Sọwhiwhe zẹẹmẹdo

• nado kuahun

• ma nado nọ joawuna ojlo zogbe

• nado nọ wà nuhe yin dandan lẹ eyin a ma tlẹ yiwanna

• ma nado yin ṣejannabinọ

Ovi he ko plọn nado nọ whesọ lẹ sọgan gbẹ́ nuylankan dai, eyin etlẹ di dọ yé na mọ ale de sọn e mẹ. Amọ́, ovi he ma nọ whesọ lẹ sọgan

• nọ yawu gblehomẹ

• jẹ apọ̀nmẹ-zọ̀n

• nù azọ̀, nù amà kavi nù ahàn sinsinyẹn zẹjlẹgo

• nọ dù núdùdù he ma yin hunsindagbe tọn lẹ

Dodinnanu de dohia dọ eyin ovi he ko plọn nado whesọ lẹ wá whẹ́n, yé ma nọ yawu jẹazọ̀n, ma nọ yawu do nuhahun akuẹzinzan tọn bo ma nọ yawu gbàsẹ́n. Dodinnanu ehe zọ́n bọ Mẹplọntọ de to Wehọmẹ Alavọ tọn Pennsylvanie tọn, Angela Duckworth dọmọ: “Sọwhiwhe nọ wà dagbe namẹ taun.”

Lala towe ni nọ yin lala.

AYINAMẸ BIBLU TỌN: Mì “gbọ hogbe mìtọn ‘Mọwẹ’ ni yin mọwẹ, podọ ‘Lala’ mìtọn ni yin lala.”—Matiu 5:37.

To whedelẹnu, ovi lẹ gán yí avi kavi zingidi do biọ nudelẹ mẹjitọ lẹ, etlẹ yin to mẹmẹ. Eyin mẹjitọ lẹ yí alọ enẹ na ovi de, ovi lọ na nọ kàn ayiha mọnkọ do biọ nuhe mẹjitọ lẹ ko gbẹ́ na ẹn wayi.

Amọ́, eyin mẹjitọ lọ ma nọ yawu diọ linlẹn, e to onú titengbe de plọn ovi etọn, enẹ wẹ yindọ e ma yin nuhe dín yè te to gbẹ̀mẹ lẹpo wẹ yè gán mọ. Doto David Walsh wlan dọmọ: “To vogbingbọn mẹ na nuhe mẹlẹ nọ lẹn, mẹhe plọn nado nọ whesọ lẹ wẹ nọ do ayajẹ hugan to gbẹ̀mẹ. Mí ma to dagbe de wà na ovi mítọn lẹ, eyin mí nọ na yé nudepope he yé biọ.” *

Eyin a nọ gbẹ́ nudelẹ na ovi towe lẹ todin, enẹ na  zọ́n bọ yelọsu na nọ gbẹ́ nudelẹ na yede to whenue yé na whẹ́n mẹho, di apajlẹ to whenue yé na do ojlo nado nù azọ̀, tindo kọndopọ zanhẹmẹ tọn jẹnukọnna alọwle kavi wà nuylankan devo lẹ.

Plọn ovi towe lẹ dọ eyin yè wà dagbe, yè nọ duale etọn, eyin yè sọ wà nuylankan, yè nọ jiya etọn.

AYINAMẸ BIBLU TỌN: “Nudepope he mẹde to dido, enẹ wẹ e na gbẹ̀n ga.”—Galatianu lẹ 6:7.

Plọn ovi towe nado yọnẹn dọ nudepope he yè wà nọ do ale etọn, enẹwutu eyin e ma nọ whesọ, enẹ na hẹn owù plá ẹ. Di apajlẹ, eyin visunnu towe nọ yawu gblehomẹ to whenue nude ma jẹ etọn ji, enẹ gán zọ́n bọ mẹlẹ ma na nọ sẹpọ ẹ. Amọ́, eyin e nọ dava ede, kavi nọ kuahun bo ma nọ gbòhódonù namẹ to whenue nude doadi na ẹn, mẹlẹ na yiwanna ẹn. Plọn ovi towe dọ alenu wẹ e na yin na ẹn nado nọ whesọ.

Plọn ovi towe nado nọ yọ́n nuhe yin nujọnu hugan lẹ.

AYINAMẸ BIBLU TỌN: “Mọdona nuhe yin nujọnu hugan lẹ.”—Filipinu lẹ 1:10.

Sọwhiwhe ma zẹẹmẹdo didapana nuylankan wiwà poun gba; e sọ nọ biọ dọ yè ni wà nuhe yin dandan, eyin mí ma tlẹ yiwanna nulọ. Nujọnu wẹ dọ ovi towe ni yọ́n nuhe dona to otẹn tintan mẹ lẹ bo nọ wà yé. Plọn ovi towe nado nọ wà nuhe yin nujọnu hugan lẹ whẹ́. Di apajlẹ, e dona nọ wà azọ́n he yè dena ẹn sọn wehọmẹ nado wà to whégbè lẹ whẹpo do daihun.

Apajlẹ towe yin nujọnu.

AYINAMẸ BIBLU TỌN: “Ohia wẹ yẹn zedai na mì, dọ kẹdẹdile yẹn basi na mì do, mọ wẹ mìlọsu dona nọ basi do ga.”—Johanu 13:15.

Ovi towe nọ mọ lehe a nọ yinuwa do eyin a gblehomẹ. Dohia gbọn apajlẹ towe dali dọ nuyọnẹnnu wẹ e yin nado nọ whesọ. Di apajlẹ, eyin ovi towe wà nuhe ma sọgbe, be a nọ gblehomẹ sinsinyẹn wẹ kavi a nọ tẹnpọn nado duto dewe ji?