“Mí ma kọngbedopọ do linlẹn de ji taun dọ Jiwheyẹwhe tindo yinkọ jọnun de kavi lala, podọ yinkọ nankọ he e na ko yin taun.”—Sinsẹ̀n-nuplọnmẹtọ David Cunningham, to owe lọ Theological Studies mẹ.

Jiwheyẹwhe dọmọ: “Yẹn wẹ Jehovah. Yinkọ ṣie niyẹn.” (Isaia 42:8) Yinkọ lọ Jehovah wá sọn Heblugbe mẹ, bo zẹẹmẹdo “E Nọ Hẹn Nado Lẹzun.”—Jenẹsisi 2:4, nudọnamẹ odò tọn.

Jehovah jlo dọ mí ni nọ yí yinkọ emitọn zan. “Mì . . . nọ dawhá ylọ oyín etọn,” wẹ Biblu dọ. E sọ yidogọ dọ: “Mì nọ hẹn azọ́n etọn lẹ zun yinyọnẹn to gbẹtọ lẹ ṣẹnṣẹn! Mì nọ lá dọ oyín etọn ko yin zizedaga.”—Isaia 12:4.

Jesu yí oyín Jiwheyẹwhe tọn zan. To odẹ̀ etọn de mẹ, Jesu dọna Jehovah dọmọ: “N’ko hẹn oyín towe zun yinyọnẹn na yé [enẹ wẹ devi Jesu tọn lẹ] bo nasọ hẹn ẹn zun yinyọnẹn.” Naegbọn Jesu do hẹn yinkọ Jiwheyẹwhe tọn zun yinyọnẹn na devi etọn lẹ? E yidogọ dọmọ: “Na owanyi he hiẹ [Jiwheyẹwhe] tindo na mi nido sọgan tin to yé mẹ bọ yẹn na tin to kọndopọ mẹ hẹ yé.”—Johanu 17:26.

Walter Lowrie he yin sinsẹ̀n-nuplọnmẹtọ de wlan dọmọ: “Mẹhe ma yọ́n lehe Jiwheyẹwhe nọ yin, ma gán nọ mọ ewọ di omẹ jọnun he tin nugbo de, podọ mẹlọ ma gán yiwanna ewọ eyin e nọ mọ ẹn di huhlọn tata de poun.”

Dawe de he nọ yin Victor nọ yì ṣọṣi to sẹmẹsẹmẹ dai, amọ́ e nọ mọ to ede mẹ dọ emi ma yọ́n Jiwheyẹwhe ganji. E dọmọ: “To nukọn mẹ, n’wá plọn dọ yinkọ Jiwheyẹwhe tọn nọ yin Jehovah, bọ e di dọ din wẹ n’wá yọ́n mẹhe ewọ yin to aliho he sọgbe mẹ. N’do numọtolanmẹ lọ taidi dọ n’wá dukosọ hẹ mẹde he yè ko nọ dọho etọn na mi taun sọn ojlẹ dindẹn die nkọ. Todin, n’nọ mọ ẹn di Omẹ jọnun de, bọ n’sọ jihọntọn hẹ ẹ.”

Ehe dohia dọ Jehovah nọ dọnsẹpọ mẹhe nọ yí yinkọ etọn zan lẹ. Jiwheyẹwhe dopà na “mẹhe nọ lẹnayihamẹpọn do oyín etọn ji lẹ” dọmọ: “Yẹn na do awuvẹmẹ hia yé kẹdẹdile gbẹtọ de nọ do awuvẹmẹ hia visunnu etọn he nọ setonuna ẹn do.” (Malaki 3:16, 17) Jiwheyẹwhe sọ nọ suahọ mẹhe nọ dawhá ylọ oyín etọn lẹ. Biblu dọmọ: “Mẹdepope he dawhá ylọ oyín Jehovah tọn wẹ na yin whinwhlẹngán.”—Lomunu lẹ 10:13.