Hogbe lọ lẹ “Osẹ́n Sika tọn” ma sọawuhia to Biblu mẹ. Amọ́, mẹsusu nọ yí hogbe ehelẹ zan nado dlẹnalọdo osẹ́n walọyizan tọn he Jesu plọnmẹ. To yẹwhehodidọ Osó ji tọn etọn he mẹsusu yọnẹn lọ mẹ, Jesu dọmọ: “Nudepope he mìwlẹ jlo dọ gbẹtọ lẹ ni nọ wà na mì, mọ wẹ mìlọsu dona nọ wà na yé do.” (Matiu 7:12) Osẹ́n Sika tọn sọ yin lilẹ́ dole: “Le mì jlo dọ gbẹtọ lẹ ni wà hlan mì do, mọkẹdẹ wẹ mì ni wà hlan yé do.”—Luku 6:31, Biblu Wiwe lọ—Gun Alada.

•  Etẹwẹ Osẹ́n Sika tọn zẹẹmẹdo?

•  Dagbe tẹwẹ Osẹ́n Sika tọn nọ wà na mí?

•  Be Osẹ́n Sika tọn yin whẹho na mi ma na we tọn poun wẹ ya?

•  Nawẹ a gán yí Osẹ́n Sika tọn do yizan mẹ gbọn?

 Osẹ́n Sika tọn biọ to mí si nado yinuwa hẹ mẹdevo lẹ dile mí na jlo dọ yé ni yinuwa hẹ mí do. Di apajlẹ, e nọ vivi na mẹsusu, eyin mẹdevo lẹ do sisi, homẹdagbe po owanyi po hia yé. Mọ wẹ mílọsu dona “nọ wà na” mẹdevo lẹ do.—Luku 6:31.

 Osẹ́n Sika tọn gán yin hihodo to ninọmẹ lẹpo mẹ. Di apajlẹ, e sọgan . . .

•   Hẹn alọwle lodo.—Efesunu lẹ 5:28, 33.

•   Gọalọna mẹjitọ lẹ whenue yé to ovi lẹ plọn.—Efesunu lẹ 6:4.

•   Hẹn haṣinṣan dagbe tin to họntọn, kọmẹnu po azọ́nwatọgbẹ́ lẹ po ṣẹnṣẹn.—Howhinwhẹn lẹ 3:27, 28; Kolosinu lẹ 3:13.

 Nunọwhinnusẹ́n he to godona Osẹ́n Sika tọn wẹ sọawuhia hugan to nue mẹsusu nọ ylọ dọ Alẹnu Hoho mẹ. Osẹ́n walọyizan tọn he Jesu dọ “wẹ nuhe Osẹ́n lọ [enẹ wẹ, owe atọ́n tintan Biblu tọn lẹ] po Yẹwhegán lẹ po [enẹ wẹ, owe dọdai tọn lẹ] zẹẹmẹdo.” (Matiu 7:12) To hogbe devo mẹ, Osẹ́n Sika tọn blá nugbo titengbe de dopọ sọn Alẹnu Hoho mẹ, enẹ wẹ: wanyina kọmẹnu mẹtọn.—Lomunu lẹ 13:8-10.

 Lala. Nunamẹ ji wẹ Osẹ́n Sika tọn zinnudo. Whenue Jesu dọhodo Osẹ́n Sika tọn lọ ji, e ma yin lehe mí na yinuwa hẹ gbẹtọ lẹ do to paa mẹ kẹdẹ ji wẹ e to hodọ do, amọ́ do lehe mẹde gán yinuwa hẹ kẹntọ etọn do ji ga. (Luku 6:27-31, 35) Enẹwutu, Osẹ́n Sika tọn lọ na tuli gbẹtọ lẹ nado nọ wà dagbe na mẹlẹpo.

1.  1. Nọ doayinugo. Nọ na ayidonugo sọwhiwhe tọn mẹhe lẹdo we lẹ. Di apajlẹ, a gán mọ mẹde he to vivẹnudo nado didá agbàn de, kavi sè dọ kọmẹnu de yin ginglọn do dotowhé, kavi a doayi e go dọ azọ́nwatọgbẹ́ de gbọjọ. Eyin a nọ “ze ayidonugo . . . do ale mẹdevo lẹ tọn ji,” e yọnbasi dọ a ni mọ dotẹnmẹ nado dọ kavi wanu de he na gọalọna yé.—Filipinu lẹ 2:4.

2.  2. Nọ vẹawumẹ. Ze dewe do otẹn mẹdevo tọn mẹ. Numọtolanmẹ tẹwẹ a na tindo eyin a tin to ninọmẹ dopolọ mẹ? (Lomunu lẹ 12:15) Eyin a tẹnpọn nado mọnukunnujẹ numọtolanmẹ mẹdevo lẹ tọn mẹ, ehe gán whàn we nado gọalọna yé.

3.  3. Nọ diọalọ. Nọ hẹn do ayiha mẹ dọ mẹdopodopo gbọnvo. Nuhe mẹdevo lẹ gán ko jlo dọ yè ni wà na yé sọgan nọma yin nuhe hiẹ na ko jlo dọ yè ni wà na we. Enẹwutu, to onú susu he a gán wà lẹ mẹ, tẹnpọn bo de nuhe yé na ko jlo dọ a ni wà na emi.—1 Kọlintinu lẹ 10:24.