Biblu ma yin owe dotozọ́nwiwa tọn de, ṣogan e nọ na ayinamẹ dagbe he nọ hẹn ale wá lẹ. Ayinamẹ ehe gán gọalọna mẹde he do nuhahun apọ̀nmẹ tọn lẹ. Pọ́n apajlẹ delẹ.

“Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.”—MATIU 9:12.

Biblu kẹalọyi dọ mí gán dín alọgọ dotozọ́nwatọ lẹ tọn. Mẹhe to apọ̀nmẹ-zọ̀n jẹ susu wẹ ko mọ kọgbọ na yé sè nudọnamẹ he sọgbe lẹ gando nuhahun yetọn go bosọ yì dotowhé wutu.

“Gbọjẹ vude pọnte hú kanvinván zẹjlẹgo.”—YẸWHEHODỌTỌ 4:6.

Whenu po huhlọn po yiyizan na nuwiwa he nọ yidogọna agbasalilo lẹ gán gọalọ nado nọ ganji dogọ to apọ̀nmẹ. Nuwiwa mọnkọ lẹ bẹ aihundida lanmẹyiya tọn gbesisọ tọn de, núdùdù hunsindagbe tọn lẹ dùdù po amlọndidọ ganji po hẹn.

“Amasin dagbe de wẹ ahun he gọ́ na ayajẹ yin, ṣigba, ayiha he jẹflumẹ nọ hẹnmẹ gbọjọ.”—HOWHINWHẸN LẸ 17:22.

Wefọ tulinamẹ tọn lẹ hihia po yanwle he ma zẹ̀ nugopipe mẹtọn go lẹ po zizedai gán gọalọ nado do ayajẹ to whelẹponu. Eyin a nọ ze  ayiha do onú dagbe lẹ ji, bosọ deji dọ osọ̀ na yọ́n, enẹ na gọalọna we nado doakọnna nuhahun apọ̀nmẹ tọn towe lẹ.

“Nuyọnẹn tin to whiwhẹnọ lẹ dè.”—HOWHINWHẸN LẸ 11:2.

A gán nọ mọdọ emilọsu na emide ma nọ penugo nado wà nuhe nọ jlo emi lẹpo, enẹwutu nọ dike mẹdevo lẹ ni gọalọna we. E yọnbasi dọ họntọn po hẹnnumẹ lẹ po na nọ jlo na gọalọna we, amọ́ yé gán nọma yọ́n nuhe yé na wà. Dike yé ni yọ́n adà tangan he mẹ yé na gọalọna we te lẹ. Ma nọ biọ nususu sọn yé si blo, podọ nọ yọ́n pinpẹn alọgọ yetọn tọn to whelẹponu.

“N’doayi e go dọ n’do nuhahun de, enẹwutu n’yì mọ doto de. E penugo bo mọ nuhe to wiwà mi. Ehe gọalọna mi nado kẹalọyi ninọmẹ ṣie bosọ yọ́n nukunpedomẹgo dotowhé tọn voovo he tin nado penukundo agbasalilo ṣie go dogọ lẹ.”—Nicole, a he to apọṣimẹ-zọ̀n sinsinyẹn de jẹ.

“N’ko mọdọ Biblu hihia whẹwhẹ po asi e po gọalọna mi nado nọ bẹ azán dopodopo jẹeji po linlẹn dagbe he nọ hẹnmẹ lodo lẹ po. Podọ to paa mẹ, to azán he ji e vẹawuna mi nado doakọnnanu te lẹ, wefọ tangan de nọ miọnhomẹna mi.”—Peter, he to apọṣimẹ-zọ̀n jẹ.

“E nọ vẹawuna mi taun nado dọ nuhe pehẹ n’te na mẹdevo lẹ na n’nọ kuwinyan taun wutu. Amọ́ họntọn vivẹ́ ṣie yọnnu de yí sọwhiwhe do dotoaina mi bosọ tẹnpọn nado mọnukunnujẹ ninọmẹ ṣie mẹ. Nado dọ hójọhó, e gọalọna mi nado mọ dee mẹ dogọ, podọ nado mọdọ e ma yin yẹn ṣo wẹ e to mọ na.”—Ji-yoo, he do nuhahun núdùdù dùdù tọn.

“Biblu ko gọalọna mi nado nọ jlẹkaji, bo nọ gbọjẹ ganji bo masọ nọ wàzọn zẹjlẹgo. Nuyọnẹn he to e mẹ ko gọalọna mi nado pehẹ nuhahun he n’do to numọtolanmẹ-liho he nọ to yadona mi lẹ.”—Timothy, he to apọṣimẹ-zọ̀n sinsinyẹn de (TOC) jẹ.