Whẹndo ṣie nọ nọ̀ gbétatò de mẹ to agewaji France tọn he nọ yin Tellancourt. France-nù wẹ otọ́ ṣie, bọ onọ̀ ṣie yin Italie-nù. To whenue n’tindo owhe ṣinatọ̀n, mí sẹtẹn yì lẹdo Lomu tọn he ma hunnukun de mẹ to Italie. To finẹ, nulẹ ma bọawuna whẹndo mítọn. Mẹjitọ ṣie lẹ nọ saba tindo wiwọ́ sinsinyẹn gando nuhahun akuẹzinzan tọn lẹ go.

To whenue n’tindo owhe 15, onọ̀ ṣie na mi tuli nado tọ́n sọn whégbè bo yì jihọntọn lẹ to gbonu. Enẹwutu, n’nọ nọ̀ gbonu na ojlẹ dindẹn lẹ. E ma dẹn bọ n’jẹ ogbẹ́ ylankan do ji. To gbèdopo, dawe de dọnsẹpọ mi taidi họntọn de bo ze amasin adínọ donukọnna mi bọ n’kẹalọyi, na n’ma jlo dọ ni pọ́n mi hlan di yọpọvu wutu. Azán de ma jẹ bọ n’tlọ biọ amasin adínọ ṣiṣizan po fẹnnuwiwa po mẹ. Whla susu wẹ n’yin zinzanhẹ gánnugánnu. Ogbẹ̀ masọ taidi nujọnu to nukun ṣie mẹ ba; podọ okú masọ nọ di nude na mi. N’wá mọ dee to ṣokẹdẹ pete. To whenue n’tindo owhe 16, n’tẹnpọn nado hù dee bo nù ogo blebu dopo ahàn sinsinyẹn de he nọ yin whisky tọn bosọ lọ́n biọ otọ̀ mẹ. N’wá yin didetọn kúdaa-gbẹ̀daa bo nọ mọ na azán atọ̀n.

N’wá mọdọ ogbẹ̀ họakuẹ taun, ṣigba n’gbẹsọ lẹzun danuwatọ bo nọ klọmẹ. N’nọ ze dee jo na gbẹtọ lẹ nado zanhẹ mi bo nọ na yé amasin adínọ to owhé yetọn gbè bosọ nọ fìn nuhọakuẹ he tin to owhé lọ gbè lẹpo. Pipli daho danuwatọ lẹ tọn de nọ yí mi zan nado sà amasin adínọ lẹ to Italie. N’nọ saba jẹ alọ ponọ lẹ tọn mẹ. E taidi dọ ogbẹ̀ ṣie masọ tindo lẹndai de bọ n’masọ sọgan deanana ẹn ba. Ṣigba, n’yise dọ whẹwhinwhẹ́n de janwẹ zọ́n bọ n’do wá gbẹ̀. N’hodẹ̀ hlan Jiwheyẹwhe dọ ni na mi jijọho po ayajẹ po na owhe dopo poun.

To whenue n’tindo owhe 24, n’de nado sẹtẹn yì Angleterre. Na nuwadopọ ṣie hẹ amasin adínọ sàtọ lẹ wutu, ogbẹ̀ ṣie tin to owù mẹ. Whẹpo n’nado sẹtẹn, n’yì dla onọ̀ ṣie pọ́n bọ e paṣa mi nado mọ dawe de he nọ yin Annunziato Lugarà to hodọ hẹ ẹ do Biblu ji. * Na n’ko yọnẹn taidi danuwatọ de wutu, n’dibu bo kàn nuhe gbé e tọ́n sè e. E dọna mi dọ diọdo susu  lẹ wẹ emi ko basi to gbẹzan emitọn mẹ nado lẹzun dopo to Kunnudetọ Jehovah tọn lẹ mẹ, podọ e biọ to asi e nado dopà dọ eyin n’jẹ Angleterre, n’na dín Kunnudetọ lẹ mọ. N’yigbe nado wàmọ. Etomọṣo, tlolo he n’jẹ dọ́n, n’sọ vọ́ jẹ gbẹzan hoho lọ zan ji.

To gbèdopo, n’dukosọ hẹ Kunnudetọ de he to linlinnamẹwe Atọ̀họ̀-Nuhihọ́ lọ Tọn po Réveillez-vous! lẹ po zedonukọnnamẹ to aliho de he ji wayi-wayi nọ sù te to Londres. N’flin opà he n’do na Annunziato bọ n’kanse Kunnudetọ lọ eyin n’sọgan plọn Biblu.

Nuhe n’plọn to Biblu mẹ lẹ jiawu na mi taun. Di apajlẹ, kandai he tin to 1 Johanu 1:9 mẹ whàn mi taun. E dọ gando Jiwheyẹwhe go dọmọ: “Eyin mí yigbe ylando mítọn lẹ tọn, nugbonọ podọ dodonọ wẹ ewọ nado jo ylando mítọn lẹ na mí podọ nado klọ́ mí wé.” Wefọ ehe yinuwado ji e sinsinyẹn na n’mọdọ n’kudiho to walọyizan-liho taun. N’jẹ opli lẹ yì ji to Plitẹnhọ Ahọluduta tọn Kunnudetọ Jehovah tọn lẹ tọn mẹ madọngbàn. Kunnudetọ lẹ yí zohunhun do dokuavọna mi. Whenue n’mọ họntọnjiji ahundopo tọn yetọn​—yèdọ nuhe n’ko to dindin sọn ojlẹ dindẹn die​—yẹnlọsu jlo nado lẹzun apadewhe agun he taidi whẹndo ehe tọn.

Nugbo wẹ dọ e ma vẹawuna mi sọmọ nado jo amasin adínọ ṣiṣizan po gbẹzan fẹnnuwiwa tọn po do, ṣigba nado vọ́ gbẹtọ-yinyin ṣie jlado wẹ vẹawuna mi taun. N’mọdọ n’dona nọ yí mẹtọnhopọn po sisi po do yinuwa hẹ gbẹtọ lẹ. Na nugbo tọn, n’gbẹ́ to avùnho sọta jijọ ylankan delẹ. Ṣigba po alọgọ Jehovah tọn po, n’basi nukọnyiyi. Osun ṣidopo to bẹjẹeji Biblu pinplọn ṣie tọn godo, n’yí baptẹm taidi dopo to Kunnudetọ Jehovah tọn lẹ mẹ, enẹ wẹ to 1997.

To baptẹm ṣie godo, n’wlealọ hẹ awhli de he ṣẹṣẹ lẹzun Kunnudetọ Jehovah tọn ga, he nọ yin Barbara. To whenue dopo to họntọn ṣie hoho lẹ mẹ mọ diọdo he n’basi lẹ, ewọ lọsu jẹ Biblu plọn ji. To ojlẹ de godo, ewọ po mẹdaho etọn yọnnu po lẹzun Kunnudetọ. Enẹgodo, nọviyọnnu onọ̀-daho ṣie tọn he tindo owhe 80 linlán jẹ Biblu plọn ji bo yí baptẹm whẹpo do kú.

Todin, n’to sinsẹ̀n taidi mẹho agun tọn, bọ yẹn po asi ṣie po tin to sinsẹ̀nzọn whenu gigọ́ tọn mẹ bo nọ gọalọ nado plọn Biblu hẹ mẹhe nọ do Italie-gbè to Londres lẹ. To ojlẹ delẹ mẹ, n’nọ tindo numọtolanmẹ apọṣimẹ tọn na gbẹzan he n’ko zan wayi wutu, ṣigba Barbara nọ gọalọna mi taun. N’tindo gbẹzan whẹndo tọn dagbe de todin gọna Otọ́ owanyinọ de, yèdọ nuhe n’ko to dindin sọn ojlẹ dindẹn die. Owhe dopo poun wẹ n’biọ dọ Jiwheyẹwhe ni na mi jijọho po ayajẹ po na, ṣigba e ko na mi onú susugege humọ!