To hosọ debọdo-dego ehelẹ mẹ, mí ko plọn nususu he gọalọna mí nado mọ gblọndo na kanbiọ lọ, Mẹnu Wẹ Jiwheyẹwhe Yin Taun? Jẹnukọn whẹ́, mí ko mọ to Biblu mẹ dọ yinkọ etọn wẹ Jehovah bọ nugopipe etọn he tọ́nta hugan wẹ owanyi. Mí sọ mọ nuhe ewọ ko wà wayi lẹ gọna nuhe e na wá wà na dagbe gbẹtọvi lẹ tọn. Nugbo wẹ dọ nususu wẹ gbẹ́ pò he mí gán plọn gando Jiwheyẹwhe go, amọ́ e gán paṣa we dọ dagbe tẹwẹ onú ehelẹ yinyọnẹn na hẹnwa na we.

Jehovah dopà na we dọ “eyin hiẹ dín in, ewọ na dike bọ hiẹ na mọ ẹn.” (1 Otànnugbo lẹ 28:9) Yí nukun homẹ tọn do pọ́n dagbe he a na mọ eyin a dín Jiwheyẹwhe bo yọ́n mẹhe nkọ ewọ yin, a na penugo nado “jihọntọn pẹkipẹki hẹ” Jehovah! (Salmu lẹ 25:14) Dagbe tẹlẹ wẹ họntọnjiji hẹ ẹ na hẹnwa na we?

Ayajẹ nugbonugbo. Jehovah yin yiylọdọ “Jiwheyẹwhe ayajẹnọ.” (1 Timoti 1:11) Eyin a jihọntọn hẹ ẹ bo hodo ali etọn lẹ, e na hẹn ayajẹ nugbonugbo wá na we bo na yin dagbe na we to numọtolanmẹ-liho, to agbasa-liho podọ to apọ̀nmẹ. (Salmu lẹ 33:12) A nasọ penugo nado tindo ayajẹ to gbẹ̀mẹ eyin a nọ họ̀nna gbẹzan ylankan zinzan bo nọ zan walọ dagbe bosọ nọ jihọntọn hẹ mẹdevo lẹ. Podọ a na wá kọngbedopọ hẹ Salmu-kantọ lọ he dọmọ: “E yọ́n na mi nado dọnsẹpọ Jiwheyẹwhe.”—Salmu lẹ 73:28.

E na yiwanna we bosọ gọalọna we. Jehovah dopà na mẹhe nọ sẹ̀n ẹn lẹ dọmọ: “Yẹn na ze nukun ṣie do ji we bo na na we ayinamẹ.” (Salmu lẹ 32:8) Enẹ dohia dọ Jehovah na nọ gọalọna mẹhe nọ sẹ̀n ẹn lẹ dopodopo bo na nọ na yé nuhe sin hudo yé do. (Salmu lẹ 139:1, 2) Eyin a ko gbẹ́ jihọntọn hẹ Jehovah, a na mọdọ ewọ na nọ gọalọna we to whelẹponu.

Sọgodo dagbe de. Gbọnvona dọ Jehovah Jiwheyẹwhe na na we ayajẹ po pekọ po todin, e nasọ gọalọna we nado tindo sọgodo dagbe de. (Isaia 48:17, 18) Biblu dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.” (Johanu 17:3) To ojlẹ awusinyẹn tọn ehelẹ mẹ, todido he Jiwheyẹwhe na mí lọ gán yinuwa di dòtin de he na ‘na mí nujikudo bo hẹn mí lodo.’—Heblu lẹ 6:19.

Vude poun die to nuhewutu mí dona yọ́n Jiwheyẹwhe ganji bo jihọntọn pẹkipẹki hẹ ẹ lẹ mẹ. A gán dọho hẹ dopo to Kunnudetọ Jehovah tọn lẹ mẹ kavi yì jw.org ji nado mọ nudọnamẹ devo lẹ he na gọalọna we.