Be Sinsẹ̀n de Tin He Go Yè Sọgan Dejido Ya?

Eyin sinsẹ̀n tangan de ko hẹn we buali, e sọgan vẹawuna we nado dejido sinsẹ̀n devo depope go. Ṣigba, yọnẹn dọ sinsẹ̀n he go a sọgan dejido de tin. To whenue Jesu to aigba ji, e bẹ hodotọ nugbonọ delẹ pli bo plọn yé nado setonuna nubiọtomẹsi Jiwheyẹwhe tọn lẹ. Hodotọ nugbo Klisti tọn lẹ, yèdọ mẹhe yí ahundopo do to vivẹnudo nado setonuna nubiọtomẹsi Klistiani tọn lẹ, gbẹ́ tin. Fie wẹ a sọgan mọ yé te?

Estelle, he yin nùdego to hosọ he wayi de mẹ, dọmọ: “To nukọn mẹ, n’wá jẹ Biblu plọn ji hẹ Kunnudetọ Jehovah tọn lẹ. To ojlẹ kleun de godo, n’mọnukunnujẹ nuhe dọ Johanu 8:32 te mẹ dọmọ: ‘Mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.’”

Ray, he yin nùdego to hosọ he wayi mẹ, lọsu dọmọ: “Biblu pinplọn hẹ Kunnudetọ Jehovah tọn lẹ gọalọna mi nado mọnukunnujẹemẹ dọ e ma yin Jiwheyẹwhe wẹ nọ hẹn yajiji wá gbẹtọvi lẹ ji. Homẹ ṣie hùn nado plọn dọ dile etlẹ yindọ Jiwheyẹwhe tindo whẹwhinwhẹ́n dagbe lẹ nado jotẹnna ylanwiwa to egbehe, ewọ sọ dopagbe nado sukúndona ẹn to madẹnmẹ.”

E họnwun dọ e ma nọ bọawu nado wà nuhe sọgbe to aihọn he mẹ walọ dagbe ma tin te ehe mẹ. Etomọṣo, mí sọgan wà nuhe sọgbe. Mẹsusu nọ jlo dọ yè ni gọalọna yé nado mọnukunnujẹ Biblu mẹ bo yí i do yizan mẹ. Enẹwutu, Kunnudetọ Jehovah tọn lẹ nọ deanana plọnmẹ Biblu vọnu hẹ gbẹtọ livi susu lẹdo aihọn pé. To osẹ dopodopo mẹ, gbẹtọ susu wẹ nọ yin alọgọna nado mọnukunnujẹ nuhe Biblu plọnmẹ taun lẹ mẹ. Taidi kọdetọn de, yé nọ to dindọnsẹpọ Mẹdatọ yetọn bosọ nọ tindo ayajẹ nujọnu tọn to gbẹzan yetọn mẹ. a

Whedevonu he a na mọ Kunnudetọ Jehovah tọn lẹ, be e ma na jlo we nado kàn nuhewutu yé do dejido sinsẹ̀n yetọn go sè yé ya? Lẹnnupọndo nuplọnmẹ yetọn lẹ po lehe yé nọ yinuwa do po ji. Enẹgodo, hiẹ lọsu ni pọ́n na dewe eyin sinsẹ̀n de tin he go a sọgan dejido.

[Nudọnamẹ odò tọn]

[Nudọnamẹ tangan lẹ to weda 7]

Be e ma na jlo we nado kàn nuhewutu Kunnudetọ Jehovah tọn lẹ do dejido sinsẹ̀n yetọn go sè yé ya?