Na mẹdelẹ, nude ma nọ ylan hugan nado yin ginglọndo họmẹ na jikun to jijà to whèmẹ de bọ yé ma yọ́n nuhe yé na wà kavi fihe yé na yì wutu. “To ojlẹ mọnkọ lẹ mẹ, n’nọ sinai finẹ poun bo nọ to jẹhọn mẹ pọ́n,” wẹ jọja sunnu de he nọ yin Robert dọ.

 Be onú mọnkọ ko jọ do gowe pọ́n ya? Eyin mọ wẹ, hosọ ehe gán gọalọna we!

•  Nuhe a dona yọnẹn

•  Nuhe a gán wà

•  Nuhe ogbẹ́ towe lẹ nọ dọ

•   Nuyizan lẹtliki tọn lẹ gán nọma gọalọ.

   A gán yì Intẹnẹt ji ma nado hẹn whenu lọ gú, amọ́ mọwiwà gán dekanpona huhlọn nulẹnpọn tọn towe bo nasọ hẹn apọ̀ ṣì we dogọ. Jọja owhe 21 mẹvi de he nọ yin Jeremy dọmọ: “A na wá mọdọ a to nukunvando alokan kavi ọdinatẹẹ lọ mẹ poun wẹ, a ma to nugopipe apọ̀nmẹ tọn towe yizan.”

   Jọja yọnnu de he nọ yin Elena yigbe dọmọ: “Nuhe a gán wà to Intẹnẹt ji lẹ do dogbó. E na fẹayihasẹna we sọn nuhe to jijọ lẹdo we lẹ ji bọ eyin a wá ze alokan dai, apọ̀ nasọ ṣì we hú dai tọn!”

•   Pọndohlan dagbe tintindo wẹ nọ gọalọ.

   Be nususu tintindo nado wà wẹ na zọ́n bọ apọ̀ ma na ṣì we ya? Onú titengbe hugan lọ wẹ obá he mẹ a tindo ojlo to nuhe wà a te lọ mẹ jẹ. Di apajlẹ, jọja yọnnu de he nọ yin Karen flin dọmọ: Whenue n’to wehọmẹ yì, apọ̀ nọ ṣì mi taun mahopọnna dọ nuhe n’na wà to azán dopodopo ji ma nọ hán. E nọ biọ dọ yè ni ze mẹde jo pete na nuhe wà yè te ma nado mọ apọ̀.”

 Be a yọnẹn ya? “Eyin nuhe a na wà de ma tin,” aliglọnnamẹnu de ma to finẹ, dotẹnmẹ hundote de wẹ, yèdọ aigba dagbe he ji linlẹn yọyọ lẹ gán wú te.

 Nọ lẹnnupọndo onú voovo lẹ ji. Jihọntọn yọyọ lẹ. Tindo mahẹ to ayidedai yọyọ de mẹ. Basi dodinnanu do hosọ yọyọ lẹ ji. Mẹhe nọ tindo ojlo to onú voovo mẹ lẹ ma nọ saba wá jẹ apọ̀ mọ ji to whenue yé to yede ṣo kavi etlẹ yin to whenue yé topọ hẹ mẹdevo lẹ!

 Nunọwhinnusẹ́n Biblu tọn: “Nudepope he alọ towe plá, wà ẹ po huhlọn towe lẹpo po.”—Yẹwhehodọtọ 9:10.

 “To agọe, n’jẹ Chine-gbè Mandarin (he bọawu) plọn ji, podọ tintẹnpọn nado nọ yí i zan egbesọegbesọ zọ́n bọ n’wá mọdọ nupinplọn enẹ nkọ ko to gbigbọ go e dai. N’yiwanna nulinlẹnpọn do azọ́n he n’na wà de ji. E nọ zọ́n bọ n’nọ yí nugopipe nulẹnpọn tọn ṣie zan bo nọ gọalọna mi nado yí whenu ṣie zan ganji.”—Melinda.

 Ze ayiha do yanwle towe ji. Eyin a nọ tindo yanwle de to ayiha mẹ gando nuhe wà a te go, ojlo he a tindo to e mẹ na jideji. Azọ́ndenamẹ wehọmẹ tọn lẹ ma na tlẹ nọ hẹn apọ̀ ṣì we sọmọ eyin a tindo yanwle de.

 Nunọwhinnusẹ́n Biblu tọn: “Nude ma yọ́n na gbẹtọ hú nado . . . mọ awuvivi to azọ́n sinsinyẹn etọn mẹ.”—Yẹwhehodọtọ 2:24.

 “Jei vivọnu wehọmẹ yìyì tọn ṣie, n’nọ plọnnu na gànhiho ṣinatọ̀n to gbèdopo nado plọn nuhe n’ma ko plọn lẹ, na n’ma yawu bẹ nupinplọn jẹeji wutu. Be apọ̀ ṣì mi wẹ ya? Gbede pọ́n, na n’ko tindo yanwle de wutu. N’nọ ze ayiha ṣie do kọdetọn lọ ji—gbedewema-yíyí—podọ enẹ whàn mi nado zindonukọn.”—Hannah.

 Yọnẹn dọ nudelẹ tin he a ma gán diọ. Afọdidona yanwle he fọnjlodotenamẹ de ma na zọ́n bọ apọ̀ ma na nọ wá ṣì we. Podọ họntọn dagbe lẹ tlẹ gán nọ wá diọ tito delẹ bọ a ma na yọ́n nuhe a na wà. Kakati nado nọ jẹflumẹ bo jẹ numọtolanmẹ agọ̀ tindo ji, tẹnpọn nado tindo pọndohlan dagbe.

 Nunọwhinnusẹ́n Biblu tọn: “Mẹhe ahun etọn gọ́ na ayajẹ nọ tin to hùnwhẹ mẹ to whepoponu.”—Howhinwhẹn lẹ 15:15.

 “Họntọn de dọna mi dọ n’dona plọn nado nọ duvivi ojlẹ he mẹ n’nọ nọ̀ dee ṣo te lẹ tọn. E dọ dọ nado nọ duvivi ojlẹ pọninọ hẹ mẹdevo lẹ tọn po ojlẹ he mẹ yè nọ nọ̀ mẹde ṣo te lẹ po tọn yin onú titengbe de he mẹlẹpo dona plọn.”—Ivy.