Ayinamɛ lɛ sù tawun gandó lěxe a gǎn ɖoakɔ́nna awufiɛsà okú mɛvivɛ́ ɖé tɔn ɖó go—ɖélɛ gǎn nyɔ́ ná we hú ɖevo lɛ. Vlavo ná alixo xe mɛ mɛɖokpóɖokpó nɔ blawu te gbɔnvo ɖilě mǐ ko ɖɔ wayi ɖó wutu wɛ. Ayinamɛ xe nyɔ́ ná mɛɖé gǎn nɔma nyɔ́ ná mɛɖévo.

Etomɔco, anǎɖemɛ tangan ɖélɛ tíin xe ko nyɔ́ ná mɛsusu. Ayinamɛ exelɛ wɛ mɛxe nɔ namɛ ayinamɛ gandó lěxe yè sɔgǎn ɖoakɔ́nna awubla ɖó go lɛ nɔ saba ná, kpóɖɔ ayinamɛ exelɛ sɔgbe xɛ́ nǔxe tíin to owě nǔnywɛ tɔn xe ko dóxó húgǎn lɔ, yèɖɔ Biblu mɛ bo ka sɔ́ nyɔ́ tawun.

• Wenywɛtɔ́ ɖélɛ mɔɖɔ enɛ wɛ nɔ gɔalɔ húgǎn nadó ɖoakɔ́nna awufiɛsà xe okú mɛvivɛ́ ɖé tɔn nɔ hɛnwa. Amɔ̌, é gǎn nɔ jlo we hweɖélɛnu nadó nɔ ɖěwe co. A tlɛ gǎn nɔ gblexomɛ to hweɖélɛnu dó mɛxe to tintɛnkpɔ́n nadó gɔalɔna we lɛ go. Ni ma kpaca we blo.

• Ma nɔ mɔɖɔ mɛɖévo lɛ ɖóná to dè we to hwelɛkponu blo, mɔ masɔ nɔ hɔ̀nna yé kpéte blo. Ná a gǎn wá ɖó hudó yětɔn to nukɔn mɛ. Enɛwutu, nɔ ɖike yé ni nyɔ́ nǔxe a jlo kpó nǔxe a ma jlo kpó.

• Nɔ nyɔ́ hwenu xe a ná zán xɛ́ mɛɖévo lɛ kpó hwenue a ná jlo nadó nɔ děwe co kpó, sɔgbe xɛ́ nuhudó towe.

AYINAMƐ: “Omɛ awe kpɔ́nte hú mɛɖokpó, . . . Ná enyí ɖokpó to yé mɛ jayǐ, omɛ awetɔ́ sɔgǎn zé hatɔ́ etɔn cite.”—Yɛhwexoɖɔtɔ́ 4:9, 10.

• Núɖùɖù ɖagbe ɖùɖù nɔ gɔalɔ nadó ɖoakɔ́nna awufiɛsà xe okú mɛvivɛ́ ɖé tɔn nɔ hɛnwa. Nɔ ɖù atín-sínsɛ́n lɛ, omá lɛ, gɔ́na núɖùɖù hunsinɖagbe tɔn lɛ.

• Nɔ nù osin susu.

• Enyi onǔ ma nɔ nyɔ́ ɖù ná we sɔmɔ, nɔ ɖùnú vuɖevuɖe hwɛhwɛ. Dǒto ɖé gǎn sɔ ná we amasin xe ná ná we vitaminu ɖélɛ. a

• Zɔnlinzinzin kpó awuyiya kpó gɔ́na nuwiwa lanmɛyiya tɔn ɖevo lɛ gǎn gɔalɔna mɛɖélɛ nadó ɖe awufiɛsà kpò. Exe gǎn zɔ́n bɔ mɛɖélɛ nɔ mɔ hwenu nadó lɛnnukpɔ́ndó mɛvivɛ́ xe kú lɔ jí kavǐ ɖe ayixa sɔ́n é ji.

AYINAMƐ: “Mɛɖékpókpé ma nɔ gbɛ́wǎnna agbasa eɖetiti tɔn gbeɖe; cigbǎ é nɔ ná ɛn núɖùɖù bo nɔ wlebòna ɛn.”—Efesunu lɛ 5:29.

• Amlɔn nɔ wà ɖagbe tawun, titewungbe ná mɛxe to awubla lɛ, ná awubla nɔ zɔ́n bɔ onǔ nɔ cikɔnamɛ tawun.

• Nɔ acejí gandó nue mɛ caféine te kavi ahàn sínsínnyɛ nùnù go, ná é gǎn zɔ́n bɔ a ná bà amlɔn kpò.

AYINAMƐ: “Gbɔjɛ vuɖe kpɔ́nte hú kanvinván zɛjlɛ̌go kpó wezundidó to jɛhɔn godo kpó.”—Yɛhwexoɖɔtɔ́ 4:6.

• Nywɛ ɖɔ alixo xe mɛ mɛɖokpóɖokpó nɔ blawu te gbɔnvo. Enɛwutu, hyɛ lɔsu wɛ ná ɖe ayinamɛ xe ná nyɔ́ ná we húgǎn.

• Mɛsusu nɔ mɔɖɔ xoɖiɖɔ ná mɛɖévo lɛ gandó awubla yětɔn go wɛ ná gɔ́alɔna yé húgǎn, amɔ́ mɛɖévo lɛ ma nɔ jlo ná ɖɔxo gandego. Wenywɛtɔ lɛ lɔsu ma kɔngbedókpɔ́ dó linlɛn exe jí, mɛɖélɛ ɖɔ ɖɔ xoɖiɖɔ gandego nɔ wà ɖagbe bɔ mɛɖévo lɛ ɖɔ lala. Enyí a jlo ná ɖɔ xomɛ ná mɛɖé gandó awubla towe go bo to awuxwle, a gǎn bɛ́jɛeji vuɖevuɖe bo nɔ ɖɔ ɖélɛ to nǔxe to ahun jí ná we lɛ mɛ ná xɔ́ntɔn vivɛ́ ɖé.

• Mɛɖélɛ mɔɖɔ enyí yé viavi, é nɔ wà ɖagbe ná yé, amɔ́ mɛɖévo lɛ ma nɔ viavi sɔmɔ bo ka nɔ ɖuto awubla lɔ jí.

AYINAMƐ: “Ahun lɔsu wɛ nɔ nyɔ́ nǔxe to awuvɛ hɛnwa ná ɛn.”—Xóhwinhwɛ́n lɛ 14:10.

• Mɛɖélɛ nɔ cì ahàn sínsínnyɛ kavǐ amasin aɖǐnɔ lɛ zán nadó ɖe awubla yětɔn kpò. Kpɔngbɔ díndín to alixo mɔnkɔ mɛ ma nɔ wà ɖagbe namɛ. Enyí mɛlɔ tlɛ mɔɖɔ é hɛn kpɔngbɔ ɖé wá, be ojlɛ̌ gli tɔn wɛ bɔ é ka ná wá hɛn nuxahun sínsínnyɛ wá. Nɔ dín alixo xe ná wà ɖagbe ná we lɛ nadó ɖuto awufiɛsà towe jí.

AYINAMƐ: “Mì gbɔ mǐ ni klɔ́ míɖe wé sɔ́n hɛnflu . . . lɛkpó mɛ.”—2 Kɔlintinu lɛ 7:1.

• Mɛsusu nɔ mɔɖɔ enyí yé ɖyɔ́ nuwiwa yětɔn lɛ (nadó ɖe ayixa sɔ́n awubla yětɔn jí) ná ojlɛ̌ kleun ɖé (bo wà nuɖevo lɛ xe ná zɔ́n bɔ yé ná wɔnji nǔxe jɔ lɔ go ná ojlɛ̌ ɖé), é nɔ wà ɖagbe ná yé tawun.

• Nadó mɔ kpɔngbɔ ná ojlɛ̌ kleun ɖé, a gǎn jixɔ́ntɔn yɔ́yɔ́ lɛ kavǐ vɔ́ hacincan towe lɛ hɛn sínnyɛ deji, kplɔ́n onǔ yɔ́yɔ́ ɖé, kavǐ nɔ ɖeayiɖai.

• Dile ojlɛ̌ to yìyì, nulɛ gǎn ɖyɔ́. A gǎn ɖoayi é go ɖɔ awubla emitɔn jɛ ɖiɖekpò jí bɔ emi tlɛ nɔ wɔn nǔxe jɔ lɔ to hweɖélɛnu. Ná tawun tɔn, mɔ wɛ yè nɔ gɔ̀ jɛgǎngán vuɖevuɖe ɖó ninyɛ.

AYINAMƐ: “Nulɛkpó wɛ ojlɛ̌ ɖiɖe ɖé tíin ná, . . . ojlɛ̌ ɖé nadó viavi kpóɖɔ ojlɛ̌ ɖé nadó konǔ; ojlɛ̌ ɖé nadó dóavihàn kpóɖɔ ojlɛ ɖé nadó ɖúwe.”—Yɛhwexoɖɔtɔ́ 3:1, 4.

• Ðile é gǎn yawu nyɔ́basí ɖó, vɔ́ nuxe a ko nɔ wà lɛ bɛ́jɛeji.

• Enyí a tindó tito ɖagbe ɖé ná nuwiwa towe lɛ, tayiɖi amlɔndidɔ, azɔ̌nwiwa kpó onǔ ɖevo lɛ kpó, a gǎn jɛ ɖěwe mɛ mɔ jí vuɖevuɖe.

• Nɔ hɛn alɔnu towe ján to nǔxe ná gɔ́alɔna we nadó ɖé awubla towe kpò lɛ wiwà mɛ.

AYINAMƐ: “É ná vɛawu ɖɔ ewɔ ni ɖoayi azán xe é ná nɔgbɛ̀ ná lɛ go, ná Jixwéyɛxwe nǔgbó lɔ ko yí ayǎjɛ ahun etɔn tɔn dó hɛn alɔnu etɔn ján wutu.”—Yɛhwexoɖɔtɔ́ 5:20.

• Mɛsusu wɛ bayi nuɖiɖe sínsínnyɛ lɛ to okú mɛvivɛ́ ɖé tɔn godo tlolo bɔ é wá vɛna yé.

• Enyí é nyɔ́basí, nɔte ná ojlɛ̌ ɖé hwɛkpó dó sɛtɛn, ɖyɔ́ azɔ̌n, kavǐ bɛ́ nutindó mɛxe kú lɔ tɔn lɛ sɛ̀.

AYINAMƐ: “Tito mɛxe nɔ dóvivɛnu tɔn lɛ nɔ tindó kɔdetɔ́n ɖagbe dandan, cigbǎ, mɛxe ma nɔ xwesɔ lɛkpó wɛ ná byɔ́ ohɛ́n mɛ dandan.”—Xóhwinhwɛ́n lɛ 21:5.

• Mɛsusu xe cíɔ kú dó lɛ nɔ mɔɖɔ é nyɔ́ nadó to nuɖélɛ wà xe ná zɔ́n bɔ yè ná nɔ flǐn mɛvivɛ́ xe kú lɔ.

• A gǎn mɔɖɔ é ná wà ɖagbe nadó cinnya fɔto ɖélɛ, kavǐ nutindó ɖélɛ dóvo, kavǐ basí kanɖayǐ nujijɔ ɖélɛ tɔn xe a ná jlo nadó nɔ flǐn.

• Bɛ nuɖélɛ dóvo xe a sɔgǎn nɔ wá kpɔ́n to nukɔn mɛ bɔ é ná nɔ flǐn we ojlɛ̌ ɖagbe xe a zán xɛ́ mɛvivɛ́ towe.

AYINAMƐ: “Flǐn azán xóxó lɛ.”—Deutelonomi 32:7.

• A gǎn tɔ́nhwɛ̀n.

• Enyí é ma nyɔ́basí nadó yì gbɔjɛ ná ojlɛ̌ dindɛn, a gǎn wà nuɖélɛ xe ná hɛn we jaya ná azán ɖokpó kavǐ awe, vlavo a gǎn yì ɖisa, yì ɖeayiɖai to fiɖé, kavǐ yì dla fie a yiwǎnna ɖé kpɔ́n.

• Onú kleunkleun ɖélɛ wiwà gbɔnvona nue a nɔ saba wà lɛ gǎn sɔ gɔalɔna we nadó ɖoakɔ́nna awubla towe.

AYINAMƐ: “Mì wá bo gbɔ mǐ ni sɛ̀ jɛ fie to olá ɖé bo gbɔjɛ vuɖe.” —Malku 6:31.

• Flǐnɖɔ hyɛ lɔsu ná mɔaleyi sɔ́n hwenu ɖékpókpé xe a yizan nadó gɔ́alɔna mɛɖévo lɛ mɛ.

• Nadó bɛ́jɛeji, a gǎn gɔ́alɔna mɛxe go mɛvivɛ́ towe lɔ gandó bɔ yelɔsu to awubla mɛ lɛ, enɛ wɛ xɔ́ntɔn kavǐ hɛnnumɛ lɛ xe ná jlo ɖɔ mɛɖé ni mɔnukúnnujɛ nue to wiwà yé mɛ.

• Alɔgigɔ́na mɛɖévo lɛ bo minyɔxomɛna yé gǎn ná we ayǎjɛ bo gɔ́alɔna we ma nadó xònǔkplá.

AYINAMƐ: “Ayǎjɛ sù to nunamɛ mɛ hú to mimɔyi mɛ.”—Owalɔ lɛ 20:35.

• Awubla gǎn zɔ́n bɔ a ná wá nyɔ́ nue nyí nǔjɔnǔ húgǎn lɛ.

• Yí dótɛnmɛ lɔ zán nadó lɛnnukpɔ́ndó gbɛzǎn xe a to zinzan jí.

• Enyí é byɔ́ ɖomɔ, jɛ ayiɖonugo ná nǔxe a mɔɖɔ yé nyí nǔjɔnǔ húgǎn lɛ jí.

AYINAMƐ: “É kpɔ́nte nadó yì fie gbɛtɔ́ lɛ to aluɛmɛ te hú nadó yì hùnhwɛ tɛnmɛ, ná enɛ wɛ okpódó gbɛtɔvi lɛkpó tɔn, kpóɖɔ mɛxe togbɛ̀ ɖóná hɛn ɛn dó ayixa mɛ.”—Yɛhwexoɖɔtɔ́ 7:2.

Nado dọ hójọhó, nude ma gán de awufiẹsa towe sẹ̀ mlẹnmlẹn. Etomọṣo, susu mẹhe ṣiọ ko kú do lẹ tọn wẹ gán yigbe dọ nudelẹ wiwà, taidi dehe yin sislẹ to hosọ ehe mẹ lẹ ko gọalọna yé nado mọ homẹmimiọn. Nugbo wẹ dọ e ma yin nue nọ de awubla pò lẹpo wẹ yin sislẹ tofi. Amọ́, eyin a yí delẹ to ayinamẹ enẹlẹ mẹ zan, a gán mọdọ yé na hẹn kọgbọ wá na we jẹ obá de mẹ.