To 2011, dawe de tọ́n sọn Erythrée wá Norvège taidi fibẹtado-dintọ. Whenue Kunnudetọ Jehovah tọn lẹ disa wá e dè, e dọna yé dọ emi ko dukosọna Kunnudetọ lẹ to otò emitọn mẹ. E dọ dọ to whenue emi to awhàn mẹ to dọ́n, emi ko mọ bọ Kunnudetọ he yin wiwle sú do gànpamẹ na nuyise yetọn wutu lẹ ma joawuna kọgbidinamẹ nado biọ awhàn mẹ, etlẹ yin to whenue yè yinuwa hẹ yé po kanyinylan po.

 Amọ́ to ajiji mẹ, nude jọ bọ dawe ehe lọsu yin wiwle sú do gànpamẹ. To gànpa lọ mẹ, e mọ Kunnudetọ atọ̀n delẹ he yin zizedo gànmẹ na nuyise yetọn wutu sọn 1994 gbọ́n. Yé omẹ atọ̀n lẹ wẹ Paulos Eyasu, Negede Teklemariam po Isaac Mogos po.

 To whenue e to gànpamẹ, dawe lọ mọdọ Kunnudetọ Jehovah tọn lẹ nọ yí nue yé nọ plọnmẹ lẹ do yizan mẹ. E mọdọ yé nọ dọ nugbo bo tlẹ sọ nọ má núdùdù yetọn hẹ gàntọ devo lẹ. E sọ doayi lehe gàntọ hatọ etọn he yin Kunnudetọ lẹ nọ plọn Biblu egbesọegbesọ to pọmẹ bosọ nọ ylọ mẹdevo lẹ nado wá gọna yé do go. Whenue yè biọ to yé si nado doalọ wema de mẹ bo dohia dọ emi masọ yin Kunnudetọ ba, na yè nido de yé sọn gànpamẹ, yé gbẹ́ nado mọ́n yise yetọn.

 Onú ehelẹ yinuwado dawe ahunjijlọnọ ehe ji taun, bọ whenue e sawhé do Norvège godo, e jlo na yọ́n nuhewutu yise Kunnudetọ Jehovah tọn lẹ tọn do lodo sọmọ. Enẹwutu, whenue Kunnudetọ lẹ wá e dè, e jẹ Biblu plọn hẹ yé ji madọngbàn bosọ jẹ opli yetọn lẹ yì ji.

 To septembre 2018, e yí baptẹm bo lẹzun Kunnudetọ Jehovah tọn. Todin, e nọ yí dotẹnmẹ hundote he e mọ lẹpo zan nado dekunnuna mẹhe tọ́n sọn Érythrée po Soudan po lẹ, bo nọ gọalọna yé nado plọn Biblu podọ nado wleawuna yise he lodo.