1 Timoti 5:1-25
5 A gbẹnuna sunnu mẹhomẹ de sinsinyẹn blo.+ Kakatimọ, nọ vẹ̀ ẹ taidi otọ́ de, sunnu jọja lẹ taidi nọvisunnu,
2 yọnnu mẹhomẹ lẹ taidi onọ̀, yọnnu jọja lẹ taidi nọviyọnnu to walọ wiwe lẹpo mẹ.
3 Nọ do mẹtọnhopọn hia* asuṣiọsi he yin asuṣiọsi nugbonugbo lẹ.*+
4 Ṣigba, eyin asuṣiọsi de tindo ovi lẹ kavi ovivi lẹ, gbọ yewlẹ ni plọn nado nọ do mẹdezejo na Jiwheyẹwhe hia to whédo yetọn titi+ lẹ mẹ whẹ́ podọ nado nọ sú dagbe họ́ mẹjitọ yetọn lẹ po mẹjitọ daho yetọn lẹ po,+ na ehe wẹ yin alọkẹyi to nukun Jiwheyẹwhe tọn mẹ.+
5 Todin, yọnnu he yin asuṣiọsi nugbonugbo bo yin jijodo taidi agbátọnọ ko ze todido etọn do Jiwheyẹwhe mẹ+ bosọ gbọṣi ovẹvivẹ po odẹ̀ po mẹ to ozán po okle po.+
6 Ṣigba, ewọ he pò na gbẹdudu ko yin oṣiọ dile etlẹ yindọ ewọ pò to ogbẹ̀.
7 Enẹwutu, nọ to anademẹ* ehelẹ na yé, na yé nido sọgan tin matin ovlẹ.
8 Na nugbo tọn, eyin mẹdepope ma wleawudaina mẹhe yin etọn titi lẹ, podọ titengbe na mẹhe yin hagbẹ whédo etọn tọn lẹ, ewọ ko mọ́n yise lọ bosọ ylanhu mayisenọ.+
9 Asuṣiọsi de sọgan yin zizedo todohukanji lọ mẹ eyin ewọ ko tindo e whè gbau owhe 60 bo yin asi sunnu dopo tọn dai
10 bosọ tindo oyín dagbe na azọ́n dagbe lẹ wiwà wutu,+ podọ eyin ewọ ko pọ́n ovi lẹ go whẹ́n,+ eyin ewọ ko nọ do gbigbọ johẹmẹ tọn hia,+ eyin ewọ ko nọ klọ́ afọ na omẹ wiwe lẹ,+ eyin ewọ ko nọ gọalọna ayimajainọ lẹ,+ eyin ewọ ko nọ ze ede jo pete na azọ́n dagbe lẹpo.
11 Humọ, a yí asuṣiọsi he gbẹ́ pò to jọja mẹ lẹ do todohukanji lọ mẹ blo, na eyin ojlo zanhẹmẹ tọn yetọn wá lẹzun aliglọnnamẹnu de na haṣinṣan yetọn hẹ Klisti, yé na jlo nado wlealọ.
12 Yé nasọ hẹn whẹgbledomẹ wá yede ji, na yé ko gbẹkọ yise yetọn tintan* go wutu.
13 Mọdopolọ, yé ko sọ plọn nado nọ hẹn alọnu yetọn vò bo nọ to dindanpe sọn whédegbè jẹ whédegbè; mọwẹ, e ma yindọ yé hẹn alọnu yetọn vò kẹdẹ wẹ gba, ṣigba yé sọ yin mẹnudọtọ lẹ bo nọ dádo whẹho mẹdevo lẹ tọn mẹ+ bosọ nọ to ohó he yé ma dona dọ lẹ dọ.
14 Enẹwutu, yẹn jlo dọ asuṣiọsi he gbẹ́ pò to jọja mẹ lẹ ni wlealọ+ bo ji ovi lẹ,+ nado penukundo whédo de go, ma nado na dotẹnmẹ depope nukundiọsọmẹtọ nado mọhodọdo mí go.
15 Na nugbo tọn, mẹdelẹ tlẹ ko lẹkọ nado hodo Satani.
16 Eyin yọnnu yisenọ depope tindo hẹnnumẹ asuṣiọsi lẹ, gbọ ewọ ni gọalọna yé, bọ agbàn lọ ma nado tin to agun lọ ji. To whenẹnu, agun lọ sọgan gọalọna mẹhe yin asuṣiọsi nugbonugbo lẹ.*+
17 Gbọ mẹho he nọ penukundonugo to aliho dagbe mẹ+ lẹ ni yin pinpọn nado jẹna gbégbò whla awe,+ titengbe yé mẹhe nọ wazọ́n sinsinyẹn to hodidọ po mẹpinplọn po mẹ lẹ.+
18 Na adà Owe-wiwe tọn de dọmọ, “Hiẹ ma dona doajànuna oyìnsú de to whenue e to likun tùn,”+ mọdopolọ, “Azọ́nwatọ jẹna azọ́nkuẹ etọn.”+
19 A kẹalọyi whẹsadokọnamẹ de sọta sunnu mẹho de* blo, adavo kunnudide lọ yin kunnudetọ awe kavi atọ̀n tọn.+
20 Nọ wọhẹ+ mẹhe hẹn ylando zun aṣa+ lẹ to gbẹtọ lẹpo nukọn, taidi avase de na mẹhe pò lẹ.*
21 Yẹn degbena we vivẹvivẹ to Jiwheyẹwhe po Klisti Jesu po, gọna angẹli dide lẹ nukọn nado nọ hodo anademẹ ehelẹ matin nuvẹun kavi mẹnukuntahihopọn.+
22 A yawu nado ze alọ towe do sunnu depope ji gbede blo;*+ mọdopolọ a yin mimátọ to ylando mẹdevo lẹ tọn mẹ blo; hẹn dewe do wiweji.
23 A sọ nùsin ba blo,* ṣigba nọ nù ovẹn vudevude na homẹ towe tọn wutu podọ na azọ̀n whẹwhẹ towe tọn wutu.
24 Ylando mẹdelẹ tọn nọ yin yinyọnẹn to gbangba bo nọ dekọtọn do whẹdida mẹ tlọlọ, ṣigba mẹdevo lẹ tọn nọ wá họnwun to godo mẹ.+
25 Mọdopolọ ga, azọ́n dagbe lẹ nọ yin yinyọnẹn to gbangba+ podọ dehe ma wàmọ lẹ ma sọgan gbọṣi nuglọ.+
Nudọnamẹ Odò Tọn
^ To paa mẹ, “Nọ gbògbéna.”
^ Kavi “asuṣiọsi he tin to nuhudo mẹ nugbonugbo lẹ”; enẹ wẹ, mẹhe ma tindo alọgọtọ depope.
^ Kavi “gbedide.”
^ To paa mẹ, “opà he yé do wayi.”
^ Kavi “asuṣiọsi he tin to nuhudo mẹ nugbonugbo lẹ”; enẹ wẹ, mẹhe ma tindo alọgọtọ depope.
^ Kavi “sọta mẹho de.”
^ Kavi “na mẹhe pò lẹ nido sọgan dibu.”
^ Enẹ wẹ, a nọ plaplaji do pà sunnu de blo.
^ Kavi “A sọ nọ nùsin kẹdẹ ba blo.”
