegiávape pe añetegua oĩvare la Bíbliape añoite (Juan 4:24; 17:17; 2 Timoteo 3:16, 17). Umi rrelihión nomboʼéiva la Biblia heʼíva añetehápe omomombyry guei la héntepe Ñandejáragui. Oĩ heta enseñánsa rrelihiósa la hénte opensáva ouha la Bíbliagui, por ehémplo pe trinida, ñane álma nomanoiha, ha ojesufriha pe infiérnope. Péro koʼã enseñánsa añetehápe ojekopiánte umi oadorávagui umi dios fálsope. Umi rrelihión omboʼéva koʼã enseñánsa añetehápe ndovaléi mbaʼeverã, térã ndaideprovéchoi, pórke haʼekuéra oheja rei Ñandejára mandamiénto osegi hag̃ua umi kostúmbrente (Marcos 7:7, 8).

 Ñandejárape ombojeguaru umi rrelihión hovamokõiva (Tito 1:16). Pe rrelihión verdadéra ndahaʼéi osegíva umi kostúmbre reínte, síno oipytyvõ la héntepe oñemoag̃ui hag̃ua Ñandejárare. Upévare la Biblia heʼi: “Peteĩ kuimbaʼe opensáramo irrelihiosoha péro ndojokói ijuru, oñembotavy ijupe voi, ha pe adorasión omeʼẽva Ñandejárape ndovaléi mbaʼeverã. Pe rrelihión ipotĩva ha ndaikyʼáiva ñande Ru Ñandejára renondépe haʼe hína kóva: ñañangareko umi viúdare ha umi ityreʼỹvare ohasa asy jave, ha ñañatende meme ani hag̃ua ko múndo ñanemongyʼa” (Santiago 1:26, 27, notakuéra).