“OJIJẸ lọ sù, ṣigba azọ́nwatọ lẹ ma sù. Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.” (Luku 10:2) Hogbe ehelẹ he Jesu dọ sọn nudi owhe 2 000 die sọgbe pẹẹ hẹ lehe ninọmẹ nulẹ tọn te do to Birmanie to egbehe. Gbọnna? To Birmanie, nudi wẹnlatọ 4 200 gee wẹ to wẹndagbe lọ lá na gbẹtọ livi 55.

Ṣigba, Jehovah “Ogán jibẹwawhé lọ tọn,” ko whàn ahun mẹmẹsunnu po mẹmẹyọnnu po kanweko susu lẹ tọn sọn awà voovo lẹ ji bọ yé wá otò he tin to Hùwaji-whèzẹtẹn Asie tọn ehe mẹ, nado gọalọ to azọ́n jibẹwawhé gbigbọmẹ tọn lọ mẹ. Etẹwẹ sisẹ́ yé nado tọ́n sọn otò yetọn titi mẹ? Alọgọ tẹlẹ wẹ yé mọyi nado sẹtẹn yì otò devo mẹ? Podọ dona tẹlẹ sin vivi dù wẹ yé te? Mì gbọ mí ni pọ́n.

To owhe delẹ die, Kazuhiro, gbehosọnalitọ de to Japon kú adíngbe to ajiji mẹ bo bu do ede bosọ yin zize yì dotowhé. Doto dọna ẹn ma nado kùn mọto na owhe awe. Kazuhiro jẹflumẹ sinsinyẹn. E kanse ede dọ, ‘Nawẹ n’gán zindonukọn to nuhe n’yiwanna lọ wiwà, enẹ wẹ azọ́n gbehosọnalitọ tọn mẹ gbọn?’ E hodẹ̀ vivẹvivẹ, bo biọ dọ Jehovah ni hùnalina emi nado zindonukọn taidi gbehosọnalitọ.

Kazuhiro dọmọ: “To osun dopo godo, họntọn ṣie de he to sinsẹ̀n to Birmanie sèhó gando adán he gbò mi go. E tẹkan hlan mi bo dọmọ: ‘To Birmanie, ahihun lẹ wẹ nọ yin yiyizan hugan. Eyin a wáfi, a sọgan zindonukọn to sinsẹ̀nzọn towe mẹ, bọ e ma na biọ dọ a ni nọ kùn mọto!’ N’kanse doto ṣie eyin ninọmẹ ṣie na hẹn ẹn yọnbasi na mi nado yì Birmanie. E paṣa mi dọ doto lọ dọ dọ, ‘Doto apọ̀n-zọ́nwatọ de he wá sọn Birmanie tin to Japon to alọnu. N’na do we hia ẹ. E yindọ azọ̀n towe gọ̀ fọ́n janwẹ, e sọgan penukundo gowe.’ N’mọ nue doto lọ dọna mi taidi gblọndo de sọn Jehovah dè.”

To afọdopolọji, Kazuhiro kanwehlan alahọ Birmanie tọn gbọn Intẹnẹt ji, bo basi zẹẹmẹ dọ emilẹ po asi emitọn po jlo na sẹ̀n taidi gbehosọnalitọ lẹ to otò enẹ mẹ. To azán atọ́n poun godo, alahọ lọ gblọn dọmọ: “Mì wá, mí do nuhudo gbehosọnalitọ tọn dogọ!” Kazuhiro po asi etọn Mari po sà mọto yetọn lẹ, yí wema tògodo-yìyì tọn, bosọ họ̀ tike agahun dido tọn lẹ. To egbehe, yé to sinsẹ̀n po ayajẹ po to kándo tókunọ-gbè tọn de mẹ to Mandalay. Kazuhiro dọmọ: “Gbọn numimọ ehe gblamẹ, mí mọdọ yise mítọn yin hinhẹn lodo dogọ to opagbe Jiwheyẹwhe tọn he tin to Salmu lẹ 37:5 mẹ, he  dọmọ: ‘Jo aliho towe do alọmẹ na Jehovah; ganjẹ ewọ go, e nasọ yinuwado ota towe mẹ.’”

To 2014, Kunnudetọ Jehovah tọn lẹ to Birmanie tindo lẹblanulọkẹyi lọ nado basi plidopọ vonọtaun de to otò lọ mẹ. Afọzedaitọ susu sọn otò devo lẹ mẹ wá nujijọ lọ tẹnmẹ. Dopo to yé mẹ he nọ yin Monique, yèdọ mẹmẹyọnnu de he tindo owhe 30 linlán bo wá sọn États-Unis, dọmọ: “Whenue n’lẹkọ sọn plidopọ lọ, n’hodẹ̀ hlan Jehovah gando afọdide he n’dona ze bọdego to gbẹzan ṣie mẹ go. Humọ, n’dọho hẹ mẹjitọ ṣie lẹ gando yanwle gbigbọmẹ tọn ṣie lẹ go. Mímẹpo mọdọ n’dona lẹkọyi Birmanie, amọ́ whẹpo n’do wá basi nudide godo tọn, e gbẹ́ yí ojlẹ de to asi e gọna odẹ̀ susu hihò.” Monique dọ nuhewutu e do yinmọ.

“Jesu na tuli hodotọ etọn lẹ nado nọ ‘lẹn akuẹ nude tọn pọ́n whẹ́.’ Enẹwutu, n’kanse dee dọ, ‘Be n’gán mọ akuẹ he tẹnsisẹ ehe na biọ ya? Be n’na penugo nado penukundo dee go to otò enẹ mẹ, bọ e ma na biọ dọ ma wà agbasazọ́n he na nọ yí whenu susu to asi e de ya?’” E yigbe dọmọ: “N’doayi e go tlolo dọ, akuẹ he to asi e ma na pé nado sẹtẹn yì otò dindẹn enẹ mẹ.” To whelọnu lo, nawẹ e wá penugo nado sẹtẹn yì gbọn?—Luku 14:28.

Monique dọmọ: “To gbèdopo, azọ́nmẹyimẹdotọ ṣie dọ dọ emi jlo na mọ mi. N’jẹ nuhà ji, na n’lẹndọ n’na yin yinyan sọn azọ́nmẹ. Ṣigba, kakatimọ, azọ́nmẹyimẹdotọ ṣie pà mi na azọ́n dagbe ṣie. Enẹgodo e dọna mi dọ, emi ko basi tito na ma do mọ ajọ̀ de yí, ehe sọzẹn pẹẹ hẹ akuẹ sọha he sin hudo n’do nado penukundo akuẹzinzan ṣie lẹ go!”

Monique ko to sinsẹ̀n to Birmanie sọn décembre 2014. Etẹwẹ yin numọtolanmẹ etọn gando lizọnyizọn etọn to fie nuhudo sù te go? E dọmọ: “Homẹ ṣie hùn taun nado tin tofi. N’nọ deanana plọnmẹ Biblu atọ̀n. Dopo to yé mẹ yin nawe de he tindo owhe 67. E nọ dọnudo mi to whelẹponu po nukiko yẹsẹ de po bo nọ gbò mi fán po zohunhun po. Whenue e plọn dọ yinkọ Jiwheyẹwhe tọn wẹ Jehovah, dasin wayi do e. E dọmọ: ‘Whla tintan die to gbẹzan ṣie mẹ he n’sè dọ yinkọ Jiwheyẹwhe tọn wẹ Jehovah. N’wà mẹho na we taun, amọ́ a ko plọn mi onú titengbe hugan lọ he n’sọgan plọn.’ Nado dọ hójọhó, dasin wayi do yẹnlọsu. Numimọ ehe nkọ lẹ nọ zọ́n bọ sinsẹ̀nzọnwiwa to fie nuhudo sù te nọ hẹn gbẹzan mẹtọn tindo pekọ taun.” To agọe, Monique tindo lẹblanulọkẹyi lọ nado yì Wehọmẹ Wẹndagbe-Jlatọ Ahọluduta lọ Tọn lẹ tọn.

Nudevo he whàn mẹdelẹ nado wá Birmanie wẹ kandai he tin to Owhewé Kunnudetọ Jehovah tọn lẹ tọn 2013 tọn mẹ gando otò ehe go. Mẹmẹyọnnu de he nọ yin Li tindo owhe 30 linlán bo ko nọ Hùwaji-whèzẹtẹn Asie tọn pọ́n. E tin to agbasazọ́n whenu-gigọ́ tọn de mẹ, ṣigba, kandai he tin to Owhewé lọ mẹ whàn ẹn nado lẹnnupọndo sinsẹ̀nzọnwiwa to Birmanie ji. “To 2014, to whenue n’yì plidopọ vonọtaun de to Rangoun, n’dukosọ hẹ asu po asi po de he to sinsẹ̀n to fie nuhudo sù taun te to aigba-denamẹ Chine-gbè tọn de ji to Birmanie. Na n’nọ do Chine-gbè wutu, n’de nado sẹtẹn yì Birmanie nado yì gọalọ to kándo Chine-gbè tọn he to finẹ mẹ. N’nọpọ́ hẹ Monique, podọ mí sẹtẹn yì Mandalay. Jehovah dona mí bọ mí mọ azọ́n mẹplọntọ tọn whenu gli tọn de do wehọmẹ dopolọ, bosọ mọ ohọ̀ de haya do fie ma dẹn do finẹ. Mahopọnna yozò gọna avùnnukundiọsọmẹnu delẹ, n’nọ duvivi sinsẹ̀nzọn ṣie tọn tofi. Mẹhe nọ nọ̀ Birmanie lẹ nọ zan gbẹzan jlẹkaji tọn, nọ símẹ bosọ nọ to gbesisọ mẹ nado yí whenu yetọn zan nado dotoaina wẹndagbe lọ. Ayajẹnu taun wẹ e yin nado mọ lehe Jehovah to mizọnmizọn do na azọ́n lọ do. N’kudeji mlẹnmlẹn dọ Jehovah wẹ jlo dọ ma tin tofi to Mandalay.”

Susu mẹhe to sinsẹ̀n to fie nuhudo sù te lẹ tọn wẹ ko mọdọ odẹ̀ do huhlọn. Lẹnnupọndo Jumpei po asi etọn Nao po ji. Yé omẹ awe lẹ do owhe 30 linlán.  Yé to sinsẹ̀n dai to agun tókunọ-gbè tọn de mẹ to Japon. Naegbọn yé do sẹtẹn yì Birmanie? Jumpei dọmọ: “Yanwle yẹn po asi ṣie po tọn wẹ e ko yin tẹgbẹ nado sẹ̀n to fie nuhudo sù te to tògodo. Mẹmẹsunnu de sọn agun tókunọ-gbè tọn mítọn mẹ to Japon sẹtẹn yì Birmanie. Dile etlẹ yindọ akuẹ vude poun wẹ to mí si, mílọsu sẹtẹn yì dọ́n to mai 2010. Mẹmẹsunnu po mẹmẹyọnnu Birmanie tọn lẹ po yí mí po zohunhun po!” Numọtolanmẹ tẹwẹ e tindo gando aigba-denamẹ tókunọ-gbè tọn lọ go to Birmanie? “Mẹsusu wẹ nọ do ojlo hia. Awú nọ ji whétọ he yin tókunọ lẹ, eyin mí do video lẹ hia to tókunọ-gbè mẹ. Homẹ nọ hùn mí taun dọ mí basi nudide nado wá sẹ̀n Jehovah tofi!”

Nawẹ Jumpei po Nao po penukundo akuẹzinzan yetọn go gbọn? “To owhe atọ̀n godo, diblayin akuẹ he to sẹdotẹnmẹ na mí lẹpo wẹ mí zan, podọ akuẹ he to mí si ma na pé nado sú họ̀-kuẹ owhe he bọdego tọn. Yẹn po asi ṣie po hodẹ̀ ahundopo tọn susu. Mí mọ wekanhlanmẹ de yí sọn alahọ mẹ to whenue mí ma donukun etọn, ehe mẹ mí yin oylọ-basina te nado sẹ̀n taidi gbehosọnalitọ titengbe ojlẹ gli tọn lẹ. Mí dejido Jehovah go, podọ mí mọdọ ewọ ma jo mí do. E to nukunpedo mí go to aliho lẹpo mẹ.” To agọe, Jumpei po Nao po lọsu yì Wehọmẹ Wẹndagbe-Jlatọ Ahọluduta lọ Tọn lẹ tọn.

Etẹwẹ whàn Simone, mẹmẹsunnu de he tindo owhe 40 linlán bo wá sọn Italie, gọna asi etọn Anna, yèdọ mẹmẹyọnnu de he tindo owhe 35 linlán bo wá sọn Nouvelle-Zélande nado sẹtẹn yì Birmanie? Anna gblọn dọmọ: “Kandai he tin to Owhewé 2013 tọn mẹ gando Birmanie go lọ wẹ!” Simone dọmọ: “Lẹblanulọkẹyi daho de wẹ e yin nado tin to Birmanie. Gbẹninọ tofi bọawu taun, podọ n’sọgan zan whenu susu dogọ to azọ́n Jehovah tọn mẹ. Homẹhunnu de wẹ e yin nado mọ lehe Jehovah penukundo mí go do to whenue mí to sinsẹ̀n to lẹdo he mẹ nuhudo sù te de mẹ.” (Salm. 121:5) Anna dọmọ: “N’gọ́ na ayajẹ hugan gbede pọ́n. Mí nọ zan gbẹzan he to jlẹkaji de. N’nọ yí whenu susu dogọ zan hẹ asu ṣie, podọ mí dọnsẹpọ ode awetọ dogọ. Mí sọ jihọntọn vivẹ́ yọyọ lẹ. Gbẹtọ lẹ ma nọ tindo nuvẹun sọta Kunnudetọ lẹ, podọ yé nọ do ojlo vonọtaun hia to aigba-denamẹ lọ ji!” To aliho tẹlẹ mẹ?

Anna basi zẹẹmẹ dọmọ: “To gbèdopo, n’dekunnuna wehọmẹvi alavọ tọn de to ahimẹ, podọ n’basi tito nado vọ́ ẹ mọ to whedevonu. Whenue n’lẹkọyi, e plan họntọn etọn dopo wá. To whedevonu, e plan mẹdevo lẹ wá dogọ. To nukọn mẹ, e sọ plan mẹsusu wá hú mọ. Todin, n’to nuplọn hẹ atọ́n to yé mẹ.” Simone dọmọ: “To aigba-denamẹ lọ ji, gbẹtọ lẹ jọmẹ bosọ nọ dín tlintlindo. Mẹsusu wẹ tindo ojlo. Mí ma tlẹ nọ mọ whenu nado penukundo mẹhe do ojlo hia lẹpo go.”

Ṣigba, etẹwẹ dogbọn afọdide dagbe he nudide bibasi nado sẹtẹn yì Birmanie nọ biọ lẹ dali? Mizuho he wá sọn Japon dọmọ: “Yẹn po asu ṣie Sachio po nọ jlo tẹgbẹ nado yì sẹ̀n to otò he mẹ nuhudo sù te de—ṣigba fitẹ? To whenue mí hia kandai he gando  Birmanie go to Owhewé 2013 tọn mẹ godo, numimọ ojlofọndotenamẹ tọn he tin to e mẹ lẹ whàn mí taun bọ mí jẹ nulẹnpọn ji eyin e na yọnbasi na mí nado yì sẹ̀n to Birmanie.” Sachio yidogọ dọmọ: “Mí basi nudide nado yì dla Rangoun pọ́n na osẹ dopo, yèdọ tòdaho titengbe Birmanie tọn, nado yì bẹ̀ otò lọ pọ́n to linlẹn de mẹ. Dlapọn dodinnanu tọn ojlẹ kleun tọn ehe hẹn mí kudeji dọ mí dona sẹtẹn wáfi.”

Rodney po asi etọn Jane po, he yé omẹ awe lẹ tindo owhe 50 linlán bo wá sọn Australie, gọna visunnu yetọn Jordan po viyọnnu yetọn Danica po, ko to sinsẹ̀n to fie nuhudo sù te to Birmanie sọn 2010. Rodney dọmọ: “Huvẹ gbigbọmẹ tọn he to gbẹtọ lẹ hù wẹ yinuwado mí ji sisosiso. Na nugbo tọn, mí na tuli whẹndo devo lẹ dọ yé ni tẹnpọn nado yì sẹ̀n to fie taidi Birmanie nkọ.” Etẹwutu? “Dagbe he ehe ko wà na whẹndo mítọn to gbigbọ-liho ma yọnjlẹ! Nuhe nọ duahunmẹna jọja susu wẹ alokan yetọn lẹ, mọto, agbasazọ́n po mọmọ po sọyi. Amọ́, ovi mítọn lẹ nọ hẹn alọnu ján to hogbe yọyọ he yé na yizan to lizọnyizọn lọ mẹ lẹ pinplọn mẹ. Yé nọ dovivẹnu nado plọn lehe yé na yihojlẹdohogo hẹ mẹhe ma jẹakọ hẹ Biblu lẹ do, gọna lehe yé na na gblọndo to opli lẹ ji to agun he nọ do ogbè lẹdo lọ tọn mẹ do, podọ yé sọ nọ hẹn alọnu ján to nuwiwa gbigbọmẹ tọn he nọ hẹn awuvivi wá susu devo lẹ mẹ.”

Oliver, mẹmẹsunnu de he tindo owhe 35 linlán bo wá sọn États-Unis, dọ nuhewutu e nọ na tuli mẹlẹ nado doafọna sinsẹ̀nzọn wunmẹ ehe, dọmọ: “Jehovah sinsẹ̀n to otò devo he n’ma jẹakọ de mẹ ko hẹn ale susu wá na mi. Tẹnsisẹ sọn otò ṣie titi mẹ ko gọalọna mi nado wleawuna jidide mlẹnmlẹn to Jehovah mẹ, mahopọnna ninọmẹ depope he mẹ n’mọ dee te. Sinsẹ̀nzọnwiwa to pọmẹ hẹ mẹhe n’ma ko yọnẹn dai, ṣigba he tindo nuyise dopolọ hẹ mi lẹ ko gọalọna mi taun nado mọdọ nudevo de ma tin to aihọn ehe mẹ he sọgan yin yiyijlẹdo Ahọluduta Jiwheyẹwhe tọn go.” To egbehe, Oliver po asi etọn Anna po zindonukọn nado to sinsẹ̀n po zohunhun po to aigba-denamẹ Chine-gbè tọn ji.

Trazel, mẹmẹyọnnu de he tindo owhe 50 bo wá sọn Australie, ko to sinsẹ̀n to Birmanie sọn 2004. E dọmọ: “Na mẹhe ninọmẹ yetọn hẹn ẹn yọnbasi na lẹ, n’nọ na yé tuli vivẹvivẹ nado yì sẹ̀n to fie nuhudo sù te. N’ko mọdọ Jehovah nọ dona vivẹnudido mẹtọn lẹ, eyin yè tindo ojlo lọ nado yì sẹ̀n. N’ma lẹn pọ́n gbede dọ n’na wá zan gbẹzan ehe nkọ. Gbẹzan he nọ hẹn ale po pekọ po wá hugan he n’na ko jlo lọ wẹ.”

Dike hogbe ahundopo tọn mẹhe to sinsẹ̀n to fie nuhudo sù te to Birmanie lẹ tọn ehelẹ, ni na we tuli nado lẹnnupọndo alọgigọna gbẹtọ ahunjijlọnọ lẹ, he to aigba he ma yin didenamẹ lẹ ji. Na nugbo tọn, mẹhe to sinsẹ̀n to fie nuhudo sù taun te lẹ to didọna we dọ “Jaale, wá Birmanie bo wá gọalọna mí!”