NUHE MẸLẸ NỌ DỌ

Mẹsusu wẹ nọ mọdọ akọhiho yin aihundida he ma do owù de, eyin osẹ́n ma ko gbẹ́ jẹagọdo. Akọhiho wunmẹ delẹ he sọgbe hẹ osẹ́n, taidi tito loteli tọn he aṣẹpatọ lẹ nọ nọgodona, nọ hẹn akuẹ biọ agbá mẹ bọ gandudu lẹ do nọ wazọ́n delẹ he mẹ tòvi lẹ nọ mọaleyi sọn.

NUHE BIBLU DỌ

Biblu ma basi zẹẹmẹ susu do akọhiho ji. Etomọṣo, e bẹ nunọwhinnusẹ́n delẹ hẹn he gọalọ nado yọ́n nuhe Jiwheyẹwhe nọ lẹn gando akọhiho go.

Akọhiho zẹẹmẹdo nado hò akuẹ mẹdevo lẹ tọn dù sọn yé si, ehe jẹagọdo avase he Biblu na mí nado nọ “họ́ [míde] sọta nukunkẹn wunmẹ lẹpo.” (Luku 12:15) Na nugbo tọn, nukunkẹn wẹ nọ hẹnmẹ nado yì hòakọ. Ajọwhé akọhiho tọn lẹ nọ basi ajọjijla ajọ̀ dahodaho lẹ tọn bo ka nọ whlá nugbo lọ dọ mẹsusu ma gán dù ajọ̀ lọ, na yé yọnẹn dọ ojlo lọ nado jẹ adọkun na sisẹ́ mẹlẹ nado và akuẹ susu do akọhiho mẹ wutu. Akọhiho ma nọ gọalọnamẹ nado họ́ mẹde sọta nukunkẹn, kakatimọ e nọ sisẹ́ mẹ nado dín akuẹ vọnu wẹ.

Mẹdetiti tọn mẹ víví do wẹ yin yanwle akọhiho tọn, na e nọ zọ́n bọ yè nọ hò akuẹ akọhotọ devo lẹ tọn dù. Ṣigba, Biblu na tuli dopodopo mítọn nado “nọ dín, e ma yin ale edetiti tọn gba, ṣigba dehe yin mẹdevo tọn.” (1 Kọlintinu lẹ 10:24) Podọ dopo to Gbedide Ao lẹ mẹ dọmọ: “Hiẹ ma dona donukunkẹn gando . . . nudepope he yin gbẹtọ hatọ towe tọn go.” (Eksọdusi 20:17) Whenue akọhotọ de magbe to ahun etọn mẹ nado dù akuẹ kavi ajọ̀ de, na taun tọn nuhe e nọ donukun wẹ yindọ mẹdevo lẹ ni hẹn akuẹ yetọn gú na ewọ nido dù.

Biblu sọ na avase sọta nuyise tadagbe tọn, ehe mẹdelẹ nọ pọ́n hlan taidi huhlọn he hugan jọwamọ tọn de he nọ hùnali nudagbe lẹ tọn namẹ. To hohowhenu, Islaelivi delẹ ma do yise to Jiwheyẹwhe mẹ, “bo nọ tẹ́ tafo na yẹwhe Tadagbe tọn.” Be Jiwheyẹwhe kẹalọyi sinsẹ̀n-bibasi yetọn hlan “yẹwhe Tadagbe tọn” wẹ ya? Paali, na e dọna yé dọmọ: “Mì to nuhe ylan to nukun ṣie mẹ lẹ wà mapote, bosọ de nuhe nọ hẹn homẹgble mi lẹ.”—Isaia 65:11, 12.

Nugbo wẹ dọ to awà aihọn tọn delẹ ji, akuẹ he nọ wá sọn akọhiho he sọgbe hẹ osẹ́n mẹ lẹ nọ yin yiyizan do wehọmẹ lẹ tamẹ, do hẹn ninọmẹ akuẹzinzan tọn otò de tọn pọnte, podọ do tito devo he nọ wà dagbe na tòvi lẹ tamẹ. Amọ́, nuhe akuẹ enẹlẹ nọ yin yíyí do wà lẹ ma diọ asisa he mẹ yé nọ wá sọn, yèdọ nuwiwa delẹ he nọ na tuli nukunkẹn po ṣejannabi po bosọ nọ sisẹ́ mẹ nado jẹ adọkun to zánto dopo mẹ.

“Hiẹ ma dona donukunkẹn gando . . . nudepope he yin gbẹtọ hatọ towe tọn go.”—Eksọdusi 20:17.

NUHE BIBLU DỌ

Biblu na avase dọ “mẹhe magbe nado yin adọkunnọ lẹ jai jẹ whlepọn po omọ̀ po gọna ojlo gúgú tọn po ojlo ylankan susu po mẹ, ehe nọ tlọ omẹ do vasudo po dindọn po mẹ.” (1 Timoti 6:9) Nukunkẹn wẹ yin adọ̀ akọhiho tọn, podọ Biblu slẹ “nukunkẹn” do aṣa he yè dona dapana taun lẹ mẹ, na e nọ hẹnnugble to mẹgo kẹdẹdile okò nọ dù nude vudevude bo nọ hù i sudo pete do.—Efesunu 5:3.

Na yanwle akọhiho tọn wẹ nado hẹnmẹ jẹ adọkun matin kànhiho wutu, e nọ zọ́n bọ akọhotọ de nọ wá jẹ wanyina akuẹ ji—yèdọ jijọ de he Biblu ylọdọ “adọ̀ nuylankan wunmẹ lẹpo tọn.” Ojlo zogbe tintindo na akuẹ sọgan tindo nuyiwadomẹji sinsinyẹn do gbẹzan mẹde tọn ji po awubibọ po, sọmọ bọ mẹlọ na nọ gbọṣi lẹnpọn mẹ podọ yise etọn to Jiwheyẹwhe mẹ nasọ depò. To yẹhiadonu-liho, Biblu dlẹnalọdo mẹhe wanyina akuẹ ko domọwle lẹ taidi mẹhe ko “yí awufiẹsa susu do sọnú yede gbọn filẹpo” lẹ.—1 Timoti 6:10.

Nukunkẹn nọ dekọtọn do awubla mẹ, na mẹlẹ ma nọ do pekọ to nuhe yé tindo mẹ, bo nọ gbọnmọ dali hẹn ayajẹ yetọn bu. “Mẹhe yiwanna fataka, fataka ma na pekọna ẹn gbede, mọdopolọ wẹ nutindo ma na pekọna mẹhe yiwanna adọkun.”—Yẹwhehodọtọ 5:10.

Gbẹtọ livi susu he yin yẹdoklọ biọ akọhiho mẹ lẹ ko wá mọ yede di afanumẹ akọhiho tọn, na yé ma hò yé ma gán wutu. Nuhahun lọ ko wá gbayipe sọmọ bọ to États-Unis kẹdẹ gbẹtọ livi susu lẹ wẹ yin afanumẹ akọhiho tọn, sọgbe hẹ sọhayinanu lẹ.

Oló de dọ dọ: “Ogú he yin mimọyi gbọn nukunkẹn dali to bẹjẹeji ma na hẹn dona wá to godo mẹ.” (Howhinwhẹn lẹ 20:21) Akọhiho ko tlọ mẹhe peve to aṣa enẹ mẹ lẹ do ahọ́ susu mẹ kavi tlẹ ko zọ́n bọ ajọ́ yetọn jai, podọ na mẹsusu, ehe ko bẹpla agbasazọ́n yetọn, alọwle yetọn, gọna haṣinṣan he yé tindo hẹ họntọn yetọn lẹ. Nunọwhinnusẹ́n Biblu tọn lẹ yíyí-do-yizan-mẹ gán gọalọna mẹde nado dapana kọdetọn vẹadi he akọhiho nọ hẹnwa gbẹzan mẹtọn po ayajẹ mẹtọn po ji lẹ.

“Mẹhe magbe nado yin adọkunnọ lẹ jai jẹ whlepọn po omọ̀ po gọna ojlo gúgú tọn po ojlo ylankan susu po mẹ, ehe nọ tlọ omẹ do vasudo po dindọn po mẹ.”—1 Timoti 6:9.