WETA 35

Nawẹ N’Gán Lẹzun Họntọn Jiwheyẹwhe Tọn Gbọn?

To adángbòmẹ sinsinyẹn de godo, Jeremy wá mọdọ nujọnu wẹ e yin nado jihọntọn hẹ Jiwheyẹwhe. E basi zẹẹmẹ dọmọ: “Whenue n’do owhe 12, otọ́ ṣie jo whẹndo mítọn do. To zánmẹ gbèdopo n’to dẹ̀ho to adọzan ṣie ji, bo vẹvẹ na Jehovah nado gọalọna otọ́ ṣie na ni lẹkọwa.”

Na Jeremy jẹflumẹ wutu, e ze Biblu etọn bo jẹ hihia ji. Whenue e hia Salmu lẹ 10:14, hogbe lọ lẹ whàn ẹn sisosiso. Wefọ enẹ dọ gando Jehovah go dọmọ: “Hiẹ dè wẹ mẹhe yin wiwle gbọn kosọ ylankan dali lọ nọ lẹhlan; hiẹ sọ wẹ alọgọtọ tọṣiọvi tọn.” Jeremy dọmọ: “N’mọdọ Jehovah wẹ to hodọna mi bo jlo dọ n’ma yọnẹn dọ emi wẹ alọgọtọ ṣie; emi wẹ Otọ́ ṣie. Be n’gán vọ́ do otọ́ de he yọ́n hugan ewọ ya?

VLAVO a to ninọmẹ Jeremy tọn nkọ mẹ wẹo kavi lala, Biblu dohia dọ Jehovah jlo dọ a ni lẹzun họntọn emitọn. Na nugbo tọn, Biblu dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.” (Jakọbu 4:8) Lẹnnupọndo nuhe enẹ zẹẹmẹdo ji: Mahopọnna dọ a ma gán mọ ewọ—bọ e sọ họnwun dọ ewọ ma yin ogbẹ́ towe to aliho depope mẹ—Jehovah Jiwheyẹwhe to yiylọ we nado lẹzun họntọn etọn!

Ṣigba, e na biọ dọ a ni dovivẹnu nado lẹzun họntọn Jiwheyẹwhe tọn. Di apajlẹ, eyin a do vounvoun de do họmẹ, a yọnẹn dọ e ma sọgan whẹ́n na ede. Whẹpo e nado whẹ́n, a dona nọ húsinna ẹn to gbesisọ mẹ bosọ nọ hẹn ẹn do ninọmẹ dagbe mẹ na e nido vùn ganji. Vivẹnu dopolọ wẹ họntọnjiji hẹ Jiwheyẹwhe nọ biọ. Etẹwẹ a gán wà nado hẹn haṣinṣan mọnkọ lodo?

Biblu Pinplọn Yin Nujọnu

Eyin a na jihọntọn hẹ mẹde, e na biọ dọ mì ni nọ dọhodopọ hẹ ode awetọ, bosọ nọ dotó mìdelẹ ganji. Nudopolọ wẹ gando họntọnjiji hẹ Jiwheyẹwhe go. Biblu hihia po pinplọn ẹn po wẹ yin aliho dagbe lọ nado nọ dotó nuhe Jiwheyẹwhe to didọna mí.—Salmu lẹ 1:2, 3.

Na nugbo tọn, a gán nọma nọ yiwanna nupinplọn sọmọ. Nuhe jọja susu yiwanna hugan wẹ televiziọn pinpọn, aihundida to video ji, kavi nado deayidai poun hẹ hagbẹ lẹ. Amọ́, eyin a jlo na yin họntọn Jiwheyẹwhe tọn, wagbọn de ma tin; e na biọ dọ a ni nọ dotoaina ẹn gbọn Ohó etọn pinplọn dali.

Etomọṣo, a hanú blo. Biblu pinplọn ma na pẹnagbàn we. A sọgan wá yiwanna Biblu pinplọn—eyin a tlẹ nọ mọdọ to paa mẹ nupinplọn ma yin aṣa emitọn. Onú tintan he a dona wà wẹ nado de whenu dovo na Biblu pinplọn. Viyọnnu de he nọ yin Lais dọmọ: “N’ze tito de dai. Onú tintan he n’nọ wà eyin n’fọ́n to afọnnu lẹpo wẹ nado hia weta Biblu tọn dopo.” Tito vò wẹ Maria uwọ he yin owhe 15 mẹvi de zedai. E dọmọ: “N’nọ hia adà Biblu tọn kleun de to ozàn lẹpo mẹ whẹpo do yihọ.”

Eyin hiẹ lọsu jlo na ze tito nupinplọn tọn de dai, pọ́n  apotin he tin to weda 292 ji mẹ whẹ́. Enẹgodo, to odò, kàn ojlẹ he mẹ a gán nọ de nukunwhiwhe 30 kavi humọ dovo te nado plọn Ohó Jiwheyẹwhe tọn.

․․․․․

Bẹjẹeji de poun wẹ ojlẹ de didedovo yin. Amọ́, eyin a jẹ nuplọn ji nugbonugbo, a sọgan wá mọdọ e ma yin whelẹponu wẹ Biblu hihia nọ bọawu. E yọnbasi dọ a na kọngbedopọ hẹ Jezreel owhe 11 mẹvi de, he dọ madoadúdẹji dọmọ: “Adà Biblu tọn delẹ nọ gẹdẹ taun bo ma nọ vivi sọmọ.” Eyin e nọ wá ṣí mọ na we, a hònúpla blo. Whedepopenu he a to Biblu plọn, nọ mọdọ whenu towe yizan wẹ a te nado dotoaina họntọn towe Jehovah Jiwheyẹwhe. Taidi kọdetọn de, a na duvivi Biblu pinplọn towe tọn bosọ mọaleyi sọn e mẹ dile a to vivẹnudo!

Dẹ̀hiho Yin Nujọnu Taun

Mí nọ dọhona Jiwheyẹwhe gbọn dẹ̀hiho gblamẹ. Nunina jiawu de wẹ dẹ̀hiho yin! A sọgan lẹhlan Jehovah Jiwheyẹwhe to ojlẹ depope mẹ to okle kavi zánmẹ. E nọ to gbesisọ mẹ to whepoponu nado dotoaina we. Gbọnvona enẹ, e sọ nọ tindo ojlo to nuhe na dọna ẹn a te mẹ. Abajọ Biblu dotuhomẹna mí dọmọ: “To nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe.”—Filipinu lẹ 4:6.

Dile wefọ enẹ dohia do, nususu go wẹ a sọgan dọhona Jehovah gando. E gán yin nuhahun po nuhe nọ do lẹnpọn na we lẹ po. E gán sọ yin nuhe a mọdọ emi dona dopẹ́ etọn na ẹn lẹ. Na nugbo tọn, be e ma nọ wá jọ bọ a nọ dopẹna họntọn towe lẹ na onú dagbe he yé wà na we lẹ ya? A sọgan wà nudopolọ na Jehovah, yèdọ mẹlọ he ko wà nususu do ota towe mẹ hugan họntọn devo depope.—Salmu lẹ 106:1.

To odò fi, slẹ nudelẹ he sin opẹ́ a nọ do na Jehovah.

․․․․․

Matin ayihaawe, nudelẹ nọ wá gbàhundona we kavi hẹn ayimajai wá na we sinsinyẹn sọn ojlẹ de mẹ jẹ devo mẹ. Salmu lẹ 55:22 dọmọ: “Ze agbàn pinpẹn towe dlan Jehovah ji, ewọ nasọ penukundo gowe. Ewọ ma na dike dodonọ ni jai gbede.”

To odò, slẹ ahunmẹdunamẹnu towe delẹ he go a na jlo nado nọ hodẹ̀ gando.

․․․․․

Numimọ Mẹdetiti Tọn

Họntọnjiji hẹ Jiwheyẹwhe sọ bẹ adà devo hẹn he a ma dona dovọ́na. Salmu-kantọ Davidi dọmọ: “Mì dọ́pọ́n bo mọdọ Jehovah yọ́n.” (Salmu lẹ 34:8) Whenue Davidi kàn Salmu 34tọ ehe, e ṣẹṣẹ pehẹ nuhahun he kàn dẹpẹ biọ de wẹ. E to hinhọ̀nna Ahọlu Sauli kanylantọ lọ wẹ—mẹhe to ogbé etọn yàn nado hù i. Amọ́, kẹntọ etọn Filistinu lẹ ṣẹnṣẹn wẹ e wá yì dín fibẹtado do. Na Davidi sọ mọdọ ogbẹ̀ emitọn to owù mẹ to finẹ wutu, e yí zinzin zan bo yinuwa di mẹhe hùnalẹ̀, bo gbọnmọ dali penugo nado họ̀ngán.—1 Samuẹli 21:10-15.

Davidi ma mọdọ kànbibi emitọn wẹ zọ́n bọ emi penugo nado họ̀ngán. Kakatimọ, Jehovah wẹ e dopẹna. Jẹnukọnna nuhe mí hia to wefọ Salmu tọn he yin nùdego to aga mẹ, Davidi ko wlan dọ: “Yẹn hodẹ̀ hlan Jehovah bọ ewọ siọ mi. E sọ whlẹn mi sọn obu ṣie lẹpo mẹ.” (Salmu lẹ 34:4) Numimọ mẹdetiti tọn ehe he Davidi tindo wẹ zọ́n bọ e sọgan na tuli mẹdevo lẹ dọ “mì dọ́pọ́n bo mọdọ Jehovah yọ́n.” *

Be a gán donù numimọ he a tindo to gbẹ̀mẹ de go he hẹn we kudeji dọ Jehovah nọ hò towe pọ́n ya? Eyin mọ wẹ, kàn ẹn do odò fi. Doayi e go: E ma biọ dọ numimọ he a tindo lọ ni sẹhundaga dandan. Tẹnpọn nado lẹnnupọndo dona kleunkleun he a nọ duvivi etọn egbesọegbesọ lẹ ji, nudelẹ he a gán nọma nọ ylọdọ nujọnu sọmọ.

․․․․․

Vlavo mẹjitọ towe lẹ wẹ plọn we Biblu. Eyin mọ wẹ, be dona dopo niyẹn. Ṣigba, hiẹ lọsu wẹ dona dovivẹnu nado jihọntọn hẹ Jiwheyẹwhe. Eyin a ma ko wàmọ, a sọgan yí ayinamẹ he to weta ehe mẹ lẹ zan nado bẹjẹeji. Jehovah na dona vivẹnudido towe lẹ. Biblu dọmọ: “Mì to bibiọ zọnmii, e nasọ yin nina mì; mì to dindin zọnmii, mì nasọ mọ.”—Matiu 7:7.

A SỌGAN MỌ NUSUSU DOGỌ GANDO HOSỌ EHE GO TO BLADOPỌ 1 OWE EHE TỌN MẸ, TO WETA 38 PO 39TỌ PO MẸ

TO WETA HE BỌDEGO MẸ

Be e nọ vẹawuna we nado dọhona mẹdevo lẹ gando Jiwheyẹwhe go wẹ ya? Plọnnu gando lehe a gán nọ yiavùnlọna nuyise towe lẹ do.

[Nudọnamẹ odò tọn]

WEFỌ TANGAN

“Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.”—Matiu 5:3.

AYINAMẸ

Nọ hia weda Biblu tọn ẹnẹ poun to azán dopodopo ji, gbọnmọ dali a na dotana Biblu blebu to nudi owhe dopo gblamẹ.

BE A YỌNẸN YA . . . ?

Nugbo lọ dọ a to owe ehe hia bosọ to ayinamẹ sinai do Biblu ji etọn lẹ yido-yizan mẹ, yin ohia lọ dọ Jehovah nọ hò towe pọ́n tlọlọ.—Johanu 6:44.

AFỌDIDE HE N’DONA ZE!

Nado mọaleyi sọn Biblu pinplọn ṣie mẹ dogọ, n’na ․․․․․

Nado penugo bo nọ hodẹ̀ whẹwhẹ dogọ, n’na ․․․․․

Nuhe n’jlo na kanse mẹjitọ ṣie lẹ gando whẹho ehe go wẹ ․․․․․

ETẸWẸ A LẸN?

● Nawẹ a sọgan duvivi oplọn mẹdetiti tọn towe tọn dogọ gbọn?

● Naegbọn Jehovah nọ jlo na dotoaina odẹ̀ gbẹtọvi mapenọ lẹ tọn?

● Nawẹ a sọgan hẹn aliho he mẹ a nọ hodẹ̀ te pọnte dogọ gbọn?

[Nudọnamẹ tangan lẹ]

“Whenue n’to pẹvi, odẹ̀ ṣie lẹ nọ yin dọvọdọ lẹ kẹdẹ. Todin, n’to vivẹnudo nado nọ hodẹ̀ gando onú dagbe po nuylankan he jọ to azán dopodopo ji lẹ po go. Onú voovo lẹ wẹ nọ jọ to azán dopodopo ji, enẹwutu n’masọ nọ to nudopolọ lẹ vọdọ mapote to odẹ̀ ṣie lẹ mẹ ba.”​—Eve

[Apotin/​Yẹdide]

 Lehe A Gán Plọnnu sọn Biblu mẹ Do

1. De otàn Biblu tọn de he e na jlo we nado hia. Hodẹ̀ nado biọ nuyọnẹn he a nado mọnukunnujẹ kandai lọ mẹ.

2. Hia kandai lọ po sọwhiwhe po. Nọ yiagbọji do hiawe. Dile a to kandai lọ hia, nọ yí nukun homẹ tọn do pọ́n nujijọ lọ hlan. Nọ ze dewe do nujijọ lọ lẹ mẹ pete dile e yọnbasi do, taidi dọ a to otẹn lọ mẹ: Dike ni taidi na we dọ a to nujijọ lọ lẹ mọ tlọlọ wẹ, to ogbè mẹhe to hodọ to kandai lọ mẹ lẹ tọn sè, to mimọ lehe jẹhọn to nuyiwa to lẹdo lọ mẹ do, bosọ to otọ́n núdùdù lẹ tọn sè, po mọmọ po sọyi. Ni nọ taidi na we dọ nulọ lẹ to jijọ alọnu-alọnu!

3. Nọ lẹnnupọndo nuhe a ṣẹṣẹ hia lẹ ji. Nọ kàn kanbiọ he bọdego ehe nkọ lẹ sè dewe:

● Naegbọn Jehovah do hẹn otàn ehe nado tin to Ohó etọn Biblu mẹ?

● etẹ to mẹhe go kandai lọ donù lẹ mẹ sin apajlẹ wẹ e jẹ nado hodo, podọ nuyiwa detẹ lẹ to yé mẹ tọn wẹ yin apajlẹ avase tọn lẹ?

● Nuplọnmẹ yọ́n-na-yizan tẹlẹ wẹ n’gán mọyi sọn nuhe n’hia ehe mẹ?

● Etẹwẹ kandai ehe plọn mi gando Jehovah po aliho he mẹ e nọ yinuwa te po go?

4. Nọ hodẹ̀ kleun de hlan Jehovah. Dọ nuhe a plọn sọn Biblu pinplọn towe mẹ na ẹn, gọna tito he bayi a te nado yí nuhe a plọn lẹ do yizan mẹ to gbẹzan towe mẹ. Nọ dopẹna Jehovah to whepoponu na nunina he e na we lọ, yèdọ Ohó etọn, Biblu Wiwe lọ!

[Yẹdide]

“Ohó towe wẹ miyọ́ngbán de na afọ ṣie, podọ hinhọ́n de na ali ṣie.”—Salmu lẹ 119:105.

[Apotin/​Yẹdide]

Nọ Ze Nujọnu lẹ Do Otẹn Tintan Mẹ

Be alọnu towe nọ ján sọmọ bọ a ma nọ mọ whenu nado hodẹ̀ kavi nado plọn Biblu wẹ ya? To paa mẹ, nuhe go e nọ sọn wẹ otẹn he mẹ a nọ ze nuhe yin nujọnu hugan lẹ do.

Tẹ́n ehe pọ́n: Ze lọba de bo bẹ zannu daho delẹ demẹ. Todin, kọ̀n okọ́ do lọba lọ mẹ​—kaka ni gọ́. A na mọdọ zannu lọ lẹpo gọna okọ́ lọ na mọtẹn ganji to lọba lọ mẹ.

Todin, hẹn lọba lọ jẹvọ́, amọ́ gbẹ́ hẹn zannu lọ lẹ po okọ́ lọ po go. Din, gọjẹ yé bẹ do lọba lọ mẹ ji dopodopo, amọ́ to aliho devo mẹ: Kọ̀n okọ́ lọ demẹ jẹnukọn, enẹgodo tẹnpọn nado bẹ zannu lọ lẹpo do lọba lọ mẹ. A mọdọ zannu lọ lẹ ma mọtẹn, kavi? Na to adà awetọ ehe mẹ, a bẹ okọ́ lọ do lọba lọ mẹ jẹnukọn wutu wẹ.

Etẹwẹ ehe plọn we? Biblu dọmọ: “Mì . . . mọdona nuhe yin nujọnu hugan lẹ.” (Filipinu lẹ 1:​10) Eyin a nọ ze onú flinflin lẹ taidi ayidedai lẹ do otẹn tintan mẹ, e na nọ di na we dọ a ma do whenu gbede to gbẹzan towe mẹ na nujọnu lẹ, yèdọ gbigbọnu lẹ. Amọ́ eyin a hodo ayinamẹ Biblu tọn he to aga ehe, a na nọ mọ whenu na nuhe gando Ahọluduta lọ go lẹ podọ na ayidedai lẹ lọsu. Aṣli lọ wẹ nado yọ́n nuhe a dona zedo lọba towe mẹ jẹnukọn!

[Yẹdide]

Kẹdẹdile vounvoun he yè do dó nude mẹ bo zedo họmẹ de dona nọ yin nukunpedego nado whẹ́n ganji do, nudopolọ wẹ họntọnjiji hẹ Jiwheyẹwhe nọ biọ