KATHERINE whẹ́n to États-Unis podọ to whenue e tindo owhe 16, e yí baptẹm bo lẹzun dopo to Kunnudetọ Jehovah tọn lẹ mẹ. E nọ ylọ lizọnyizọn etọn dọ nujọnu, ṣigba mẹsusu ma nọ dotoaina owẹ̀n Ahọluduta lọ tọn to lẹdo he mẹ e nọ dọyẹwheho te. E dọmọ: “N’nọ hia numimọ lẹ gando mẹhe nọ hodẹ̀ dọ Jiwheyẹwhe ni do mẹde hlan nado wá gọalọna emi nado yọ́n ewọ lẹ go. E nọ saba jlo mi nado mọ omẹ mọnkọtọn de, ṣigba e ma pà mi pọ́n gbede.”

To whenue Katherine ko dọyẹwheho to aigba-denamẹ dopolọ ji na owhe susu godo, e jẹ nulẹnpọn ji nado sẹtẹn yì lẹdo he mẹ gbẹtọ lẹ na dotoaina owẹ̀n Ahọluduta lọ tọn te hugan de mẹ. Ṣigba, e nọ mọdọ e na vẹawuna emi taun nado wàmọ. Whladopo gee wẹ e sẹtẹn sọn hagbẹ whẹndo etọn tọn lẹ dè pọ́n to gbẹzan etọn mẹ na osẹ awe poun, ṣigba ajlù owhé tọn nọ wle e to azán lẹpo gbè. Etomọṣo, ojlo sinsinyẹn etọn nado tindo ayajẹ he alọgigọna mẹdevo lẹ nado yọ́n Jehovah nọ hẹnwa zọ́n bọ e duto aliglọnnamẹnu enẹ ji. To whenue e ko lẹnnupọndo lẹdo voovo he mẹ e sọgan sẹtẹn yì lẹ ji godo, e kanwehlan alahọ Guam tọn bosọ mọ nudọnamẹ he e tindo nuhudo etọn lẹ yí. To juillet 2007, to whenue Katherine tindo owhe 26, e sẹtẹn yì Saipan, yèdọ lopo de he to Ohù Pacifique ji bo dẹn do otò etọn na nudi kilomẹtlu 9 650. Nawẹ nulẹ wá yìdo to tẹnsisẹ etọn godo?

Ojlẹ vude to whenue Katherine jẹ agun yọyọ lọ mẹ godo, e dukosọ hẹ Doris, yèdọ nawe de he tindo nudi owhe 45, mẹhe yigbe nado plọn Biblu. To whenue yé plọn weta atọ̀n tintan owe Biblu Plọn Mí tọn lẹ godo, nude jẹ ahunmẹduna Katherine ji. E dọmọ: “Nuplọntọ dagbe de wẹ Doris yin, podọ n’ma jlo dọ oplọn etọn ni gble. N’ma ko deanana plọnmẹ Biblu gbesisọ tọn de pọ́n, podọ n’mọdọ mẹmẹyọnnu numimọnọ de wẹ dona plọnnu hẹ Doris, vlavo mẹhe po ewọ po tindo owhe dopolọ.” Katherine biọ Jehovah to odẹ̀ mẹ dọ ni gọalọna emi nado mọ mẹmẹyọnnu he jẹ nado deanana oplọn etọn. Enẹgodo, e basi dide nado dọna Doris dọ mẹdevo na jẹ anadena oplọn lọ ji.

Katherine dọ dọ: “Whẹpo n’nado dọ nuhe tin to linlẹn ṣie mẹ na Doris, e dọna mi dọ emi jlo na dọhona mi gando nuhahun de go. To whenue n’dotoaina ẹn godo, n’dọ lehe Jehovah ko gọalọna mi nado pehẹ ninọmẹ mọnkọtọn de do na ẹn. E dopẹna mi.” Enẹgodo, Doris dọna Katherine dọmọ: “Jehovah yí we zan nado gọalọna mi. Azán tintan he gbè a wá owhé ṣie  gbè, n’ko to Biblu hia na gànhiho susu lẹ. N’to avivi bo to vẹvẹna Jiwheyẹwhe dọ ni do mẹde hlan nado gọalọna mi nado mọnukunnujẹ Biblu mẹ. Enẹgodo wẹ a húhú ohọ̀n ṣie. Jehovah ko na gblọndo na odẹ̀ ṣie!” Dasin wayi do Katherine to whenue e to numimọ he whànmẹ enẹ dọ. E dọmọ: “Hodidọ Doris tọn yin gblọndo de na odẹ̀ ṣie. Jehovah dohia mi dọ n’penugo nado to anadena oplọn lọ zọnmii.”

Doris yí baptẹm to 2010, podọ todin ewọ lọsu nọ deanana plọnmẹ Biblu susu. Katherine dọmọ: “Lehe n’dopẹ́ dọ ojlo whenu dindẹn tọn ṣie nado gọalọna gbẹtọ ahunjijlọnọ de nado lẹzun devizọnwatọ Jehovah tọn mọ hẹndi do sọ!” Todin, Katherine to sinsẹ̀n po ayajẹ po taidi gbehosọnalitọ titengbe to lopo Pacifique tọn de ji he nọ yin Kosrae.

Mẹmẹsunnu po mẹmẹyọnnu po he hugan kanweko (he tindo owhe 19 jẹ 79) wẹ sẹtẹn sọn otò yetọn mẹ nado wá sẹ̀n to fie nuhudo sù te to Micronésie. Numọtolanmẹ he azọ́nwatọ zohunhunnọ ehelẹ tindo yin didohia gbọn Erica dali, mẹhe sẹtẹn yì Guam to 2006 to whenue e tindo owhe 19. E dọmọ: “Gbehosọnalitọ bibasi to fie nugbla nugbo lọ tọn to gbẹtọ lẹ hù te nọ hẹn ayajẹ wá taun. N’dopẹna Jehovah dọ e gọalọna mi nado biọ sinsẹ̀nzọn ehe mẹ. Gbẹzan he yọ́n hugan lọ niyẹn!” Todin, homẹ Erica tọn hùn nado to sinsẹ̀n taidi gbehosọnalitọ titengbe to Ebeye, yèdọ dopo to Lopo Marshall tọn lẹ mẹ. Na nugbo tọn, e ma nọ bọawu nado sẹ̀n to tògodo. Mì gbọ mí ni gbadopọnna avùnnukundiọsọmẹnu atọ̀n bo pọ́n lehe mẹhe ko sẹtẹn yì Micronésie lẹ pehẹ yé do.

Aliho gbẹninọ tọn. To whenue Simon he tindo owhe 22 yì lopo Palau ji to 2007 godo, e doayi e go dọ azọ́nkuẹ he emi sọgan dù ma sọtẹ́n yijlẹdo dehe emi nọ dù to otò emitọn mẹ to Angleterre go. “N’dona plọn ma nado nọ họ̀ nudepope he jlo mi. Todin, n’nọ yí sọwhiwhe do ṣinyan núdùdù he n’dona họ̀ lẹ, podọ n’nọ whleahi gbọn ofi voovo lẹ nado họ̀ nuhe sin akuẹ pọnte hugan lẹ. Eyin nude gble to nuyizan ṣie de go, n’nọ họ̀ zánpo nulọ tọn, podọ n’nọ dín mẹhe sọgan gọalọna mi nado diọ ẹ.” Nawẹ gbẹzan jlẹkaji tọn zinzan yinuwadeji gbọn? Simon dọmọ: “E gọalọna mi nado yọ́n nuhe yin dandan to gbẹ̀mẹ lẹ, podọ lehe n’sọgan nọgbẹ̀ po onú vude po do. N’mọdọ Jehovah ko gọalọna mi to ninọmẹ susu lẹ mẹ. To owhe ṣinawe he n’ko yí do sẹ̀n tofi lẹ mẹ, n’ma jẹdò núdùdù po adọtẹn po tọn pọ́n gbede.” Na nugbo tọn, Jehovah nọ nọgodona mẹhe nọ zan gbẹzan jlẹkaji tọn lẹ, na yé jlo nado dín Ahọluduta lọ whẹ́ wutu.—Mat. 6:32, 33.

Ajlù owhé tọn. Erica dọmọ: “Yẹn po hagbẹ whẹndo ṣie tọn lẹ po vẹ́ taun, podọ n’to nuhà dọ ajlù owhé tọn na wle mi bo na yinuwado lizọnyizọn ṣie ji to aliho agọ̀ mẹ.” Etẹwẹ e wà nado wleawudai? “Whẹpo n’do sẹtẹn, n’hia hosọ he dọhodo ajlù owhé tọn ji lẹ to Atọ̀họ̀-Nuhihọ́ lọ Tọn mẹ. Ehe zọ́n bọ n’wleawufo nado pehẹ avùnnukundiọsọmẹnu enẹ. To hosọ dopo mẹ, onọ̀ de na jide viyọnnu etọn gando nukunpedomẹgo Jehovah tọn go bo dọ dọ, ‘Jehovah sọgan penukundo  gowe hugan lehe yẹn sọgan wà do.’ Jidenamẹ enẹ yinuwado ji e taun.” Hannah po asu etọn Patrick po sẹ̀n to Majuro, yèdọ dopo to Lopo Marshall tọn lẹ mẹ. Hannah nọ duto ajlù owhé tọn ji gbọn ayiha zizedo mẹmẹsunnu po mẹmẹyọnnu he tin to agun yetọn mẹ lẹ po ji dali. Ewọ dọmọ: “N’nọ dopẹna Jehovah to whelẹponu na pipli mẹmẹsunnu lẹdo aihọn pé tọn mítọn, na hagbẹ whẹndo tọn ṣie lẹ wẹ yelọsu yin wutu. Eyin alọgọ owanyinọ yetọn tọn dẹ́n, n’ma sọgan ko penugo gbede nado sẹ̀n to fihe nuhudo sù te.”

Họntọnjiji. Simon dọmọ: “To whenue mẹde wá otò yọyọ de mẹ, onú lẹpo wẹ nọ gbọnvo. To whedelẹnu, n’ma nọ penugo nado yìn aslan bọ yè na mọnukunnujẹemẹ ganji.” Erica dọmọ: “To bẹjẹeji, n’mọdọ mẹmẹsunnu lẹ gbẹkọ go e, ṣigba enẹ gọalọna mi nado lẹnnupọndo mẹwhinwhàn he wutu n’do sẹtẹn ji. Nuhewutu n’do sẹtẹn wẹ nado wà nususu dogọ na Jehovah, e ma yin na ale mẹdetiti tọn.” E yidogọ dọmọ: “Dile ojlẹ to yìyì, n’wá tindo họntọn dagbe lẹ, podọ n’nọ yọ́n pinpẹn yetọn taun.” Simon dovivẹnu nado plọn Palau-gbè, ehe zọ́n bọ e penugo nado “hùndonuvo” na mẹmẹsunnu po mẹmẹyọnnu po he tin to lẹdo lọ mẹ lẹ. (2 Kọl. 6:13) Vivẹnu he e do nado plọn ogbè lọ zọ́n bọ mẹmẹsunnu lọ lẹ yiwanna ẹn taun. Na nugbo tọn, to whenue mẹhe ṣẹṣẹ yì lẹdo de mẹ lẹ po mẹmẹsunnu he tin to lẹdo lọ mẹ lẹ po nọ wazọ́n to pọmẹ, yemẹpo wẹ nọ duvivi haṣinṣan dagbe de tọn to agun lọ mẹ. Dona devo tẹlẹ wẹ mẹhe ze yede jo sọn ojlo mẹ wá nado sẹ̀n to fihe nuhudo sù te lẹ nọ mọyi?

Apọsteli Paulu dọmọ: “Ewọ he dó susugege nasọ gbẹ̀n susugege.” (2 Kọl. 9:6) Nunọwhinnusẹ́n he tin to wefọ ehe mẹ gando mẹhe gbloada na lizọnyizọn yetọn lẹ go. Sinsẹ́n tẹlẹ wẹ yé “gbẹ̀n susugege” to Micronésie?

To Micronésie, dotẹnmẹ hundote susu gbẹ́ tin nado bẹ plọnmẹ Biblu jẹeji hẹ gbẹtọ lẹ bo mọ lehe yé to nugbo Ohó Jiwheyẹwhe tọn yido yizan mẹ po lehe yé to nukọnyi to gbigbọ-liho do po. Patrick po Hannah po sẹ̀n to Angaur, yèdọ lopo pẹvide he ji gbẹtọ 320 tin te. To whenue yé ko dọyẹwheho to finẹ na osun awe godo, yé dukosọ hẹ onọ̀ godoponọ de. E yigbe to afọdopolọji nado plọn Biblu bo yí zohunhun do kẹalọyi nugbo lọ bosọ basi diọdo ayidego tọn lẹ to gbẹzan etọn mẹ. Hannah dọmọ: “To whenue mí tọ́n sọn owhé etọn gbè po kẹkẹ afọ tọn mítọn po to oplọn dopodopo godo, mí nọ pọ́n ode awetọ bo nọ dọmọ: ‘A wanu, Jehovah!’” Hannah yidogọ dọmọ: “N’yọnẹn dọ Jehovah sọgan dọ̀n nawe ehe wá ede dè to aliho de mẹ kavi devo mẹ, ṣigba na mí wá sẹ̀n to fie nuhudo sù te wutu, mí penugo nado mọ lẹngbọ ehe bo gọalọna ẹn nado yọ́n Jehovah. Ehe yin dopo to numimọ he hẹn ayajẹ wá na mí hugan to gbẹzan mítọn mẹ lẹ mẹ!” Dile Erica dọ do, “eyin hiẹ gọalọna mẹde nado wá yọ́n Jehovah, a na tindo ayajẹ mayọnjlẹ!”

Nuhudo wẹnlatọ Ahọluduta lọ tọn sù taun to otò susu mẹ. Be hiẹ lọsu sọgan sẹtẹn yì fie nuhudo alọgọ tọn tin te de ya? Hodẹ̀ hlan Jehovah nado yidogọna ojlo towe nado gbloada na lizọnyizọn lọ. Dọho hẹ mẹho agun tọn towe lẹ, nugopọntọ lẹdo tọn kavi mẹhe tindo lẹblanulọkẹyi lọ nado sẹ̀n to otò he mẹ nuhudo tin te lẹ. To whenue a to tito basi, kanwehlan alahọ he nọ penukundo aigba-denamẹ he ji a jlo na yì sẹ̀n te go bo biọ nudọnamẹ dogọ. * Vlavo hiẹ lọsu sọgan yin dopo to mẹmẹsunnu po mẹmẹyọnnu po, jọja po mẹho po, gọna tlẹnnọ kavi alọwlemẹ fọtọ́n susu he ze yede jo sọn ojlo mẹ wá lẹ mẹ bo mọ ayajẹ he nọ wá sọn ‘susugege gbingbẹ̀n’ mẹ.