Gbẹtọ ahunjijlọnọ lẹ tin to sinsẹ̀n lẹpo mẹ. Wẹndagbe lọ wẹ yindọ Jiwheyẹwhe nọ mọ omẹ enẹlẹ bo nọ hò yetọn pọ́n. Ṣigba, e blawu dọ nuylankan susu ko yin wiwà gbọn sinsẹ̀nnọ lẹ dali. (2 Kọlintinu lẹ 4:3, 4; 11:13-15) Sọgbe hẹ linlin lẹ, sinsẹ̀n delẹ tlẹ nọ tindo mahẹ to nukunbibianamẹ, akọ̀ vivasudo, awhàn po danuwiwa do ovi lẹ go po mẹ. Awubla nankọ die ehe nọ hẹnwana mẹhe yí Jiwheyẹwhe sè lẹ!—Hia Matiu 24:3-5, 11, 12.

Sinsẹ̀n nugbo nọ pagigona Jiwheyẹwhe, ṣigba sinsẹ̀n lalo nọ hẹn homẹgblena ẹn. Sinsẹ̀n lalo nọ plọnmẹ nuhe ma tin to Biblu mẹ lẹ he bẹ nuplọnmẹ lalo gando Jiwheyẹwhe po mẹhe kú lẹ po go hẹn. Ṣigba, Jehovah jlo dọ gbẹtọ lẹ ni yọ́n nugbo lọ gando ewọ go.—Hia Ezekiẹli 18:4; 1 Timoti 2:3-5.

Homẹhunnu wẹ e yin dọ sinsẹ̀n he sọalọakọ́n dọ emi yiwanna Jiwheyẹwhe, ṣigba bọ aihọn Satani tọn wẹ yé yiwanna na taun tọn lẹ ma sọgan klọ Jiwheyẹwhe. (Jakọbu 4:4) Ohó Jiwheyẹwhe tọn dlẹnalọdo sinsẹ̀n lalo lẹpo taidi “Babilọni Daho lọ.” Tòdaho hohowhenu tọn he nọ yin Babilọni mẹ wẹ sinsẹ̀n lalo bẹjẹeji sọn to Singigọ azán Noa tọn gbè tọn godo. To madẹnmẹ, Jiwheyẹwhe na và sinsẹ̀n he nọ klọ gbẹtọvi lẹ bo nọ gbidikọna yé lẹ sudo.—Hia Osọhia 17:1, 2, 5, 16, 17; 18:8.

Wẹndagbe devo wẹ yindọ, Jehovah ma wọn gbẹtọ ahunjijlọnọ lẹ he tin to sinsẹ̀n lalo lẹ mẹ lẹdo aihọn pé gba. E to omẹ mọnkọtọn lẹ desọn sinsẹ̀n lalo mẹ gbọn nugbo lọ pinplọn yé dali.—Hia Mika 4:2, 5.

Jehovah nọ hò mẹhe jlo na yọ́n nugbo lọ bo wà dagbe lẹ tọn pọ́n. E dotuhomẹna yé nado tọ́n sọn sinsẹ̀n lalo mẹ. Mẹhe yiwanna Jiwheyẹwhe lẹ nọ wleawufo nado basi diọdo lẹ nado hẹn homẹ etọn hùn.—Hia Osọhia 18:4.

To owhe kanweko tintan whenu, to whenue gbẹtọ ahunjijlọnọ lẹ sè wẹndagbe lọ sọn apọsteli lẹ dè, yé kẹalọyi i po ayajẹ po. Yé plọn aliho yọyọ de sọn Jehovah dè, yèdọ aliho gbẹninọ tọn he nọ hẹn ayajẹ wá hugan de bo tindo lẹndai po todido po. Apajlẹ dagbe wẹ yé zedai na mí na yé kẹalọyi wẹndagbe lọ gbọn Jehovah zizedo otẹn tintan mẹ to gbẹzan yetọn mẹ dali.—Hia 1 Tẹsalonikanu lẹ 1:8, 9; 2:13.

Jehovah nọ kẹalọyi mẹhe jo sinsẹ̀n lalo do bo wá kọnawudopọ hẹ sinsẹ̀n-basitọ etọn lẹ. Eyin hiẹ kẹalọyi oylọ-basinamẹ zohunhunnọ Jehovah tọn, hiẹ na lẹzun họntọn etọn bo na biọ whẹndo yọyọ sinsẹ̀n-basitọ hatọ Jehovah tọn lẹ tọn he nọ do owanyi hia mẹ bo nasọ mọ ogbẹ̀ madopodo.—Hia Malku 10:29, 30; 2 Kọlintinu lẹ 6:17, 18.

Wẹndagbe de wẹ whẹdida sinsẹ̀n lalo tọn he ja lọ yin. E na hẹn kọgbọ wá na mẹlẹpo sọn kọgbidinamẹ si. Sinsẹ̀n lalo ma nasọ klọ gbẹtọ lẹ kavi klan yé gbede ba. Mẹhe to ogbẹ̀ lẹpo na nọ sẹ̀n Jiwheyẹwhe nugbo dopo akàn lọ to kọndopọ mẹ.—Hia Osọhia 18:20, 21; 21:3, 4.