Baabule La Tɔɣɛ Burenya Yele La Wani?

ŊMƐ

Baabule la lebesego

Baabule la ka pa’alɛ dabeserɛ sɛka ti ba dɔɣɛ Yezu. La me ka yele to yeti to dita a dɔɣum daarɛ wuu McClintock and Strong’s Cyclopedia n yele se’em la. La yeti: “Naayinɛ ka pa’alɛ nɛreba ti ba dita Burenya. La me daɣɛ sɛla n ze’ele NT [n de New Testament] la poan.”

Ba viisɛ diimi yɛla baŋɛ ti Burenya ze’ele la baɣa kãabegɔ poan. Baabule la basɛ ti to baŋɛ ti, to san doose sore sɛka n ka nari poan pu’usa Naayinɛ, la ni daam en mɛ.—Yɛhega 32:5-7.

Burenya n pi’ilum se’em

Ban diti Yezu dɔɣum daarɛ: “Yuun kɔbesɛka n deŋɛ nɛŋa Kristakɔma la yuun ka di [Yezu] dɔɣum daarɛ, se’ere n sɔi la ba yuun bisɛ ti bala dela baɣa tuuma.”—The World Book Encyclopedia.
December 25: Sɛla ka boi n pa’alɛ ti ba yuun dɔɣɛ Yezu la December 25. Pu’usegɔ nɛŋadoma n yuun loe dabeserɛ wa, ti la kɔ’ɔn makɛ la baɣadoma de’eŋo ti ba yuun ni dɛ’ɛna ɔɔrɔ saŋa.
Ban bɔ’ɔri bo’olum, dita ge me ita paati: The Encyclopedia Americana yeti: “Saturnalia dela Aromdoma de’eŋo ti ba yuun ni dɛ’ɛna December tiŋasuka poan. La ze’ele la de’eŋo kuna poan ti Burenya yɛla zo’e zo’e kɔ’ɔn pɔsɛ na. De’eŋo kuna poan ti ba yuun ni dita, bɔ’ɔra bo’olum ge me nyɔ̃’ɔra candles.” Encyclopædia Britannica la yeti ba san ta dɛ’ɛna Saturnalia, “tuuma la leebego yuun ka le bɔna.”
Ba ni laŋɛ la candle zo’e zo’e Burenya saŋa: The Encyclopedia of Religion yeti Europe bɔba, ba ni laŋɛ la “candle to’ore to’ore la evergreens” maalɛ ba yɛa soŋa ti la ta’an sa’ɛ kolekpabɛ’ɛsi ge ti ba me ta’an dɛ’ɛna ba de’eŋo la soŋa soŋa.
Mistletoe, holly (puuro): “Gauls la yuun bisɛ ti mistletoe dela baɣerɛ bɔ’ɔra ba. Ba yuun yeti ku tari la paŋa n wan ta’an tibera ba ge tɛ’ɛla ba. Evergreen la me n de puo la dela sɛla ti ba yuun pu’usera n wan ta’an basɛ ti yintule le yese na.”—The Encyclopedia Americana.
Burenya tia: “Europe tiŋa nɛreba n yuun kãaberi tiisi ge nyaa ta lebege Kristakɔma la zuo, tiisi kãabegɔ yuun kelum bɔna mɛ.” Sore deyima poan ti ba yuun ni eŋɛ pa’alɛ ti ba kãaberi tiisi dela, ba yuun ni “dekɛ la Yule tia ta ze’ele deo zaɣanyɔren bii deo poan ɔɔrɔ saŋa.”—Encyclopædia Britannica.