NUPINPLỌN 3
Be Jiwheyẹwhe Dè Wẹ Wẹndagbe lọ Wá sọn Nugbo Ya?
1. Mẹnu wẹ yin Dowatọ Biblu tọn?
Biblu mẹ wẹ wẹndagbe lọ dọ gbẹtọ lẹ na nọgbẹ̀ kakadoi to aigba ji yin kinkando. (Salmu lẹ 37:29) Owe flinflin 66 wẹ Biblu bẹhẹn. Sunnu nugbonọ 40 wẹ Jiwheyẹwhe yizan nado kàn yé. Mose wẹ kàn owe atọ́n tintan lẹ to nudi owhe 3 500 lẹ die. Owe godo tọn yin kinkan gbọn apọsteli Johanu dali to nuhe hugan owhe 1 900 lẹ die. Linlẹn mẹnu tọn lẹ wẹ Biblu-kantọ lẹ wlan? Jiwheyẹwhe yí gbigbọ wiwe etọn zan nado dọho hẹ Biblu-kantọ lọ lẹ. (2 Samuẹli 23:2) Linlẹn Jiwheyẹwhe tọn lẹ wẹ Biblu-kantọ lẹ wlan, e ma yin yetọn titi lẹ gba. Enẹwutu, Jehovah wẹ yin Dowatọ Biblu tọn.—Hia 2 Timoti 3:16; 2 Pita 1:20, 21.
Pọ́n video lọ Mẹnu Wẹ Yin Dowatọ Biblu Tọn?
2. Nawẹ mí sọgan wagbọn do yọnẹn dọ nuhe tin to Biblu mẹ lẹ yin nugbo?
Mí yọnẹn dọ Jiwheyẹwhe dè wẹ Biblu wá sọn na e dọ dọdai gando sọgodo go po gbesisọ po wutu. Gbẹtọ depope ma sọgan wà enẹ. (Jọṣua 23:14) Jiwheyẹwhe Ganhunupotọ lọ kẹdẹ wẹ sọgan mọ sọgodo gbẹtọvi lẹ tọn hlan nukọn po gbesisọ po.—Hia Isaia 42:9; 46:10.
Nuhe sọgbe wẹ e yin dọ owe he wá sọn Jiwheyẹwhe dè ni gbọnvo, podọ Biblu gbọnvo nugbo. Vọkan Biblu tọn liva susu wẹ ko yin mimá to ogbè kanweko susu lẹ mẹ. Dile Biblu tlẹ yin owe hoho de do, e tin to kọndopọ mẹ hẹ nuhe lẹnunnuyọnẹntọ dejidego lẹ dọ. Podọ omẹ 40 he kàn ẹn lẹ lọsu ma jẹagọdo yede. * Humọ, Jiwheyẹwhe nugbo lọ kẹdẹ dè wẹ zẹẹmẹ owanyi tọn he tin to Biblu mẹ sọgan wá sọn. Biblu sọ tindo huhlọn nado hẹn gbẹzan gbẹtọ lẹ tọn pọnte dogọ. Kunnudenu ehelẹ hẹn gbẹtọ livi susu lẹ kudeji dọ Ohó Jiwheyẹwhe tọn wẹ Biblu yin.—Hia 1 Tẹsalonikanu lẹ 2:13.
Pọ́n video lọ Nawẹ Mí Sọgan Kudeji Gbọn Dọ Biblu Yin Nugbo?
3. Etẹwẹ Biblu bẹhẹn?
Biblu zinnudo wẹndagbe lọ ji dọ Jiwheyẹwhe tindo linlẹn he gọ́ na owanyi de na gbẹtọvi lẹ. E basi zẹẹmẹ lehe gbẹtọ hẹn lẹblanulọkẹyi gbẹninọ to paladisi mẹ to aigba ji tọn bu do to bẹjẹeji po lehe paladisi na yin hinhẹngọwa do po tọn.—Hia Osọhia 21:4, 5.
Osẹ́n, nunọwhinnusẹ́n po ayinamẹ lẹ po sọ tin to Ohó Jiwheyẹwhe tọn mẹ ga. To yidogọ mẹ, Biblu bẹ kandai lehe Jiwheyẹwhe yinuwa hẹ gbẹtọvi lẹ do tọn hẹn—yèdọ kandai de he do jẹhẹnu Jiwheyẹwhe tọn lẹ hia. Enẹwutu, Biblu sọgan gọalọna we nado yọ́n Jiwheyẹwhe. E basi zẹẹmẹ lehe hiẹ sọgan lẹzun họntọn Jiwheyẹwhe tọn do.—Hia Salmu lẹ 19:7, 11; Jakọbu 2:23; 4:8.
4. Nawẹ hiẹ sọgan mọnukunnujẹ Biblu mẹ gbọn?
Alọnuwe ehe na gọalọna we nado mọnukunnujẹ Biblu mẹ, na e ze nuplọnmẹ lẹ donukọnnamẹ dile Jesu wà do. Jesu nọ dlẹnalọdo wefọ Biblu tọn lẹ debọdo-dego bosọ nọ basi “zẹẹmẹ Owe-wiwe lẹ tọn.”—Hia Luku 24:27, 45.
Onú vude wẹ na fọnjlodotenamẹ sọ wẹndagbe he wá sọn Jiwheyẹwhe dè. Ṣogan, mẹdelẹ ma nọ do ojlo hia to e mẹ, podọ e tlẹ nọ hẹn homẹgblena mẹdevo lẹ. Ma gbọjọ blo. Nado mọ ogbẹ̀ madopodo, hiẹ dona to vivẹnudo zọnmii nado yọ́n Jiwheyẹwhe.—Hia Johanu 17:3.
^ huk. 3 Pọ́n alọnuwe lọ Owe de Na Gbẹtọ Lẹpo.
