Whladopo to owhe dopo mẹ, Kunnudetọ Jehovah tọn lẹ po jonọ livi susu yetọn lẹ po lẹdo aihọn pé nọ pli nado bayi hùnwhẹ Oflin okú Jesu tọn, kẹdẹdile e degbe etọn do. (Luku 22:19) Hùnwhẹ ehe nọ hùn dotẹnmẹ dote na mí nado dohia dọ mí yọ́n pinpẹn nuhe Jesu wà bo do ze ogbẹ̀ etọn jo do gbẹtọvi lẹ tamẹ tọn. E sọ nọ do ale he avọ́sinsan etọn gán hẹnwa na mí hia—yèdọ todin podọ to sọgodo.—Johanu 3:16.

 Vlavo a penugo nado yì Oflin lọ tẹnmẹ to owhe ehe mẹ kavi lala, nawẹ a gán mọaleyi sọn okú avọ́sinsan tọn Jesu tọn mẹ gbọn? Jesu plọn mí onú titengbe awe delẹ he mí dona wà:

1.  1. Plọnnu gando Jiwheyẹwhe po Jesu po go. Whenue Jesu to dẹ̀ho hlan Otọ́ olọn mẹ tọn etọn, e dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.”—Johanu 17:3.

2.  2. Yinuwa sọgbe hẹ nuhe a plọn. Jesu zinnudo e ji dọ mí dona nọ yí nuplọnmẹ etọn lẹ do yizan mẹ to gbẹzan mítọn mẹ. Di apajlẹ, e dotana Yẹwhehodidọ Osó ji tọn etọn he diyin lọ, gbọn pipà nina mẹdepope he nọ ‘sè ohó etọn lẹ bosọ nọ basi yé’ dali. (Luku 6:46-48) Mọdopolọ, to nujijọ devo whenu, e dọmọ: “Eyin mìwlẹ yọ́n onú ehelẹ, ayajẹnọ wẹ mì eyin mì nọ basi yé.” —Johanu 13:17.

 Be e jlo we nado plọn nususu dogọ do Jiwheyẹwhe po Jesu po ji ya? Be e na jlo we nado mọ ayinamẹ dagbe lẹ yí nado yọ́n lehe a na yí nuhe plọn a te lẹ do yizan mẹ do ya? Nudelẹ die he gán gọalọna we.

 Hodọdopọ sinai do Biblu ji vọnu he mí nọ tindo hẹ mẹlẹ ko gọalọna mẹsusu nado gbadopọnna Biblu bo yí nuhe yé plọn lẹ do yizan mẹ to gbẹzan yetọn mẹ.

•   Yì adà lọ Lehe Mí Nọ Plọn Biblu hẹ Mẹ Do ji nado yọ́n nususu dogọ gando tito ehe go.

•   Pọ́n video lọ Kuavọ Wá Oplọn Towe nado mọ lehe Biblu pinplọn hẹ Kunnudetọ Jehovah tọn lẹ nọ yì do.

 Kunnudetọ Jehovah tọn lẹ nọ bayi opli yetọn lẹ whlaawe to osẹ dopo mẹ to nọtẹn sinsẹ̀n-bibasi tọn yetọn lẹ, he nọ yin yiylọdọ Plitẹnhọ Ahọluduta tọn. To opli ehelẹ whenu, mí nọ dọhodo Biblu po lehe mí gán yí nuplọnmẹ etọn lẹ do yizan mẹ to gbẹzan mítọn mẹ do po ji.

 Mẹdepope wẹ gán wá opli ehelẹ, e ma biọ dọ a ni yin Kunnudetọ de whẹpo do nọ wá. Sọgbe hẹ ninọmẹ lẹdo he mẹ a te tọn, a gán de nado wá opli lọ tẹnmẹ tlọlọ kavi hodo gbọn kanji.

•   Pọ́n video lọ Etẹwẹ Nọ Jọ to Plitẹnhọ Ahọluduta Tọn? nado mọ adà kleun de to nuhe a gán donukun to opli enẹlẹ ji mẹ.

•   Yì adà lọ Opli Agun Tọn Kunnudetọ Jehovah Tọn lẹ Tọn ji nado mọ nọtẹn opli tọn he sẹpọ we de.

 Hosọ po video susu he to nọtẹn Intẹnẹt tọn ehe ji lẹ po sọgan gọalọna we nado yọ́n nususu dogọ do nuplọnmẹ Jesu tọn lẹ po ale he okú avọ́sinsan tọn etọn hẹnwa na mí lẹ po ji.

 Di apajlẹ, eyin a jlo na yọ́n lehe e yọnbasi do dọ okú dawe dopo gee tọn ni hẹn ale wá na gbẹtọ livi susu lẹ, hia hosọ lọ “Jesu Nọ Whlẹnmẹ​—Gbọnna?” po “Naegbọn Jesu Do Jiya bo Kú?” po, kavi pọ́n video lọ Naegbọn Jesu Do Kú?