“N’ma lẹn gbede dọ n’gán penugo bo sẹ̀n Jehovah to gigọ́ mẹ domọ pọ́n,” numọtolanmẹ he Gwen he wá sọn Angleterre tindo niyẹn dile e to sinsẹ̀nzọn wà to fie nuhudo sù te to Albanie. a

 Gwen yin dopo to Kunnudetọ susu he sẹtẹn yì Albanie nado bẹ “nuhọakuẹ akọta lẹpo tọn” pli lẹ mẹ. (Hagai 2:7) Etẹwẹ whàn wẹndagbe-jlatọ enẹlẹ? Diọdo tẹlẹ wẹ yé bayi whẹpo do sẹtẹn? Podọ etẹwẹ gọalọna yé nado do ayajẹ bo doakọnnanu mahopọnna avùnnukundiọsọmẹnu lẹ?

 Whẹwhinwhẹ́n dopolọ he wutu wẹnlatọ ehe lẹpo do wá gọalọ to Albanie wẹ yindọ: Yé yiwanna Jehovah bosọ jlo na gọalọna mẹdevo lẹ nado wá yọ́n ewọ.

 Whẹpo yé do sẹtẹn, yé basi diọdo delẹ nado hẹn lizọnyizọn yetọn gblodeji, podọ ehe gọalọna yé nado duto nuhahun he sinsẹ̀nzọnwiwà to tògodo nọ bẹhẹn lẹ ji. Gwen dọmọ: “Jẹnukọn whẹ́, n’kọnawudopọ hẹ kándo de he nọ do Albanie-gbè to otò ṣie mẹ. Enẹgodo, n’yì Albanie nado bayi plidopọ de. To nukọn mẹ, n’lẹkọyi finẹ na ojlẹ de nado plọn ogbè lọ ganji.”

 To whenue Manuela he nọ nọ̀ Italie do owhe 23, e sẹtẹn yì lẹdo otò lọ tọn devo mẹ nado gọalọ to agun pẹvi de mẹ. E dọ: “N’sẹ̀n to finẹ na owhe ẹnẹ. Enẹgodo, n’sè dọ nuhudo sù taun to Albanie. Enẹwutu, n’bayi tito nado yì gọalọ to finẹ na osun delẹ taidi gbehosọnalitọ.”

 Owhe ṣinawe poun wẹ Federica tindo whenue e sè linlin de he yin nina gando Albanie go to plidopọ de ji. E dọmọ: “Mẹmẹsunnu he to linlin lọ na dọ dọ wẹnlatọ he to Albanie lẹ nọ bẹ plọnmẹ Biblu susu jẹeji podọ jlodotọ lẹ nọ wá opli lẹ. N’jẹ didọna mẹjitọ ṣie lẹ ji dọ e jlo mi nado yì Albanie. Ojlo he n’tindo paṣa yé, amọ́ baba ṣie dọ dọ ‘Hodẹ̀ gandego, podọ eyin ojlo Jehovah tọn wẹ, e na sè odẹ̀ towe.’ To osun delẹ godo, yè ylọ whẹndo mítọn nado wá wà sinsẹ̀nzọn to Albanie!” Owhe susu ko juwayi, podọ todin Federica ko wlealọ hẹ Orges. Yé omẹ awe lẹ to sinsẹ̀nzọn whenu-gigọ́ tọn mẹ to Albanie.

 To whenue Gianpiero yí gbọjẹ whenu gaa tọn godo, e sẹtẹn yì Albanie po asi etọn Gloria po. E dọ: “Mí plọn visunnu mítọn lẹ whẹ́n to Italie. Atọ̀n to yé mẹ sẹtẹn yì tògodo nado gọalọ to fie nuhudo sù te. Hosọ Atọ̀họ̀-Nuhihọ́ lọ Tọn ‘Be Hiẹ Sọgan Sẹtẹn Yì Makedonia Ya?’ wẹ yinuwado mí ji taun. Enẹwutu, mí yí sọwhiwhe do lẹnnupọndo lehe mí sọgan yì gọalọ to Albanie do ji po akuẹ gbọjẹ whenu gaa tọn he n’nọ mọyi po.”

 Mẹhe jlo na yì gọalọ to fie nuhudo sù te lẹ dona yí sọwhiwhe do wleawu bosọ bayi diọdo he na zọ́n bọ yé na sẹtẹn lẹ. (Luku 14:28) Gbọnvona onú enẹlẹ, yé dona dín nudevo delẹ he yé gán wà nado penukundo yede go to akuẹzinzan-liho. To whenue Gwen, he yin nùdego to bẹjẹeji gbẹ́ to Angleterre, e sẹtẹn jẹ nọviyọnnu etọn pá whẹ́ nado penugo bo sẹ̀ akuẹ do. Sophia po Christopher po he wá sọn Angleterre ga dọmọ: “Mí sà mọto mítọn po núzinzan delẹ po. Mí lẹndọ mí na nọ Albanie, e whè gbau na owhe dopo.” Homẹ yetọn hùn dọ yé penugo bo nọ dọ́n hú lee yé lẹn do.

 Wẹnlatọ delẹ nọ nọ̀ Albanie na osun kleun de, enẹgodo yé nọ lẹkọyi otò yetọn mẹ nado wazọ́n bo sẹ̀ akuẹ do bosọ nọ lẹkọwa Albanie. Nue Eliseo po Miriam po nọ wà niyẹn. Eliseo dọ dọ: “Miriam wá sọn lẹdo Italie tọn he mẹ saditọ lẹ nọ saba wá de, fie e nọ bọawu taun nado mọ agbasazọ́n whenu gli tọn lẹ te. Mí nọ yì lẹdo enẹ mẹ bo nọ wazọ́n na osun atọ̀n to alunlun whenu, podọ enẹgodo mí nọ lẹkọyi Albanie bo nọ yí akuẹ he mí ko sẹ̀do lẹ zan nado penukundo míde go na osun ṣinẹnẹ he pò lẹ. Mí wà ehe na owhe atọ́n.”

 To tẹnsisẹ de godo, mẹhe jlo na yì gọalọ to fie hudo sù te lẹ dona diọada sọgbe hẹ ninọmẹ yọyọ lẹ, amọ́ ayinamẹ po apajlẹ Kunnudetọ lẹdo lọ tọn lẹ tọn po nọ gọalọna yé nado duto avùnnukundiọsọmẹnu lẹ ji. Sophia, he yin nùdego wayi dọmọ: “To avivọ-whenu to Albanie, fifá nọ sinyẹn taun to ohọ̀ lẹ mẹ hú lehe e nọ nọ̀ to otò ṣie mẹ. N’plọn nado nọ sọnú to aliho he gbọnvo pete mẹ taidi mẹmẹyọnnu lẹdo lọ tọn lẹ.” Grzegorz po asi etọn Sona po wá sọn Pologne nado gọalọ to tòdaho whanpẹnọ Prizren tọn mẹ to Kosovo. b Grzegorz dọmọ: “Wẹnlatọ lẹdo lọ tọn lẹ yin whiwhẹnọ, nọ jọmẹ bosọ nọ fahomẹ! Yé nọ gọalọna mí nado plọn ogbè lẹdo lọ tọn po nudevo lẹ po. Di apajlẹ, yé do ṣọfu he mẹ nulẹ ma nọ vẹkuẹ te lẹ hia mí gọna lee mí sọgan whleahi to lẹdo lọ mẹ do.”

 Mẹhe nọ sẹtẹn yì tògodo lẹ nọ mọaleyi, eyin yé jihọntọn pẹkipẹki hẹ Kunnudetọ lẹdo lọ tọn lẹ bosọ plọn nado yọ́n nususu gando ninọmẹ yetọn lẹ go. Sona dọmọ: “N’mọ lehe owanyi Jehovah tọn dohuhlọn sọ. Mẹmẹsunnu lọ lẹ hẹn yise ṣie lodo dogọ, na n’mọ lehe yé diọ nuyise po aliho gbẹninọ tọn yetọn lẹ po mlẹnmlẹn do to whenue yé plọnnu gando Jehovah go. Mí nọ mọdọ yé do hudo mítọn to agun lọ mẹ, mí ma yin gbẹ́gọ́nu de poun. Mí sẹ̀n to pọmẹ hẹ mẹmẹsunnu po mẹmẹyọnnu po he wá lẹzun họntọn mítọn lẹ.” (Malku 10:29, 30) Gloria dọmọ: “N’yọ́n mẹmẹyọnnu susu he doakọnna nukundiọsọmẹ sinsinyẹn sọn kọmẹnu he jẹagọdo Kunnudetọ lẹ dè. Na nugbo tọn, owanyi yetọn na Jehovah yinuwado ji e taun.”

 Mẹhe nọ gọalọ to fie hudo sù te lẹ sọ nọ tindo dotẹnmẹ hundote lọ nado plọn nuhọakuẹ susu he yé ma gán ko plọn to otò yetọn mẹ. Di apajlẹ, yé nọ mọdọ tẹnsisẹ sọn fie yè jẹakọ hẹ de nado wà susu dogọ na Jehovah nọ hẹn ayajẹ wá. Stefano basi zẹẹmẹ etọn dole: “To otò ṣie mẹ, alokan họngbo ji tọn ji wẹ n’nọ saba dekunnu gbọn, podọ hodidọ ṣie dona nọ nọ̀ glido. Amọ́, Albanie-nu lẹ yiwanna nado nọ dọhona whenu susu, titengbe eyin yé to kafé nù. Na n’nọ kuwinyan taun wutu, e ma bọawuna mi to tintan whenu, podọ n’ma nọ yọ́n nue n’na dọ. Amọ́, dile ojlẹ to yìyì, n’wá plọn nado nọ dotó mẹlẹ ganji, podọ todin n’nọ yiwanna hodọdopọ hẹ yé. Kunnudide wá lẹzun awuvivinu de na mi dogọ.”

 Leah po asu etọn William po sẹtẹn sọn États-Unis yì Albanie. E dọmọ: “Sinsẹ̀nzọnwiwa tofi zọ́n bọ aliho nulẹnpọn tọn mítọn diọ. Nususu wẹ mí plọn gando johẹmẹ, mẹsisi po họntọnjiji po go! Mí plọn aliho yọyọ lẹ nado nọ dekunnu, nado yihojlẹdohogo sọn Owe-wiwe lẹ mẹ podọ nado nọ dọ linlẹn mítọn lẹ tọ́n.” William dọmọ: “Susu mẹhe nọ wá dlá Albanie pọ́n lẹ tọn wẹ nọ yiwanna huto whanpẹnọ etọn lẹ. N’yiwanna sadidi gbọn lẹdo osó daho tọn etọn lẹ mẹ. Amọ́ na nugbo tọn, mẹhe nọ nọ̀ fi lẹ wẹ zọ́n bọ n’do yiwanna file hugan! To ojlẹ nujijla vonọtaun tọn lẹ mẹ, gbétatò susu tin to aigba-denamẹ mítọn ji he mẹ mí ma nọ penugo nado dekunnu te sọmọ. Eyin mí yì fi mọnkọ lẹ, diblayin azán dopo blebu wẹ mí nọ yizan nado dọhona whẹndo kleun de poun.

 Nuhe nọ hẹn ayajẹ wá na mẹhe nọ yì gọalọ to fie nuhudo sù te lẹ hugan wẹ nado mọdọ gbẹtọ lẹ kẹalọyi wẹndagbe lọ. (1 Tẹsalonikanu lẹ 2:19, 20) Mẹmẹyọnnu jọja tlẹnnọ de he nọ yin Laura, bo sẹtẹn yì Albanie dọmọ: “N’gọalọ to Fier, na ojlẹ de. To owhe awe daa poun gblamẹ, mẹyọyọ 120 wẹ lẹzun wẹnlatọ! Omẹ 16 wẹ n’plọnnu hẹ to yé mẹ!” Mẹmẹyọnnu devo he nọ yin Sandra dọmọ: “N’dekunnuna yọnnu de he nọ wazọ́n to ahimẹ. E wá lẹzun mẹmẹyọnnu podọ enẹgodo e lẹkọyi gbétatò etọn mẹ. To nukọn mẹ, e wá dọna mi dọ emi ko bẹ plọnmẹ Biblu 15 jẹeji!”

 Mẹdelẹ he sẹtẹn yì fie nuhudo sù te to Albanie to owhe susu die lẹ gbẹ́ pò to finẹ bo to vivi sinsẹ̀nzọn yetọn tọn dù taun. To whedelẹnu, e nọ jiawu na yé nado mọdọ azọ́n yetọn de sinsẹ́n tọ́n ojlẹ susu to whenue yé ko do okún tintan lọ godo. (Yẹwhehodọtọ 11:6) Christopher he yin nùdego to bẹjẹeji dọmọ: “N’dukosọna dawe de he n’bẹ plọnmẹ Biblu jẹeji hẹ whla tintan he n’wá Albanie. Awuji mi taun whenue e pintàn hodọdopọ tintan he mí tindo do Biblu ji tọn na mi. Todin, ewọ po asi etọn po ko yí baptẹm taidi sinsẹ̀n-basitọ Jehovah tọn de.” Federica he go mí donù to bẹjẹeji dọmọ: To agun ṣie mẹ, mẹmẹyọnnu de dọnsẹpọ mi bo kanbiọ mi eyin n’gbẹ́ flin emi. E dọna mi dọ n’dekunnuna emi to owhe ṣinẹnẹ die. Ojlẹ kleun de whenue n’sẹtẹn yì tòpẹvi devo mẹ godo, e jẹ Biblu plọn ji bosọ zindonukọn bo yí baptẹm. N’nọ saba lẹn dai dọ owhe tintan he mí zan to Albanie lẹ ma na nude. Amọ́, n’mọdọ lalo wẹ!”

 Mẹmẹsunnu gọna mẹmẹyọnnu he sẹtẹn yì Albanie po Kosovo po lẹ gọ́ na ayajẹ, na Jehovah dona vivẹnudido yetọn bosọ na yé gbẹzan he tindo zẹẹmẹ de. To whenue Eliseo ko nọ Albanie na owhe susu godo, e dọ gando numimọ he e tindo go dọmọ: “Míwu gbẹtọvi lẹ nọ saba lẹndọ, mí gán vò, eyin mí nọ doafọna nue aihọn nọ pọnhlan di vivomẹninọ lẹ. Amọ́, mí blẹ míde wẹ. Kakatimọ, nunọwhinnusẹ́n Jehovah tọn lẹ wẹ nọ zọ́n bọ gbẹzan mítọn nọ tindo lẹndai bọ mí nọ vò to gbẹ̀mẹ. Sinsẹ̀nzọnwiwa to fie nuhudo sù te zọ́n bọ n’hẹn enẹ do ayiha mẹ. N’mọdọ n’họakuẹ bosọ yọ́n-na-yizan. Họntọn nugbo susu he tindo yanwle dopolọ lẹ hẹ mi wẹ lẹdo mi.” Sandra yigbe dọ: “Whenue n’sẹtẹn yì fie nuhudo sù te, n’mọdọ Jehovah na mi dotẹnmẹ hundote lọ nado hẹn pekọwana ojlo he n’do sọn ojlẹ dindẹn die—enẹ wẹ nado lẹzun mẹdehlan. E ma vẹna mi gbede dọ n’sẹtẹn yì Albanie. Ma do ayajẹ sọmọ pọ́n.”