“NAEGBỌN e do yindọ yẹn go wẹ e jọ do? Naegbọn Jiwheyẹwhe do dike ehe ni jọ do go e?” Kanbiọ ehelẹ duahunmẹna Sidnei owhe 24 mẹvi de he wá sọn Brésil. To whenue Sidnei gbleawu sinsinyẹn to osindò tọ̀lilẹ tọn de mẹ godo, e wá gbọṣi kẹkẹ sẹkunọ lẹ tọn de mẹ.

Yajiji he asidan, azọ̀n, okú mẹyiwanna de tọn, nugbajẹmẹji jọwamọ tọn, kavi awhàn nọ hẹnwa lẹ sọgan zọ́n bọ gbẹtọ lẹ na yawu hẹn todido bu to Jiwheyẹwhe mẹ. Ehe ma yin onú yọyọ de. To hohowhenu, tọgbo Job pehẹ nugbajẹmẹji debọdo-dego lẹ. Gbọn nuṣiwa dali, e dowhẹ Jiwheyẹwhe dọmọ: “Yẹn dawhá hlan we, hiẹ masọ siọ mi; yẹn tite, hiẹ sọ to pinpọn mi. Yè diọ we nado yin okànọ hlan mi: hiẹ yí hlọnhlọn alọ towe tọn do dohomẹkẹn mi.”—Job 30:20, 21.

Job ma yọ́n fie nuhahun etọn lẹ wá sọn, mọjanwẹ e ma yọ́n nuhewutu yé do wá e ji kavi do yin dotẹnmẹna. Homẹ mítọn hùn dọ Biblu gọalọna mí nado yọ́n nuhewutu onú mọnkọtọn lẹ do nọ jọ do mí go po lehe mí dona yinuwa do po.

Biblu dọna mí gando Jiwheyẹwhe go dọmọ: “Pipé wẹ azọ́n etọn na whẹdida [dodo] wẹ ali etọn lẹpo: Jiwheyẹwhe nugbowa tọn de, podọ, matin kunnuhu, dodonọ podọ jlọjẹnọ wẹ ewọ.” (Deutelonomi 32:4) Eyin mọwẹ, be e sọgbe hẹ lẹnpọn dagbe dọ Jiwheyẹwhe he yin “dodonọ podọ jlọjẹnọ” ni jlo dọ gbẹtọvi lẹ ni jiya kavi yí nugbajẹmẹji lẹ zan nado do mẹplọnlọ yé go kavi do klọ́ yé wé ya?

Kakatimọ, Biblu dọna mí dọmọ: “To whenuena mẹde tin to whlepọn glọ, mì dike e dọ dọ: ‘Jiwheyẹwhe wẹ to whiwhle mi pọ́n’ blo. Na Jiwheyẹwhe ma sọgan yin whiwhlepọn po nuylankan lẹ po mọjanwẹ ewọ lọsu ma nọ whlé mẹdepope pọ́n to aliho enẹ mẹ.” (Jakọbu 1:13) Na nugbo tọn, mí hia to Biblu mẹ dọ Jiwheyẹwhe dá gbẹtọvi lẹ bọ yé yin mẹpipe to bẹjẹeji. E na Adam po Evi po he yin gbẹtọvi tintan lẹ, owhé whanpẹnọ de, dandannu gbẹ̀mẹ tọn lẹ, po agbasazọ́n dagbe po. Jiwheyẹwhe dọna yé dọmọ: “Mì yin sinsẹ́nnọ, bo sudeji, bosọ gọ́ aigba ji, bo dugán do e ji.” Adam po Evi po ma tindo whẹwhinwhẹ́n depope nado hẹn todido bu to Jiwheyẹwhe mẹ.—Gẹnẹsisi 1:28.

Ṣigba to egbehe, ninọmẹ he mẹ mí to gbẹnọ te dẹn do pipé taun. Na nugbo tọn, gbẹtọvi lẹ ko pehẹ nuhahun sinsinyẹn lẹ to whenuho gblamẹ. Owhẹ̀ Biblu tọn whẹ́n to whenue e dọmọ: “Nudida lẹpo wẹ to hunwẹn dopọ bo tin to awufiẹsa mẹ dopọ kakajẹ din.” (Lomunu lẹ 8:22) Naegbọn e do yinmọ?

Nado mọnukunnujẹ nuhewutu yajiji do tin mẹ, mì gbọ mí ni lẹnnupọndo ojlẹ he mẹ e bẹjẹeji te ji. Angẹli atẹṣitọ he wá yin yiylọdọ Satani Lẹgba to godo mẹ klọ Adam po Evi po nado gbẹ́ nujinọtedo Jiwheyẹwhe tọn lẹ gando dagbe po oylan po go dai, ehe nọtena gbedide he yin nina yé ma nado dù sọn “atin yinyọ́n dagbe po oylan po lọ” tọn mẹ. Lẹgba dọna Evi dọ yé ma na kú eyin yé vẹtolina Jiwheyẹwhe, bo gbọnmọ dali sawhẹdokọna Jiwheyẹwhe dọ e yin lalonọ. Satani sọ sawhẹdokọna Jiwheyẹwhe dọ e ma na jlọjẹ mẹjidugando etọn lẹ nado nọ basi nudide to nuhe yin dagbe po oylan po ṣẹnṣẹn. (Gẹnẹsisi 2:17; 3:1-6) Hogbe Satani tọn lẹ dohia dọ gbẹzan gbẹtọvi lẹ tọn na pọnte matin gandudomẹji Jiwheyẹwhe tọn. Ehe lẹpo fọ́n whẹho nujọnu tọn de dote, Be Jiwheyẹwhe wẹ jẹ nado dugán ya?

Lẹgba sọ fọ́n whẹho devo dote. E sawhẹdokọna gbẹtọvi lẹ dọ ṣejannabi wẹ nọ whàn yé nado sẹ̀n Jiwheyẹwhe. Gando Job nugbonọ lọ go, Lẹgba dọna Jiwheyẹwhe dọmọ: “Hiẹ ma ko basi osópa de lẹdo e, podọ lẹdo owhé etọn, podọ lẹdo ehe e tindo lẹpo, to adà lẹpo ji? . . . Ṣigba de alọ towe jẹgbonu lo, bo doalọ popo he e tindo go, e bo nasọ gbẹ́ we dai to nukun towe mẹ.” (Job 1:10, 11) Mahopọnna dọ Job go wẹ Satani to hodọ gando, nuhe dọ e te wẹ yindọ ṣejannabi wẹ nọ whàn gbẹtọvi lẹpo nado sẹ̀n Jiwheyẹwhe.

Aliho tẹwẹ yọ́n hugan nado didẹ whẹho titengbe enẹlẹ whladopo podọ kakadoi? Jiwheyẹwhe nuyọnẹntọ daho lọ, tindo pọngbọ he yọ́n hugan lọ, yèdọ pọngbọ he na zọ́n bọ mí ma na hẹn todido bu. (Lomunu lẹ 11:33) E de nado na dotẹnmẹ gbẹtọvi lẹ nado dugán do yede ji  na ojlẹ de, na kọdetọn lọ lẹ nido do gandudu mẹhe tọn yọ́n hugan hia.

Ninọmẹ awubla tọn he to aigba ji to egbehe lẹ yin kunnudenu he họnwun dọ gandudu gbẹtọvi tọn ko jai pete. E ma yindọ gandudu aihọn tọn lẹ ma penugo nado hẹn jijọho, hihọ́ po ayajẹ po wá na gbẹtọvi lẹ wẹ gba, ṣigba yé ko sọ dibla hù aigba lọ sudo pete. Ehe yidogọna nugbo yinyin nuhe Biblu dọ tọn dọmọ: “E ma tin to mẹhe to zọnlinzin mẹ nado do afọdide etọn lẹ gba.” (Jelemia 10:23) Gandudu Jiwheyẹwhe tọn kẹdẹ wẹ sọgan hẹn jijọho nujọnu tọn, ayajẹ, po dagbemẹninọ po wá na gbẹtọvi lẹ, na nuhe yin lẹndai Jiwheyẹwhe tọn niyẹn.—Isaia 45:18.

Ṣigba, nawẹ Jiwheyẹwhe na hẹn lẹndai etọn na gbẹtọvi lẹ di gbọn? Flindọ Jesu plọn hodotọ etọn lẹ nado nọ hodẹ̀ dọmọ: “Na ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.” (Matiu 6:10) Jiwheyẹwhe na yí Ahọluduta etọn zan nado sukúndona nuhe nọ hẹn yajiji wá lẹpo to ojlẹ dide etọn mẹ. (Daniẹli 2:44) Ohẹ́n, azọ̀n po okú po na lẹzun onú hoho lẹ. Gando wamọnọ lẹ go, Biblu dohia dọ Jiwheyẹwhe “na whlẹn agbátọnọ lọ whenu e to awhádo.” (Psalm 72:12-14) Na nuhe dù mẹhe to azọ̀n jẹ lẹ, Biblu dopagbe dọmọ: “Finẹnu lẹ ma to na dọmọ, yẹn to azọ̀njẹ.” (Isaia 33:24) Jesu tlẹ sọ dọ gando oṣiọ he to oflin Jiwheyẹwhe tọn mẹ lẹ go dọmọ: “Ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè etọn bo tọ́njẹgbonu.” (Johanu 5:28, 29) Opagbe homẹmiọnnamẹ tọn nankọ tẹlẹ die!

Nudi owhe 17 to asidan Sidnei tọn he yin nùdego to bẹjẹeji hosọ ehe tọn mẹ godo, e dọmọ: “N’ma gblewhẹdo Jehovah Jiwheyẹwhe gbede na asidan lọ, ṣigba n’dona yigbe dọ n’hẹn todido bu to ewọ mẹ to tintan whenu. Azán delẹ nọ wá bọ n’nọ blawu taun, podọ n’nọ viavi eyin n’lẹnnupọndo oblọ ṣie ji. Ṣigba po alọgọ Biblu tọn po, n’wá mọdọ asidan lọ ma yin yasanamẹ de sọn Jiwheyẹwhe de. Na Biblu dọ dọ, ‘ojlẹ po kosọ po mẹ wẹ onú te na omẹ popo.’ Dẹ̀hiho hlan Jehovah po wefọ tangan delẹ hihia po ko hẹn mi lodo to gbigbọ-liho bosọ gọalọna mi nado wleawuna pọndohlan dagbe.”—Yẹwhehodọtọ 9:11; Psalm 145:18; 2 Kọlintinu lẹ 4:8, 9, 16.

Eyin mí nọ flin nuhewutu Jiwheyẹwhe do jotẹnna yajiji po lehe awufiẹsa he yajiji nọ hẹnwa lẹ na busẹ to madẹnmẹ do po, ehe na gọalọna mí ma nado hẹn todido bu to Jiwheyẹwhe mẹ gbede. Mí deji dọ Jiwheyẹwhe wẹ “ahọsumẹtọ mẹhe to dindin in vẹkuvẹku lẹ tọn.” Mẹdepope he ze yise etọn sinai do ewọ po Visunnu etọn po ji ma na yin hinhẹn jẹflumẹ.—Heblu lẹ 11:6; Lomunu lẹ 10:11.