Howhinwhẹn lẹ 20:1-30
20 Mẹṣankotọ wẹ ovẹn,+ bọ ahàn sinsinyẹn yin tasinyẹntọ;+Mẹdepope he dike onú ehelẹ hẹn ẹn danbú ma yọnnuin.+
2 Budonamẹ ahọlu de tọn taidi hùnhlún kinnikinni* de tọn;+Mẹdepope he doadihomẹna ẹn to ogbẹ̀ edetiti tọn zedo owù mẹ.+
3 Mẹhe dapana nudindọn, gbégbò wẹ e yin na ẹn,+Ṣigba, nulunọ lẹpo wẹ nọ zlọn biọ e mẹ.+
4 Adidọnọ ma nọ jlo aigba to avivọ-whenu,Enẹwutu, ewọ na wá biọnu to jibẹwawhé whenu, to whenue e ma na tindo nude.*+
5 Linlẹn he to ahun gbẹtọ tọn mẹ lẹ taidi otọ̀ he siso lẹ,Ṣigba, mẹhe tindo wuntuntun wẹ na dọ̀n yé tọ́n.
6 Mẹsusu wẹ nọ sọalọakọ́n dọ emi tindo owanyi nugbo,Ṣigba, nugbonọ ma yọnmọ.
7 Dodonọ to zọnlinzin to tenọgli etọn mẹ.+
Ayajẹnọ wẹ ovi* etọn lẹ.+
8 Eyin ahọlu sinai to ofìn ji nado dawhẹ,+E nọ yí nukun etọn lẹ do jàn nuylankan lẹpo sẹ̀.+
9 Mẹnu wẹ sọgan dọ dọ: “Yẹn ko klọ́ ahun ṣie wé;+N’wé-ṣeke sọn ylando ṣie mẹ”?+
10 Nujlẹnu oklọ tọn po ojlẹnu he ma sọgbe lẹ po*—Osùnú wẹ awe lẹ yin na Jehovah.+
11 Etlẹ yin yọpọvu* de wẹ, gbọn nuyiwa etọn lẹ dali wẹ e nọ yin yinyọnẹn,Eyin walọ etọn lẹ wé-ṣeke bo sọgbe.+
12 Otó he nọ sènu po nukun he nọ mọnú po—Jehovah wẹ dá awe lẹ.+
13 A yiwanna amlọndidọ blo, hiẹ nikaa wá tlọ biọ ohẹ́n mẹ.+
Hùn nukun towe lẹ dote, hiẹ nasọ tindo nususu nado dù.+
14 “E ma yọ́n, e ma yọ́n!” wẹ nuhọ̀tọ nọ dọ;To whenue e dedo godo, e nọ doawagun to ede mẹ.+
15 Sika tin, aṣápán* susu sọ tin ga,Ṣigba, nùflo he nọ dọho oyọnẹn tọn họakuẹ taun.+
16 Eyin mẹde ko yí ede do basi alọyitọ na jonọ de, yí awù etọn;+Eyin yọnnu jonọ* de wẹ e yí ede do basi alọyitọ na, hò afàsúnú lọ yí sọn e si.+
17 Akla he mẹde mọyi gbọn oklọ dali nọ dotọ́n taun na ẹn,Ṣigba to godo mẹ, onù etọn mẹ nọ gọ́ na okẹ́n.+
18 Wedide dopọ* nọ zọ́n bọ tito lẹ nọ tindo kọdetọn dagbe,*+Podọ yí anademẹ nuyọnẹn tọn do funawhàn towe.+
19 Mẹhẹngbletọ nọ to yìyì pé bo nọ to aṣlihó lẹ dehia;+A dogbẹ́ hẹ mẹhe yiwanna mẹnudidọ* blo.
20 Mẹdepope he hodẹ̀do otọ́ etọn po onọ̀ etọn po,Miyọ́ngbán etọn na yin ṣíṣí to whenue zinvlu do.+
21 Ogú he yin mimọyi gbọn nukunkẹn dali to bẹjẹejiMa na hẹn dona wá to godo mẹ.+
22 A dọ dọ: “N’na yiahọsu oylan tọn!” blo.+
Ze todido towe do Jehovah mẹ,+ ewọ nasọ whlẹn we.+
23 Osùnú de wẹ nujlẹnu oklọ tọn lẹ* yin na Jehovah,Podọ nujlẹgàn he ma sọgbe lẹ ma yọ́n.
24 Jehovah wẹ nọ deanana afọdide gbẹtọ tọn lẹ;+Nawẹ mẹde sọgan mọnukunnujẹ aliho edetiti tọn* mẹ gbọn?
25 Omọ̀ de wẹ e yin dọ mẹde ni gbọn sọmawhe dali dawhá dọ, “Wiwe!”+
Whẹpo do wá lẹnnupọndo nuhe e ko dopà etọn ji to godo mẹ.+
26 Ahọlu nuyọnẹntọ de nọ jàn mẹylankan lẹ sẹ̀+Bo nọ kùn likun-flénú gbọn yé ji.+
27 Miyọ́ngbán Jehovah tọn wẹ gbọfufu gbẹtọ tọn yin,Bo nọ to gbẹtọ homẹ tọn etọn gbeje pọ́n.
28 Owanyi nugbo po nugbonọ-yinyin po nọ basi hihọ́na ahọlu;+Owanyi nugbo wẹ ewọ nọ yí do hẹn ofìn etọn lodo.+
29 Gigo jọja lẹ tọn wẹ huhlọn yetọn,+Podọ whanpẹ yọnhonọ lẹ tọn wẹ owhà yetọn.+
30 Awugble po apà po nọ de* oylan sẹ̀,+Podọ mẹhiho nọ klọ́ gbẹtọ homẹ tọn wé.
Nudọnamẹ Odò Tọn
^ Kavi “kinnikinni winyanwinyan.”
^ Kavi vlavo, “E na dín pọ́n to jibẹwawhé whenu, ṣigba bo ma na mọ nudepope.”
^ To paa mẹ, “visunnu.”
^ Kavi “zannu nujijlẹ tọn voovo awe po nuhẹnnú nujijlẹ tọn voovo awe po.”
^ Kavi “yọpọ sunnu.”
^ Kavi “Eyin jonọ.”
^ Kavi “Ayinamẹ.”
^ Kavi “nọ hẹnai.”
^ Kavi “mẹhe nọ yí nùflo etọn do klọmẹ.”
^ Kavi “zannu nujijlẹ tọn voovo awe.”
^ Kavi “aliho he e na gbọn.”
^ Kavi “súnsún.”
