Danielle, he yin Kunnudetọ Jehovah tọn de to Afrique du Sud, mọ saki de he ahisinọ de wọn jodo to kafe-satẹn de. Akuẹ-hẹnnu he mẹ akuẹ te de po kalti he yè do nọ họ̀nú ahọ́ po to saki lọ mẹ. Na Danielle magbe nado gọ̀ saki lọ jo wutu, e dín adlẹsi kavi sọha alokan tọn dawe lọ tọn to saki lọ mẹ, amọ́ yinkọ etọn kẹdẹ wẹ e mọ. E tẹnpọn nado mọ dawe lọ gbọn akuẹsẹdotẹn he dawe lọ nọ zan gblamẹ, amọ́ e ma pà ẹ. Na e ma jlo na hònúpla wutu, e ylọ sọha alokan tọn he e mọ to wema dotowhé tọn dawe lọ tọn de ji, ehe e mọ to saki lọ mẹ. Mẹhe nọ dokuavọnamẹ to dotowhé lọ wẹ ze alokan lọ bo yigbe dọ emi na na sọha alokan tọn Danielle tọn dawe lọ.

 E paṣa dawe lọ nado mọdọ dotowhé he e nọ yì ylọ ẹ bo dọna ẹn dọ Danielle ko mọ saki etọn bosọ jlo na gọ̀ ẹ jo na ẹn. To whenue e wá saki lọ yí gbé, Danielle po otọ́ etọn po wẹ e mọ. Yé yí dotẹnmẹ lọ zan nado dọna ẹn nuhewutu yé jẹtukla sọmọ nado dín in mọ. Yé basi zẹẹmẹ na ẹn dọ Kunnudetọ Jehovah tọn wẹ emi yin bo nọ jlo nado setonuna nuhe Biblu dọ lẹ. Enẹ wẹ zọ́n bọ yé nọ dovivẹnu nado yin nugbonọ to whelẹponu.—Heblu lẹ 13:18.

 To gànhiho kleun de godo, dawe lọ kanwehlan Danielle po otọ́ etọn po bo dopẹna yé whladopo dogọ, na saki po akuẹ-hẹnnu etọn he yé gọ̀ jo na ẹn po wutu. E wlan dọmọ: “E vivi na mi taun dọ mì jẹtukla sọmọ nado dín mi mọ. Homẹ ṣie hùn nado yọ́n mì bosọ jẹakọ hẹ whẹndo mìtọn, podọ n’na nọ flin mì na aliho he mẹ mì yawu do mi bo jọmẹ hẹ mi te. Nado do pinpẹn-nutọn ṣie hia, n’jlo na na nude mì. N’yọnẹn dọ mì nọ yí nususu do sanvọ́ nado sẹ̀n Jiwheyẹwhe mìtọn. Walọ mìtọn wẹ dekunnu enẹ tọn, dile nugbonọ-yinyin po walọ dagbe Danielle tọn po dohia do. N’jlo na dopẹna mì whladopo dogọ, podọ Jiwheyẹwhe ni dona sinsẹ̀nzọn he wà mì te.”

 To osun delẹ godo, otọ́ Danielle tọn sọ dukosọna dawe lọ bọ dawe lọ dọna ẹn dọ ojlẹ vude to whenue yé ko mọ yede wayi godo, emi to ahiwhle bo mọ akuẹ-hẹnnu de to kọmẹ. Whenue e mọ nawe he tindo akuẹ-hẹnnu lọ bo gọ̀ ẹ jo na ẹn, e dọ nue whàn ẹn nado wàmọ. E dohia dọ mẹde ko yinuwa hẹ emi lọsu po nugbonọ-yinyin po domọ to agọe. E dọmọ: “Nuyiwa nugbonọ-yinyin po homẹdagbe po tọn kẹnnẹ-kẹnnẹ de nọ dekọtọn do devo mẹ bo nọ hẹn gbẹzan mẹlẹpo tọn pọnte to lẹdo de mẹ.”