N’yin jiji to Paddington, yèdọ lẹdo Londres tọn de he mẹ gbẹtọ sù te taun to Angleterre. Yẹn po mẹdaho ṣie yọnnu atọ̀n po wẹ nọ onọ̀ ṣie dè. Otọ́ ṣie ma nọ dọ mítọn sọmọ na e nọ nùahànmú wutu.

To whenue n’to ovu, onọ̀ ṣie plọn mi nado nọ hodẹ̀ to ozán lẹpo mẹ. N’do Biblu pẹvi de he mẹ owe Salmu lẹ tọn kẹdẹ te, podọ n’nọ pà ohàn nado nọ ji yé. N’flindọ n’hia nude to owe aihọn tọn ṣie de mẹ he gbọṣi ayiha mẹ na mi, enẹ wẹ: “Ogbẹ̀ na vọ̀ to gbèdopo.” Hogbe enẹlẹ nọ do amlọnmadọ́ na mi bọ n’nọ to nulẹnpọn do sọgodo ji. N’nọ dọna dee dọ, ‘Be ogbẹ̀ lọ ján die ya? Etẹ wà n’ka te to gbẹ̀mẹ?’ N’ma jlo na kú!

N’wá jẹ alọdo afinyọnnuwiwa mẹ ji sinsinyẹn. N’nọ tẹnpọn nado dọho hẹ oṣiọ lẹ, bo nọ yì tẹpa lẹ mẹ hẹ wehọmẹvigbẹ́ lẹ, bọ mí sọ nọ pọ́n sinima he dobu lẹ. Yé nọ hẹn awuvivi wá na mí bosọ nọ dobuna mí to ojlẹ dopolọ mẹ.

N’jẹ tasinyẹn ji to whenue n’tindo owhe ao poun. N’jẹ azọ̀-nù ji bo yawu peve to e mẹ. N’tlẹ wá jẹ marijuana nù ji. To whenue n’do owhe 11, n’ko jẹ ahàn sinsinyẹn nù ji. Dile etlẹ yindọ n’ma yiwanna otọ́n etọn, n’nọ yiwanna lehe e nọ yinuwadomẹji do. N’sọ yiwanna húnhiho po wedudu po. N’nọ yì agọ́ ji gọna wedutẹn zánmẹ tọn lẹ to whedepopenu he e yọnbasi. N’nọ họ̀n sọn whégbè to zánmẹ bo nọ lẹkọ whẹpo ai nido họ́n. Na agbọ́ nọ pé mi to wunkẹngbe wutu, n’nọ saba gọ̀n wehọmẹ. Eyin n’wá yì janwẹ, n’nọ nù ahàn sinsinyẹn to klasi.

To owhe godo tọn he n’yizan to wehọmẹ, n’ma dín. Na walọ tasinsinyẹn tọn ṣie ma nọ vẹna mi wutu, onọ̀ ṣie jẹflumẹ bo gblehomẹ. Mí dọjlẹ bọ n’tọ́n sọn whégbè. Na ojlẹ de, n’nọpọ́ hẹ Tony he yin họntọn ṣie sunnu bo to ogbẹ́ Rasta tọn de mẹ. E nọ doalọ to nuyiwa sẹ́nhẹngba tọn lẹ mẹ bo nọ sà amasin adínọ bosọ yin yinyọnẹn taidi danuwatọ akonka. E ma dẹn bọ n’mọhò, bọ whenue n’do owhe 16 poun, n’ji visunnu mítọn.

Whenue n’to fie yè nọ na adọtẹn onọ̀ he ma ko wlealọ bo jivi lẹ po ovi yetọn lẹ po do wẹ n’mọ Kunnudetọ Jehovah tọn  lẹ whla tintan. Aṣẹpatọ lẹdo lọ tọn lẹ wẹ na mi họ̀nù de do finẹ. Yọnnu Kunnudetọ awe nọ wá dla onọ̀ jọja delẹ pọ́n whẹwhẹ. To gbèdopo, n’kọnawudopọ hẹ yé to hodọdopọ yetọn mẹ. Yanwle ṣie wẹ nado dohia dọ nuhe Kunnudetọ lẹ to pinplọnmẹ ma sọgbe. Ṣigba, yé yí homẹfa do na gblọndo kanbiọ susu he n’kanse lẹ tọn to aliho he họnwun mẹ sọn Biblu mẹ. Yé nọ homẹtọnpọn bosọ jọmẹ, bọ enẹ yinuwado ji e taun. Enẹwutu, yẹnlọsu yigbe nado plọn Biblu.

E ma dẹn bọ n’plọn nude to Biblu mẹ he diọ gbẹzan ṣie. Whenue n’yin jọja, n’nọ dibuna okú. Amọ́ todin, n’wá mọ nuhe Jesu plọnmẹ gando fọnsọnku go! (Johanu 5:28, 29) Humọ, n’plọn dọ Jiwheyẹwhe nọ hò ṣie pọ́n. (1 Pita 5:7) Hogbe Jelemia 29:11 tọn lẹ wẹ nọ yinuwado ji e hugan he dọmọ: “‘Na yẹn yọ́n nuhe lẹn n’te gando mì go lẹ ganji,’ wẹ Jehovah dọ, ‘yèdọ linlẹn jijọho tọn lẹ bọ e ma yin nugbajẹmẹji tọn lẹ, na mìwlẹ nido tindo sọgodo dagbe de po todido de po.’” N’wá yise dọ yẹnlọsu sọgan nọgbẹ̀ kakadoi to Paladisi mẹ to aigba ji.—Salmu lẹ 37:29.

Kunnudetọ Jehovah tọn lẹ do owanyi nujọnu tọn hia mi. Whla tintan he n’yì opli yetọn, nuhe n’mọ lẹ dọnmẹ taun—mẹlẹpo wẹ jọmẹ! (Johanu 13:34, 35) Enẹ gbọnvo taun na lehe yè yinuwa hẹ mi do to ṣọṣi lẹdo lọ tọn de mẹ. Kunnudetọ lẹ dokuavọna mi mahopọnna ninọmẹ ṣie lẹ. Yé yí whenu zan hẹ mi, do mẹtọnhopọn hia mi, bo na mi ayidonugo, podọ yé gọalọna mi to aliho voovo lẹ mẹ. N’mọdọ n’yin apadewhe whẹndo daho owanyinọ de tọn.

N’plọn to Biblu mẹ dọ n’dona basi diọdo lẹ nado nọgbẹ̀ sọgbe hẹ nujinọtedo walọ dagbe tọn he yiaga Jiwheyẹwhe tọn lẹ. E ma bọawuna mi nado jo azọ̀-nùnù do. To ojlẹ dopolọ mẹ, n’mọdọ húnhiho delẹ nọ yidogọna ojlo ṣie nado nù marijuana, enẹwutu n’diọ húnhiho he n’nọ dotoaina lẹ. Na n’masọ jlo nado nọ nùahànmú wutu, n’doalọtena agọ́ ji yìyì gọna wedutẹn zánmẹ tọn lẹ, yèdọ fie n’sọgan yin whiwhlepọn nado nùahànmú te lẹ. N’sọ jihọntọn yọyọ lẹ he pọndohlan dagbe yetọn na gọalọna mi to gbẹzan yọyọ ṣie mẹ.—Howhinwhẹn lẹ 13:20.

To ojlẹ enẹ mẹ, Tony lọsu ko jẹ Biblu plọn hẹ Kunnudetọ Jehovah tọn lẹ ji. Na Kunnudetọ lẹ yí Biblu do na gblọndo kanbiọ etọn lẹ tọn wutu, ewọ lọsu wá kudeji dọ nuhe emi to pinplọn lẹ yin nugbo. E basi diọdo ayidego tọn lẹ: e jo ogbẹ́ etọn hoho he yin danuwatọ lẹ do, doalọtena danuwiwa, bo masọ nọ nù marijuana ba. Nado sọgan hẹn homẹ Jehovah tọn hùn to gigọ́ mẹ, mí omẹ awe lẹ sọ mọdọ mí dona jo gbẹzan fẹnnuwiwa tọn mítọn do bo wleawuna lẹdo dagbe de na visunnu mítọn. Mí wlealọ to 1982.

N’flindọ n’nọ dín hosọ Atọ̀họ̀-Nuhihọ́ lọ Tọn po Réveillez-vous! * po tọn lẹ he dọhodo mẹhe ko basi diọdo ṣie nkọ po kọdetọn dagbe po lẹ ji. Apajlẹ yetọn lẹ na mi tuli taun! N’mọ huhlọn yí nado zindonukọn to vivẹnudido ṣie mẹ bo ma jogbe. N’nọ hodẹ̀ hlan Jehovah dọ ni ma jo mi do blo. Yẹn po Tony po yí baptẹm to juillet 1982 taidi Kunnudetọ Jehovah tọn.

Awuwiwlena haṣinṣan de hẹ Jehovah Jiwheyẹwhe wẹ whlẹn ogbẹ̀ ṣie. Yẹn po Tony po ko mọ godonọnamẹ Jehovah tọn to ninọmẹ sinsinyẹn lẹ mẹ. Mí ko plọn nado nọ ganjẹ Jehovah go to ninọmẹ sinsinyẹn lẹ mẹ, podọ ewọ nọ gọalọna whẹndo mítọn bosọ nọ penukundo mí go to whelẹponu.—Salmu lẹ 55:22.

N’ko mọ awuvivi to alọgigọna visunnu po viyọnnu mítọn po mẹ nado wá yọ́n Jehovah dile yẹnlọsu wà do. Todin, ayajẹ dopolọ wẹ n’nọ tindo dile n’mọ bọ ovi yetọn lẹ lọsu to whinwhẹ́n deji to oyọnẹn Jiwheyẹwhe tọn mẹ.

N’masọ nọ do amlọnmadọ́ na dee nado to nuhà gando sọgodo kavi okú go ba. Yẹn po Tony po nọ basi gbejizọnlin yì agun Kunnudetọ Jehovah tọn lẹ tọn voovo mẹ to sẹmẹsẹmẹ nado nọ na tuli yé. Mí nọ kọnawudopọ hẹ yé nado plọn mẹdevo lẹ dọ eyin yé do yise hia to Jesu mẹ, yelọsu sọgan duvivi ogbẹ̀ madopodo tọn.