Malia Magdaleni yin hodotọ nugbonọ Jesu Klisti tọn. Yinkọ etọn, Magdaleni, gán ko yin didesọn yinkọ tòpẹvi Magdala (vlavo Magadani) tọn mẹ, he sẹpọ Ohù Galili tọn. Malia sọgan ko nọ finẹ pọ́n.

 Malia Magdaleni yin dopo to yọnnu delẹ he zingbejizọnlin hẹ Jesu po hodotọ etọn lẹ po mẹ bo nọgodona yé to agbasa-liho. (Luku 8:1-3) E yí nukun do mọ whenue Jesu yin hùhù, podọ e yin dopo to omẹ tintan he mọ ẹn to fọnsọnku etọn godo lẹ mẹ.—Malku 15:40; Johanu 20:11-18.

•  Be galọtọ de wẹ Malia Magdaleni yin ya?

•  Be Malia Magdaleni yin “apọsteli na apọsteli lẹ” wẹ ya?

•  Be asi Jesu Klisti tọn wẹ Malia Magdaleni yin ya?

•  Malia nẹmu go wẹ Biblu donù?

 Biblu ma dọ dọ galọtọ de wẹ Malia Magdaleni yin. Nue Biblu dọ gando gbẹzan he e zan wayi go wẹ yindọ Jesu yàn aovi ṣinawe jẹgbonu sọn ewọ mẹ.—Luku 8:2.

 Fie wẹ linlẹn lọ dọ ewọ yin galọtọ de wá sọn lo? Owhe kanweko lẹ to okú Malia Magdaleni tọn godo, mẹdelẹ wá sọalọakọ́n dọ ewọ wẹ yin nawe (vlavo galọtọ de) he Biblu ma dọ yinkọ etọn lọ, he klọ afọ Jesu tọn po dasin etọn lẹ po bosọ yí oda etọn do súnsún in. (Luku 7:36-38) Amọ́, dodonu Owe-wiwe tọn depope matin nado yí ehe sè.

 Lala. Ṣọṣi Katoliki tọn ylọ Malia dọ “Onọ̀ Wiwe Malia Magdaleni” podọ “apọsteli na apọsteli lẹ,” na ewọ yin dopo to omẹ tintan he hẹn owẹ̀n fọnsọnku Jesu tọn wá na apọsteli lẹ mẹ. (Johanu 20:18) Amọ́ ehe ma zọ́n bọ e yin apọsteli de. Podọ Biblu ma dọ to fidepope dọ e yin apọsteli de.—Luku 6:12-16.

 Sẹpọ vivọnu owhe kanweko tintan W.M. wẹ Biblu ko yin tadona. Amọ́, owhe kanweko susu lẹ godo wẹ nukọntọ ṣọṣi tọn lẹ wá ze Malia Magdaleni do otẹn he yiaga de mẹ. Nuhe yin kinkan bẹsọn owhe kanweko awetọ jẹ owhe kanweko atọ̀ntọ—he ma yin apadewhe owe-hihá Biblu tọn lẹ tọn—dohia dọ apọsteli Jesu tọn lẹ nọ whànwu Malia. Otàn he yè pọ́n tamẹ bo kàn enẹ lẹ ma tindo dodonu depope to Owe-wiwe lẹ mẹ.

 Paali. Na nugbo tọn, Biblu hẹn ẹn họnwun hezeheze dọ Jesu gbọṣi tlẹnmẹ. a