Whẹho he nọ hẹn ayimajai wá wẹ okú yin. Mẹsusu wẹ ma nọ jlo na dọho gandego. Etomọṣo, depope mítọn ma sọgan dapana ẹn. Podọ, awufiẹsa sinsinyẹn wẹ okú nọ hẹnwa.

Nudepope ma sọgan glọnalina mí sọn flumẹjijẹ he okú mẹjitọ, asu, asi, kavi ovi de tọn nọ hẹnwa si. Mẹyiwanna mítọn de sọgan kú to ajiji mẹ kavi mẹvivẹ mítọn lẹ sọgan kú debọdo-dego. Depope he whẹho lọ na yin, mí ma sọgan dapana awufiẹsa he okú nọ hẹnwa, podọ awufiẹsa enẹ sọgan hẹn mí jẹflumẹ.

Antonio, mẹhe otọ́ etọn basi asidan bo kú, dọmọ: “E nọ taidi dọ mẹde suhọ̀n owhé towe tọn gbaungbaun bo ze họnhungan lọ lẹ sọyi wẹ nkọ. A ma gán sọ biọ owhé lọ gbè ba, etlẹ yin na ojlẹ kleun de. A na nọ flin nuhe to owhé lọ gbé lẹ poun wẹ. Ninọmẹ he a dona doakọnna todin niyẹn. Dile etlẹ yindọ e nọ vẹawu nado kẹalọyi, a ma gán diọ ninọmẹ lọ.”

To whenue adán mọnkọtọn gbò Dorothy bọ e lẹzun asuṣiọsi to whenue e tindo owhe 47, e magbe nado dín gblọndo na kanbiọ delẹ. Dile etlẹ yindọ e nọ plọnnu yọpọvu lẹ to wehọmẹ dimanche tọn dọ ogbẹ̀ tin to okú godo, ewọ lọsu ma yọ́n nuhe nọ jọ taun to okú godo. Enẹwutu, e kanse sinsẹ̀ngán Ṣọṣi Anglicane tọn he mẹ e te lọ tọn dọ, “Etẹwẹ nọ jọ do mí go to whenue mí kú?” Ṣigba sinsẹ̀ngán lọ gblọnna ẹn dọ, “Mẹde ma yọnẹn taun. Eyin mí ko kú, mí na yọnẹn.”

Be ‘kú janwẹ mí na kú whẹpo do yọnẹn’ ya? Be aliho devo de tin he mẹ mí sọgan yọ́n nugbo lọ gando ninọmẹ oṣiọ lẹ tọn go te ya?